ബാലവേദി കുവൈറ്റ് ഫഹാഹീൽ മേഖലയിൽ കുട്ടികൾക്കായി ''നെല്ലിക്ക'' എന്ന പേരിൽ നാടക കളരി സംഘടിപ്പിച്ചു. മംഗഫ് കല ഓഡിറ്റോറിയത്തിൽ നടന്ന പർശീലന കളരി കുവൈറ്റിലെ പ്രമുഖ നാടക പ്രവർത്തകനും ഈ വർഷത്തെ കേരള സംഗീത നാടക അക്കാദമി പ്രവാസി നാടക മത്സരത്തിലെ മികച്ച സവിധായകനുമായി തിരഞ്ഞെടുത്ത സുരേഷ് തോലമ്പ്ര നേതൃത്വം നൽകി. നാടക പ്രവർത്തനങ്ങളുടെ വിവിധ മേഖലകളെ തൊട്ടുള്ള പരിശീലന പരിപാടി പങ്കെടുത്ത 30 ഓളം കുട്ടികൾക്ക് പ്രയോജനപ്രദമായി മാറി. കുട്ടികൾ തന്നെ എഴുതി തയ്യാറാക്കിയ മൂന്നോളം ലഘു നാടകങ്ങൾ കളരിയുടെ ഭാഗമായി അരങ്ങേറി.

കേരള ആർട്ട് ലവേഴ്‌സ് അസോസിയേഷൻ, കല കുവൈറ്റ് പ്രസിഡന്റ് ആർ. നാഗനാഥൻ ഉദ്ഘാടനം ചെയ്ത നാടക കളരിക്ക് രഹിൽ കെ. മോഹൻദാസ് സ്വാഗതവും ജ്യോതിഷ് പിജി. നന്ദിയും രേഖപ്പെടുത്തി. അനിൽ കൂക്കിരി, ദേവി സുഭാഷ് എന്നിവർ ആശംസകൾ നേർന്ന് സംസാരിച്ചു. പങ്കെടുത്ത കുട്ടികൾക്ക് കലയുടെ മുതിർന്ന പ്രവർത്തകർ ഉപഹാരങ്ങൾ നൽകി. കല കുവൈറ്റ് പ്രവർത്തകരായ സജീവ് അബ്രഹാം, ജയകുമാർ സഹദേഹൻ, രഘു പേരാമ്പ്ര, ജ്യോതിഷ് പി.ജി, സുരേഷ് കുമാർ, ശോഭ സുരേഷ്, ദേവി സുഭാഷ്, വിനീത അനിൽ എന്നിവർ കളരിയുടെ നടത്തിപ്പിന് ചുക്കാൻ പിടിച്ചു.