കൊച്ചി: തിരുവാണിയൂർ ഗ്ലോബൽ പബ്ലിക് സ്‌കൂളിലെ വിദ്യാർത്ഥികൾ നടത്തിയ ക്രോസ് റോഡ്സ് 2022 ഇന്റർ സ്‌കൂൾ സാംസ്‌കാരിക മത്സരത്തിൽ കടയിരുപ്പ് സെന്റ് പീറ്റേഴ്‌സ് സ്‌കൂൾ ഓവറോൾ ചാമ്പ്യൻഷിപ്പ് ട്രോഫി നേടി. വടുതല ചിന്മയ വിദ്യാലയമാണ് റണ്ണേഴ്‌സ് അപ്പ് ട്രോഫി നേടിയത്. ഗ്ലോബൽ പബ്ലിക് സ്‌കൂൾ സംഘടിപ്പിക്കുന്ന വാർഷിക ഇന്റർ-സ്‌കൂൾ, ക്രോസ്-ഡിസിപ്ലിനറി സാംസ്‌കാരിക പരിപാടിയാണ് ക്രോസ് റോഡ്സ്, എറണാകുളത്തും പരിസരത്തുമുള്ള 10 സ്‌കൂളുകളിൽ നിന്നായി 265 ഓളം വിദ്യാർത്ഥികൾ പരിപാടിയിൽ പങ്കെടുത്തു.
ടെലിവിഷൻ അവതാരക രഞ്ജിനി ഹരിദാസ് പരിപാടി ഉദ്ഘാടനം ചെയ്തു. വൈകീട്ട് നടന്ന ചടങ്ങിൽ മുഖ്യാതിഥി സിനിമാതാരം ശ്രുതി രാമചന്ദ്രൻ ചാമ്പ്യന്മാർക്കുള്ള ട്രോഫിയും സർട്ടിഫിക്കറ്റുകളും വിതരണം ചെയ്തു. പൈറേറ്റ്‌സ് ഓഫ് കരീബിയനിൽ നിന്നും പ്രചോദനം ഉൾക്കൊണ്ട് ഒഴുക്കെനിതുരെ നീന്തുക എന്ന പ്രമേയത്തെ ആസ്പദമാക്കിയാണ് ക്രോസ് റോഡ്സ് സംഘടിപ്പിച്ചത്. കൂടാതെ ഭാഷകൾ, ശാസ്ത്രം, സോഷ്യൽ സയൻസസ്, കൊമേഴ്‌സ്, ഹ്യുമാനിറ്റീസ്, കായികം, ആർട്ട് ആൻഡ് ഡിസൈൻ, ഐടി & റോബോട്ടിക്‌സ് തുടങ്ങി വിവിധ മേഖലകളിൽ വിദ്യാർത്ഥികൾ പ്രദർശനം സംഘടിപ്പിച്ചു.
വിവിധ സ്പോൺസർമാരിൽ നിന്നുള്ള മെഡലുകളും, സർട്ടിഫിക്കറ്റുകളും സിനിമാതാരം ശ്രുതി രാമചന്ദ്രൻ വിജയികൾക്ക് കൈമാറി. ക്രോസ് റോഡ്സ് കഴിഞ്ഞ രണ്ടു വർഷമായി ഓൺലൈനായി നടത്തുകയായിരുന്നു. സ്‌കൂൾ ചെയർമാനും ബോർഡ് ഓഫ് ട്രസ്റ്റി ഉപദേഷ്ടാവ് ലക്ഷ്മി രാമചന്ദ്രൻ, പ്രിൻസിപ്പാൾ സരിതാ ജയരാജ് എന്നിവർ സംസാരിച്ചു.
