ഇന്ത്യയിലെ പ്രമുഖ പുസ്തക പ്രസാധകരായ ഡി.സി ബുക്‌സും ബഹ്‌റൈൻ കേരളീയ സമാജവും സംയുക്തമായി സംഘടിപ്പിക്കുന്ന അന്താരാഷ്ട്ര പുസ്തമേളയ്ക്കും സാംസ്‌കാരികോത്സവത്തിനും ഇന്ന് തുടക്കമാകും.
വൈകിട്ട് 8 മണിക്ക് സമാജം ഡയമണ്ട് ജൂബിലി ഹാളിൽ നടക്കുന്ന ചടങ്ങിൽ ഇന്ത്യൻ അംബാസിഡർ വിനോദ്.കെ.ജേക്കബ് മുഖ്യാതിഥിയായും ബഹ്‌റൈൻ അറോറിറ്റി ഫോർ കൾച്ചറൽ ആൻഡ് ആന്റിക്വിറ്റീസിന്റെ ഡയറക്ടർ ഹുദ സെയ്ദ് അബ്ദുൾഗാഫർ അൽ അലവി വിശിഷ്ടാതിഥിയായും പങ്കെടുക്കും.
നവംബർ 9 മുതൽ 18 വരെ നീണ്ടു നിൽക്കുന്ന അന്താരാഷ്ട്ര പുസ്തകമേളയിലും സാംസ്‌കാരികോത്സവത്തിലും പി.എസ്.ശ്രീധരൻ പിള്ള, എം എ ബേബി,സാഗരിക ഘോഷ്, മുരളി തുമ്മാരുകുടി, സന്തോഷ് ജോർജ്ജ് കുളങ്ങര, വി.ജെ. ജയിംസ്, ചെഫ് പിള്ള, എം വിനികേഷ് കുമാർ, രാവുണ്ണി തുടങ്ങി
പ്രശസ്തരായ നിരവധി എഴുത്തുകാരും സാംസ്‌കാരിക- രാഷ്ട്രീയ പ്രവർത്തകരും വിവിധ ദിവസങ്ങളിൽ അതിഥികളായി പങ്കെടുക്കുമെന്ന് സമാജം പ്രസിഡന്റ് പി.വി.രാധാകൃഷ്ണപിള്ള, ജനറൽ സെക്രട്ടറി വർഗ്ഗീസ് കാരക്കൽ എന്നിവർ വാർത്താക്കുറിപ്പിൽ അറിയിച്ചു.
മേളയുടെ ഭാഗമായി നിരവധി കലാപരിപാടികളും വിവിധ ദിനങ്ങളിലായി ഒരുക്കിയിട്ടുണ്ട്.
പുസ്തകമേളയോടനുബന്ധിച്ച് ഇന്ത്യയിലും വിദേശത്തുമുള്ള പ്രമുഖ പ്രസാധകരുടെ അയ്യായിരത്തിലധികം ശീർഷകങ്ങളിലുള്ള ഒരു ലക്ഷത്തിലധികം പുസ്തകങ്ങളാണ് വായനക്കാർക്കായി ഒരുക്കിയിരിക്കുന്നത്. കഥ, കവിത, നോവൽ, ജനപ്രിയഗ്രന്ഥങ്ങൾ, ക്ലാസിക്കുകൾ, റഫറൻസ് പുസ്തകങ്ങൾ, ബാലസാഹിത്യഗ്രന്ഥങ്ങൾ, ഡിക്ഷ്ണറികൾ, സെൽഫ് ഹെൽപ് പുസ്തകങ്ങൾ, മത്സരപരീക്ഷകൾക്കുള്ള പഠനസഹായികൾ, ആദ്ധ്യാത്മികഗ്രന്ഥങ്ങൾ, പാചകം, യാത്രാവിവരണങ്ങൾ, ജീവചരിത്രങ്ങൾ, ആത്മകഥ, ആരോഗ്യം തുടങ്ങി വിവിധ വിഭാഗങ്ങളിലായി നിരവധി മലയാളം-ഇംഗ്ലീഷ് കൃതികൾ മേളയിൽ ലഭ്യമാകും.
പുസ്തകമേളയോടനുബന്ധിച്ച് സമാജം ഫോട്ടോഗ്രാഫി ക്ലബ്ബ് സംഘടിപ്പിക്കുന്ന ഫോട്ടോഗ്രാഫി പ്രദർശനത്തിനും ഇന്ന് തുടക്കമാകും.
സാംസ്‌കാരികോത്സവത്തിന്റെ ഭാഗമായി സമാജം ചിത്രകലാ ക്ലബ്ബ് ഒരുക്കുന്ന സമൂഹ ചിത്രരചന വെള്ളിയാഴ്ച ഉച്ചകഴിഞ്ഞ് മൂന്ന് മണിക്ക് ആരംഭിക്കും.' 'സമാധാനത്തിനായുള്ള കല'' എന്ന വിഷയത്തിൽ നടത്തുന്ന ഈ സമൂഹവരയിൽ ബഹ്‌റൈനിലെ പ്രമുഖ ചിത്രകാരന്മാരും ചിത്രകാരികളുമടക്കം നൂറിലധികം പേർ പങ്കെടുക്കും. കൂടാതെ, എല്ലാ ദിവസവും സാഹിത്യ സാംസ്‌കാരിക പരിപാടികളും പ്രമുഖരുമായുള്ള മുഖാമുഖങ്ങളും ഉണ്ടാകുമെന്ന് സമാജം സാഹിത്യ വിഭാഗം സെക്രട്ടറി ഫിറോസ് തിരുവത്രയും ജനറൽ കൺവീനർ ബിനു വേലിയിൽ, സാഹിത്യ വിഭാഗം കൺവീനർമാരായ പ്രശാന്ത് മുരളീധർ, അനഘ രാജീവ് എന്നിവരും അറിയിച്ചു.
