ന്യൂഡൽഹി: പൊതുമേഖലാ ബാങ്ക് ജീവനക്കാരുടെ വിവിധ യൂണിയനുകൾ പ്രഖ്യാപിച്ചിട്ടുള്ള പണിമുടക്ക് നാളെ നടക്കും. പണിമുടക്ക് ബാങ്കിങ് മേഖലയുടെ പ്രവർത്തനത്തെ സാരമായി ബാധിച്ചേക്കും.

യുണൈറ്റഡ് ഫോറം ഓഫ് ബാങ്ക് യൂണിയൻസിന്റെ നേതൃത്വത്തിലാണ് വിവിധ സംഘടനകൾ ചൊവ്വാഴ്ച രാജ്യവ്യാപക പണിമുടക്ക് നടത്തുമെന്ന് പ്രഖ്യാപിച്ചിരിക്കുന്നത്. ബാങ്കിങ് സേവനങ്ങളെ ബാധിക്കുമെന്ന് എസ്.ബി.ഐ, പി.എൻ.ബി, ബി.ഒ.ബി. തുടങ്ങിയ ബാങ്കുകൾ ഇടപാടുകരെ അറിയിച്ചിട്ടുണ്ട്. സ്വകാര്യമേഖലയിലെ ഐ.സിഐസി.ഐ, എച്ച്.ഡി.എഫ്.സി, ആക്സിസ്, കൊടാക് മഹീന്ദ്ര തുടങ്ങിയ ബാങ്കുകൾ സാധാരണനിലയിൽ പ്രവർത്തിക്കും. ബാങ്കിങ് മേഖലയിലെ സ്ഥിരം ജോലികൾ കരാറടിസ്ഥാനത്തിൽ നൽകുന്നതുൾപ്പെടെ സർക്കാർ നടപ്പാക്കാനുദ്ദേശിക്കുന്ന നിർദിഷ്ട തൊഴിൽനിയമ പരിഷ്‌കരണങ്ങൾക്കെതിരേയാണ് പ്രക്ഷോഭം.

നോട്ട് അസാധുവാക്കലിനെത്തുടർന്ന് ബാങ്ക് ജീവനക്കാർക്ക് അധികസമയം ജോലിചെയ്യേണ്ടിവന്നതിന് നഷ്ടപരിഹാരം നൽകുക, കിട്ടാക്കടങ്ങൾ തിരിച്ചുപിടിക്കുക, വായ്പകൾ തിരിച്ചടയ്ക്കുന്നതിൽ മനപ്പൂർവം വീഴ്ച വരുത്തുന്നവർക്കെതെിരെ നടപടി സ്വീകരിക്കുക തുടങ്ങി വിവിധ ആവശ്യങ്ങളാണ് യൂണിയനുകൾ ഉന്നയിക്കുന്നത്.