സഹ്യ പ്രീമിയർ ലീഗ് ഫുട്‌ബോളിൽ ഐപിക്‌സ് ടെക്‌നോളജീസ് ജേതാക്കളായി
കോഴിക്കോട്: സഹ്യ പ്രീമിയർ ലീഗ് ഫുട്‌ബോളിൽ ആക്‌സൽ ടെക്‌നോളജീസിനെതിരെ 5-0 ഗോളിന് ഐപിക്‌സ് ടെക്‌നോളജീസ് ജേതാക്കളായി.
സൈബർപാർക്കും സിഎഎഫ്‌ഐടി (കാലിക്കറ്റ് ഫോറം ഫോർ ഇൻഫർമേഷൻ ടെക്‌നോളജി) യും സഹ്യ പ്രീമിയർ ലീഗ് കമ്മിറ്റിയും സംയുക്തമായി സൈബർ സ്പോർട്സ് അരീനയിലാണ് ചാമ്പ്യൻഷിപ്പ് സംഘടിപ്പിച്ചത്.
ഒമ്പത് ദിവസത്തെ ചാമ്പ്യൻഷിപ്പിൽ 24 കമ്പനികളുടെ ടീമുകൾ മാറ്റുരച്ചു. നാല് ടീമുകളുള്ള ആറ് ഗ്രൂപ്പുകളായാണ് മത്സരിച്ചത്.
അജ്മൽ ടി.കെ. ടൂർണമെന്റിലെ മികച്ച താരമായും ഫഹദ് മികച്ച ഗോൾകീപ്പറായും തിരഞ്ഞെടുക്കപ്പെട്ടു. ജുനൈദ് കീടക്കാടൻ മികച്ച ഡിഫൻഡറും മുഹമ്മദ് ഫവാസ് ടോപ് സ്‌കോററുമായി. നാലുപേരും ഐപിക്‌സ് ടെക്‌നോളജീസീൽ നിന്നുള്ളവരാണ്.
സൈബർപാർക്ക് ജനറൽ മാനേജർ വിവേക് നായർ, ഡെപ്യൂട്ടി മാനേജർ (അഡ്‌മിനിസ്‌ട്രേഷൻ) ബിജേഷ് അധികാരത് എന്നിവർ വിജയികൾക്കുള്ള സമ്മാനദാനം നിർവഹിച്ചു.
മെയ് ഏഴിന് വെൽകിൻവിറ്റ്‌സ് ടെക്‌നോളജീസിന്റേയും ഡോക്ടോസ്മാർട്ടിന്റേയും കളിയോടെയാണ് ചാമ്പ്യൻഷിപ്പ് ആരംഭിച്ചത്. എല്ലാ ദിവസവും വൈകിട്ട് ഏഴിനായിരുന്നു മത്സരം.
