കൊച്ചി: കേരളത്തനിമയുള്ള ആഘോഷങ്ങളുടെ ഓർമകളെ ഉണർത്തി സൗത്ത് ഇന്ത്യൻ ബാങ്ക് സംഘടിപ്പിച്ച 'ഒന്നിച്ചിരിക്കാം ഊഞ്ഞാലാടാം' മെഗാ സംഗമം പരിപാടിക്ക് വേൾഡ് റെക്കോർഡ്. ഒരേ വേദിയിൽ 101 ഊഞ്ഞാലുകളൊരുക്കി കൊച്ചി മറൈൻ ഡ്രൈവിൽ സംഘടിപ്പിച്ച പരിപാടിയാണ് സൗത്ത് ഇന്ത്യൻ ബാങ്കിനെ റെക്കോർഡിന് അർഹരാക്കിയത്. സൗത്ത് ഇന്ത്യൻ ബാങ്ക് എംഡിയും സിഇഒയുമായ മുരളി രാമകൃഷ്ണൻ, എക്സിക്യൂട്ടീവ് വൈസ് പ്രസിഡന്റും ഗ്രൂപ്പ് ബിസിനസ് ഹെഡുമായ കെ. തോമസ് ജോസഫ് എന്നിവർ വേൾഡ് ബുക്ക് ഓഫ് റെക്കോർഡ് ടീമിൽ നിന്ന് സർട്ടിഫിക്കേറ്റ് ഏറ്റുവാങ്ങി.
പരമ്പരാഗത ആഘോഷ കലാരൂപങ്ങളെ തനിമയോടെ അവതരിപ്പിച്ച് അവ പുതിയ തലമുറയ്ക്ക് പരിചയപ്പെടുത്തുന്നതിനും ഒരുമ ആഘോഷിക്കുന്നതിനുമാണ് സൗത്ത് ഇന്ത്യൻ ബാങ്കിന്റെ നേതൃത്വത്തിൽ ഈ പ്രത്യേക സംഗമം സംഘടിപ്പിച്ചത്.
വ്യത്യസ്തതകൾ കൊണ്ട് ഏറെ സവിശേഷമായ നിമിഷങ്ങളാണ് ഇതെന്ന് ജിസിഡിഎ ചെയർമാൻ കെ. ചന്ദ്രൻ പിള്ള പറഞ്ഞു. പൊതുജനങ്ങളെ ബാല്യകാലത്തിന്റെ ഓർമ്മകളിലേക്ക് കൂട്ടിക്കൊണ്ടുപോകുന്നതിനായി സൗത്ത് ഇന്ത്യൻ ബാങ്ക് ഏറ്റെടുത്ത ഈ പ്രയത്നങ്ങൾ പ്രശംസനീയമാണെന്നും അദ്ദേഹം പറഞ്ഞു.
ജനങ്ങൾക്കിടയിൽ ഐക്യവും സമൃദ്ധിയും പ്രോത്സാഹിപ്പിക്കുക, ഈ ഉത്സവകാലം ഒത്തൊരുമയോടെ ആഘോഷിക്കുക എന്നതുമാണ് മെഗാ സംഗമം പരിപാടിയിലൂടെ ലക്ഷ്യമിട്ടതെന്ന് സൗത്ത് ഇന്ത്യൻ ബാങ്ക് എംഡിയും സിഇഒയുമായ മുരളി രാമകൃഷ്ണൻ പറഞ്ഞു. ഊഞ്ഞാലെന്നത് ഉല്ലാസത്തിന്റെയും ആസ്വാദനത്തിന്റെയും പ്രതീകമാണ്. ഈ മെഗാ സംഗമത്തിലൂടെ എല്ലാവരെയും ബാല്യകാലസ്മരണകളിലേക്ക് കൂട്ടിക്കൊണ്ടുപോകാനായി എന്നത് സൗത്ത് ഇന്ത്യൻ ബാങ്കിനെ സംബന്ധിച്ച് ഏറെ സന്തോഷം നൽകുന്ന ഒന്നാണ് എന്നും അദ്ദേഹം കൂട്ടിച്ചേർത്തു.
പരിപാടിയുടെ മുഖ്യ ആകർഷണമായി പരമ്പരാഗത രീതിയിൽ മരവും കയറും ഉപയോഗിച്ചു നിർമ്മിച്ച ഊഞ്ഞാലുകളിൽ നിരവധി സന്ദർശകരാണ് ഉഞ്ഞാലാടിയത്. സിയാൽ സിഎഫ്ഒ ഷാജി ഡാനിയേൽ, ചലച്ചിത്രതാരം ഷീലു എബ്രഹാം, ടെലിവിഷൻ താരം സബീറ്റ ജോർജ്ജ്, സൗത്ത് ഇന്ത്യൻ ്ബാങ്ക് എച്ച് ആർ മേധാവിയും അഡ്‌മിനുമായ ടി. ആന്റോ ജോർജ്ജ് തുടങ്ങിയവർ പങ്കെടുത്തു.
പൊതുജനങ്ങൾക്കായി സൗജന്യമായി സംഘടിപ്പിച്ച പരിപാടിയിൽ ചെണ്ടമേളം, സംഗീത മേള, വിർച്ച്വൽ റിയാലിറ്റി സോൺ തുടങ്ങിയവും ഒരുക്കിയിരുന്നു.
