ഒറിജിനലിനെ വെല്ലുന്ന ഫാസ്ടാഗുകളുമായി വ്യാജന്മാർ; തട്ടിപ്പിന് ഇരയാകരുതെന്ന് പൊലീസ്
തിരുവനന്തപുരം: വ്യാജ ഫാസ്ടാഗ് വിൽപനക്കാർ തട്ടിപ്പുമായി രംഗത്തെത്തിയിട്ടുണ്ടെന്ന് കേരള പൊലീസ്. നാഷനൽ ഹൈവേ അഥോറിറ്റിയുടേതെന്ന വ്യാജേനെ ഓൺലൈൻ വഴിയാണ് തട്ടിപ്പ് സംഘങ്ങൾ സജീവമാകുന്നത്. ഇത്തരക്കാരെ തിരിച്ചറിയണമെന്നും നിലവിലുള്ള നിയമാനുസൃത മാർഗങ്ങളിലൂടെ തന്നെ ഫാസ്ടാഗ് വാങ്ങണമെന്നും പൊലീസ് മുന്നറിയിപ്പ് നൽകുന്നു. ഇതിനെതിരെ നാഷണൽ ഹൈവേ അഥോറിറ്റി നേരത്തെ തന്നെ മുന്നറിയിപ്പ് നൽകിയതാണ്.
ഒറിജിനലിനെ വെല്ലുന്ന വിധമാണ് വ്യാജന്മാരുടെ ഫാസ്ടാഗുകൾ. ബാങ്കിലെ കസ്റ്റമർ സർവിസ് എക്സിക്യൂട്ടീവ് എന്ന രീതിയിൽ ഫോണിൽ ബന്ധപ്പെട്ട ശേഷം ഇവർ അയച്ചുകൊടുക്കുന്ന ലിങ്കിൽ ഓൺലൈൻ ഫോം പൂരിപ്പിച്ച് സമർപ്പിക്കാൻ ആവശ്യപ്പെട്ട് ആൾക്കാരെ കെണിയിൽ പെടുത്തുന്ന രീതിയും തട്ടിപ്പുകാർ അവലംബിക്കുന്നുണ്ട്.
ആധികാരികത ഉറപ്പുവരുത്താൻ നാഷണൽ ഹൈവേ അഥോറിറ്റിയുടെ https://ihmcl.co.in/ എന്ന വെബ്‌സൈറ്റ് സന്ദർശിക്കുകയോ MyFastag App ഉപയോഗിക്കുകയോ ചെയ്യുക. ഫാസ്ടാഗുകൾ വിതരണം ചെയ്യാൻ അനുവദിച്ച ബാങ്കുകൾ / ഏജൻസികൾ മുഖേനെയും ഫാസ്ടാഗ് വാങ്ങാം.
