മുഖ്യധാരാ പാരമ്പര്യ രാഷ്ട്രീയ കക്ഷികൾ ഭരണഘടനയുടെ അടിസ്ഥാന തത്വങ്ങളെ പരിഗണിക്കാതിരുന്നതിനാലാണ് വെറുപ്പിന്റെ പൊതുബോധ നിർമ്മിതിയും സാമൂഹിക സംഘാടനവും സാധ്യമായതെന്ന് വെൽഫെയർ പാർട്ടി സംസ്ഥാന പ്രസിഡന്റ് ഹമീദ് വാണിയമ്പലം പറഞ്ഞു. കൾച്ചറൽ ഫോറം പ്രവർത്തക സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
വെറുപ്പും വിദ്വേഷവും സമൂഹത്തെ കാർന്നു തിന്നുന്നു. ജനാധിപത്യ- മതേതര സംവിധാനങ്ങൾ നിലനിർത്താനുള്ള കഠിന പ്രയത്‌നത്തിനുള്ള അവസരമാണിത്. നാനാത്വത്തിൽ ഏകത്വത്തിന്റെയും വൈവിധ്യങ്ങളുടെയും മത നിരപേക്ഷതയുടെയും ഈറ്റില്ലമായിടത്തു നിന്ന് വിഭജനത്തിന്റെയും അപര വിദ്വേഷത്തിന്റെയും വൃത്തികെട്ട സംസ്‌കാരമുയർന്നു വരുന്നു. നവോത്ഥാന നായകന്മാരും അവരുടെ പ്രസ്ഥാനങ്ങളും നിരന്തരം കലഹിച്ചതിനാലാണ് കേരളത്തിൽ വെറുപ്പിന്റെ രാഷ്ട്രീയം വേരുറക്കാതെ പോയത്. ദൗർഭാഗ്യകരമെന്ന് പറയട്ടെ ആ നവോത്ഥാന ഐക്യത്തിൽ അധികാര രാഷ്ട്രീയമെന്ന താത്കാലിക ലാഭത്തിനായി വിള്ളൽ വീഴ്‌ത്തുകയാണിന്ന് ചെയ്യുന്നത്.
അത് കേരളീയ പൊതു മണ്ഡലത്തിൽ ദൂരവ്യാപകമായ പ്രതിസന്ധികൾ സൃഷ്ടിക്കും. ചില സമുദായങ്ങൾ അനർഹമായി നേടൂന്നു എന്നതു പോലുള്ള നുണപ്രചരണങ്ങൾ കണക്കുകൾ നിരത്തി പൊളിക്കുകയും അത്തരം ചെയ്തികൾ നടത്തുന്നവർക്കെതിരെ നടപടിയെടുക്കുകയും ചെയ്യുന്നതിനു പകരം അപകടകരമായ മൗനം പാലിച്ച് അതിൽ നിന്ന് വോട്ട് ലാഭം കൊയ്യുന്ന അത്യന്തം രാഷ്ട്രീയ വഷളത്തരമാണ് ഭരണകൂടത്തിന്റെ ഭാഗത്തു നിന്നുണ്ടായത്. ഇന്ന് കാണുന്ന ഉന്മാദ ദേശീയതക്കെതിരെ നവോത്ഥാന നായകരും മതേതര പ്രസ്ഥാനങ്ങളും വിഭാവന ചെയ്ത മഴവിൽ ദേശീയതയിലേക്ക് തിരിച്ച് പോകണം. അതിനുള്ള പ്രവർത്തനങ്ങൾക്ക് കരുത്ത് പകരാൻ അദ്ദേഹം ആഹ്വാനം ചെയ്തു.
