കാഞ്ഞിരപ്പള്ളി: ആത്മീയ ഉണർവ്വേകി ആയിരക്കണക്കിന് വിശ്വാസികൾ പങ്കെടുത്ത ജപമാലറാലി പൊടിമറ്റത്തെ ഭക്തിസാന്ദ്രമാക്കി. പൊടിമറ്റം സെന്റ് മേരീസ് പള്ളിയുടെ ഇടവകപ്രഖ്യാപന സുവർണ്ണജൂബിലിയോടനുബന്ധിച്ച് ഒരുവർഷക്കാലമായി ഭവനങ്ങൾതോറും നടന്ന മാതാവിന്റെ തിരുസ്വരൂപ പ്രദക്ഷിണമാണ് മാതൃഭക്തി വിളിച്ചോതുന്ന ജപമാലറാലിയായി മാറിയത്.
സിഎംസി പ്രൊവിൻഷ്യൽ ഹൗസ് ചാപ്പലിലെ പ്രാർത്ഥനാശുശ്രൂഷകളോടെ ജപമാലറാലിക്ക് തുടക്കമായി. മാതാവിന്റെ തിരുസ്വരൂപം വഹിച്ച് ചെണ്ട, വാദ്യമേളങ്ങളോടെ മുത്തുക്കുടകളും കൊടികളുമേന്തി ഇടവക വിശ്വാസിസമൂഹമൊന്നാകെ ജപമാലചൊല്ലി റാലിയിൽ പങ്കുചേർന്നു. ഇടവകയിലെ 32 കൂട്ടായ്മകളിലെ ലീഡർമാരുടെ നേതൃത്വത്തിലാണ് ഇടവകാംഗങ്ങൾ പ്രാർത്ഥനാറാലിയിൽ ഭക്തിപൂർവ്വം അണിനിരന്നത്.
ജപമാലറാലി പൊടിമറ്റം സെന്റ് മേരീസ് പള്ളി കുരിശടിൽ എത്തിച്ചേർന്നപ്പോൾ വിശ്വാസിസമൂഹത്തിന്റെ പ്രാർത്ഥനകളും യാചനകളും മാതാവിന്റെ മധ്യസ്ഥതയിൽ ദൈവസന്നിധിയിലേയ്ക്കുയരുന്നതിന്റെ പ്രതീകമായി ബലൂണിൽ നിർമ്മിച്ച ജപമാലക്കൊന്തയും അന്തരീക്ഷത്തിലേയ്ക്കുയർന്നു. തുടർന്ന് ഇടവകയിൽ മുൻകാലങ്ങളിൽ സേവനമനുഷ്ഠിച്ചിരുന്ന വികാരിമാരുടെ കാർമ്മികത്വത്തിൽ സമൂഹബലിയും അർപ്പിക്കപ്പെട്ടു.
ഇന്ന് (ഞായർ) ഉച്ചകഴിഞ്ഞ് 2.30ന് ബിഷപ് എമിരറ്റസ് മാർ മാത്യു അറയ്ക്കലിന്റെ മുഖ്യകാർമ്മികത്വത്തിൽ പൊന്തിഫിക്കൽ കുർബാന അർപ്പിക്കപ്പെടും. 4.15ന് സെന്റ് മേരീസ് പള്ളിയുടെ മുഖ്യകവാടത്തിങ്കൽ സീറോ മലബാർ സഭ മേജർ ആർച്ച്ബിഷപ് കർദ്ദിനാൾ മാർ ജോർജ് ആലഞ്ചേരിയെ ഇടവകസമൂഹം സ്വീകരിക്കുന്നതും സെന്റ് മേരീസ് ഓഡിറ്റോറിയത്തിലേയ്ക്ക് ആനയിക്കുന്നതുമാണ്. ഇടവകപ്രഖ്യാപന സുവർണ്ണജൂബിലി സമാപന സമ്മേളനം കർദ്ദിനാൾ മാർ ജോർജ് ആലഞ്ചേരി ഉദ്ഘാടനം ചെയ്യും. മാർ മാത്യു അറയ്ക്കൽ അധ്യക്ഷത വഹിക്കുന്നതും ബിഷപ് മാർ ജോസ് പുളിക്കൽ ജൂബിലി സന്ദേശം നൽകുന്നതുമാണ്. കാഞ്ഞിരപ്പള്ളി രൂപത വികാരിജനറാൾ ഫാ. ജോസഫ് വെള്ളമറ്റം, വികാരി ഫാ. മാർട്ടിൻ വെള്ളിയാംകുളം, സഹവികാരി ഫാ. സിബി കുരിശുംമൂട്ടിൽ, എഫ്സിസി പ്രൊവിൻഷ്യൽ സിസ്റ്റർ അമല എഫ്സിസി, സിബിസിഐ ലെയ്റ്റി കൗൺസിൽ സെക്രട്ടറി ഷെവലിയാര് അഡ്വ.വി സി.സെബാസ്റ്റ്യൻ എന്നിവർ സംസാരിക്കും.
