മംഗലപ്പുഴ പാലത്തില്‍ അറ്റകുറ്റപ്പണി; ആലുവ ദേശീയപാതയില്‍ ഗതാഗത നിയന്ത്രണം
കൊച്ചി: മംഗലപ്പുഴ പാലത്തിന്റെ അറ്റകുറ്റപ്പണികളെ തുടര്‍ന്ന് ആലുവ ദേശീയപാതയില്‍ ഗതാഗത നിയന്ത്രണം. നാളെ മുതല്‍ 20 ദിവസത്തേക്കാണ് നിയന്ത്രണം. എറണാകുളം ഭാഗത്തേക്കുള്ള ഭാരവാഹനങ്ങള്‍ രാവിലെ മുതല്‍ അങ്കമാലി സിഗ്‌നല്‍ ജംഗ്ഷനില്‍ നിന്ന് എംസി റോഡില്‍ പ്രവേശിച്ച് കാലടി വഴി തിരിഞ്ഞ് ആലുവ ഭാഗത്തേക്ക് പോകണം.
അറ്റകുറ്റപ്പണി നടക്കുന്ന സമയത്ത് ഒരു വരി ഗതാഗതം മാത്രമേ അനുവദിക്കൂ. സെമിനാരിപ്പടി യുടേണ്‍ പൂര്‍ണമായും അടയ്ക്കും. ഇവിടെ തിരിയേണ്ട വാഹനങ്ങള്‍ പറവൂര്‍ക്കവല സിഗ്‌നലില്‍ നിന്നും തിരിഞ്ഞുപോകണമെന്നും അധികൃതര്‍ അറയിച്ചു.
20 ദിവസത്തിനകം ജോലികള്‍ പൂര്‍ത്തീകരിക്കാനാണ് ഇന്നലെ ജില്ലാ പൊലീസ് മേധാവിയുടെ കാര്യാലയത്തില്‍ നടന്ന ഉദ്യോഗസ്ഥരുടെ യോഗത്തില്‍ തീരുമാനിച്ചിരിക്കുന്നത്. 64 വര്‍ഷം പഴക്കമുള്ള മംഗലപ്പുഴ പാലം ആദ്യമായിട്ടാണ് ഇത്തരത്തില്‍ ബലപ്പെടുത്തുന്നത്.
രാവിലെയും വൈകിട്ടും പാലത്തില്‍ കൂടുതല്‍ പൊലീസുകാരുടെ സേവനം ഉറപ്പാക്കും. പൊലീസ് സേനയുടെ അംഗബലക്കുറവ് പരിഗണിച്ച് കരാറുകാര്‍ സ്വകാര്യ സെക്യൂരിറ്റിയുടെ സഹായം തേടും. മഴക്കാലം ആരംഭിച്ചാല്‍ കൂടുതല്‍ പ്രതിസന്ധിയിലാകുമെന്നതിനാലാണ് വെള്ളിയാഴ്ച്ച മുതല്‍ അറ്റകുറ്റപ്പണിക്ക് തീരുമാനമായത്.