ഫ്രറ്റേണിറ്റി ദേശീയ പ്രസിഡന്റ് ഷംസീർ ഇബ്രാഹീം മുഖ്യ പ്രഭാഷണം നിർവ്വഹിച്ചു. അനീതികളോട് വിസമ്മതിക്കുന്ന കാമ്പസ്സുകളും, ഏതൊരു കാരണത്താലാണൊ അടിച്ചമർത്താൻ ശ്രമിച്ചത് അതേ ആശയങ്ങൾക്ക് വേണ്ടി ശക്തമായി ശബ്ദിച്ചു കൊണ്ടിരിക്കുന്ന യുവത്വവും വലിയ പ്രതീക്ഷകളാണ് നൽകുന്നത്. സമരങ്ങളെ മൂല്യനിർണയം നടത്തേണ്ടത് കാലാന്തരങ്ങളിലൂടെയാണെന്നും അങ്ങനെ ചെയ്യുമ്പോൾ പൗരത്വ പ്രക്ഷോഭങ്ങൾ വിജയിച്ച ഒരു മുന്നേറ്റം തന്നെയായിരുന്നെന്നും അദ്ദേഹം പറഞ്ഞു.
കൾച്ചറൽ ഫോറം പ്രസിഡന്റ് മുനീഷ് എ.സി അദ്ധ്യക്ഷത വഹിച്ചു. സാമൂഹിക സേവനത്തിൽ ഊന്നിയാണ് കൾച്ചറൽ ഫോറം ഖത്തറിൽ മുന്നോട്ട് പോകുന്നതെന്നും കോവിഡ് കാലങ്ങളിലടക്കും സർക്കാർ ഏജൻസികളുമായി ചേർന്ന് വലിയ പ്രവർത്തങ്ങൾ കാഴ്ചവെക്കാൻ സാധിച്ചുവെന്നും കലാ സാംസ്‌കാരിക കായിക മേഖലകളിലും ആനുകാലിക വിഷയങ്ങളിലും സംഘടന ശക്തമായ ഇടപെടലുകൾ നടത്തിക്കൊണ്ടിരിക്കുന്നുണ്ടെന്നും ഈയടുത്ത നടത്തിയ പ്രവാസി ക്ഷേമ പദ്ധതികൾ പരിചയപ്പെടുത്തുന്ന കാമ്പയിനിലൂടെ ആയിരങ്ങൾക്ക് വിവിധ പദ്ധതികളുടെ ഗുണഭോക്താക്കളാവാനുള്ള അവരമൊരുക്കിയെന്നും അദ്ദേഹം പറഞ്ഞു.
കൾച്ചറൽ ഫോറം ജനറൽ സെക്രട്ടറി മജീദ് അലി ആമുഖ ഭാഷണം നടത്തി. കൾച്ചറൽ ഫോറം വൈസ് പ്രസിഡന്റുമാരായ ചന്ദ്രമോഹൻ, മുഹമ്മദ് കുഞ്ഞി തുടങ്ങിയവർ അതിഥികളെ പൊന്നാടയണിച്ചു. ജനറൽ സെക്രട്ടറി താസീൻ അമീൻ പുതിയ പരിപാടികൾ വിശദീകരിച്ചു. നടുമുറ്റം പ്രസിഡന്റ് സജ്‌ന സാക്കി, വൈസ് പ്രസിഡന്റ് നിത്യ സുബീഷ്, കെ.ഇ.സി പ്രസിഡന്റ് മുഹമ്മദ് ഷരീഫ് ചിറക്കൽ, എക്‌സ്പാറ്റ് സ്‌പോർട്ടീവ് പ്രസിഡന്റ് സുഹൈൽ ശാന്തപുരം. കൾച്ചറൽ ഫോറം അഡൈ്വസറി ബോർഡ് വൈസ് ചെയർമാൻ റഷീദ് അഹമ്മദ്, കൾച്ചറൽ ഫോറം വൈസ് പ്രസിഡന്റ് ഷാനവാസ് ഖാലിദ്, ടീം വെൽഫെയർ ക്യാപ്റ്റൻ സഞ്ചയ് ചെറിയാൻ തുടങ്ങിയവർ സംബന്ധിച്ചു. കൾച്ചറൽ ഫോറം കലാകാരന്മാർ അവതരിപ്പിച്ച കലാപരിപാടികളും ലത്തീഫ് ഗുരുവായൂർ രചനയും സംവിധാനവും നിർവ്വഹിച്ച 'ബോധ്യം' നാടകവും അരങ്ങേറി. പ്രോഗ്രാം കൺവീനർ റഷീദ് കൊല്ലം നന്ദി പ്രകാശിപ്പിച്ചു.
