കൊച്ചി: ക്രൈസ്തവർക്കുനേരെ രാജ്യത്തുടനീളം അരങ്ങേറുന്ന ആക്രമണങ്ങൾ മതേതര ഇന്ത്യയെ മുറിപ്പെടുത്തുന്നതാണെന്നും സർക്കാർ സംവിധാനങ്ങൾ നിഷ്‌ക്രിയത്വമവസാനിപ്പിച്ച് അടിയന്തര സമാധാന നടപടികളെടുക്കണമെന്നും കാത്തലിക് ബിഷപ്സ് കോൺഫറൻസ് ഓഫ് ഇന്ത്യ ലെയ്റ്റി കൗൺസിൽ സെക്രട്ടറി ഷെവലിയർ അഡ്വ.വി സി സെബാസ്റ്റ്യൻ അഭ്യർത്ഥിച്ചു.

ഛത്തീസ്‌ഗഢിലെ നാരായൺപൂർ, കൊണ്ടഗാവ് ആദിവാസി ജില്ലകളിൽ ഡിസംബർ ഒൻപതിന് തുടങ്ങിയ ആക്രമണങ്ങൾ ഇന്നും തുടരുകയാണ്. ഇതിന് തടയിടുവാനും സമാധാന അന്തരീക്ഷം സൃഷ്ടിക്കുവാനും ഛത്തീസ്‌ഗഢിലെ കോൺഗ്രസ് നേതൃത്വ ഭൂപേഷ് ഭാഗേൽ സർക്കാരിനായിട്ടില്ല. ഉത്തരാഖണ്ഡിലെ ഉത്തരകാശി ജില്ലയിലും യുപിയിലെ റായ്പൂർ ജില്ലയിലും ബുലന്ദ്ഷഹറിലും ക്രിസ്മസ് ദിനത്തിൽ ക്രൈസ്തവ ആരാധനാകേന്ദ്രങ്ങളും വിശ്വാസികളും ആക്രമിക്കപ്പെട്ടു. ഒക്ടോബറിൽ റൂർക്കിയിലെ സോളനിപുരത്ത് പള്ളി തകർത്തതിന്റെ തുടർച്ചയാണ് നാരായൺപൂർ ബംഗ്ലാപ്പാറയിൽ സേക്രട്ട്ഹാർട്ട് പള്ളി സായുധരായെത്തിയവർ അക്രമിച്ച് തിരുസ്വരൂപങ്ങൾ ഉൾപ്പെടെ നശിപ്പിച്ചിരിക്കുന്നത്.

മതപരിവർത്തന നിരോധന നിയമത്തിന്റെ മറവിൽ വിവിധ സംസ്ഥാനങ്ങളിൽ ആദിവാസികളെ മുൻനിർത്തി തീവ്രവാദഗ്രൂപ്പുകൾ നിയമം കൈയിലെടുത്ത് ക്രൈസ്തവർക്കുനേരെ അക്രമങ്ങൾ അഴിച്ചുവിട്ടിട്ടും സർക്കാർ സംവിധാനങ്ങൾ നിഷ്‌ക്രിയ സമീപനം സ്വീകരിക്കുന്നത് ദുഃഖകരമാണ്. അക്രമണത്തിന്റെ അനന്തരഫലമായി ഛത്തീസ്‌ഗഢിലെ മദാംനർ ഗ്രാമത്തിൽനിന്ന് ക്രൈസ്തവർ പലായനം ചെയ്തിരിക്കുന്നു. നൂറോളം അക്രമങ്ങൾ അരങ്ങേറിയിട്ടും പൊലീസ് എഫ്ഐആർ എടുത്തിട്ടില്ലെന്നുള്ള ആക്ഷേപവും നിലനിൽക്കുന്നു. ക്രൈസ്തവർക്കുനേരെയുള്ള ആക്രമണങ്ങൾക്ക് അവസാനം കണ്ടെത്തുവാൻ സംസ്ഥാന സർക്കാരുകൾ പരാജയപ്പെടുമ്പോൾ പൗരന്മാരുടെ സംരക്ഷണം ഉറപ്പുവരുത്തുവാനുള്ള ഉത്തരവാദിത്വം കേന്ദ്രസർക്കാർ നിർവ്വഹിക്കണം. മതേതര ഭാരതത്തിൽ മതവിശ്വാസത്തിന്റെ പേരിൽ ജനങ്ങളെ അക്രമിച്ചും ഭീഷണിപ്പെടുത്തിയും ക്രൂശിക്കാൻ ആരെയും അനുവദിക്കരുതെന്നും ഇന്ത്യയിലെ ക്രൈസ്തവ ന്യൂനപക്ഷ സമൂഹത്തിന് ഭരണഘടന ഉറപ്പേകുന്ന സംരക്ഷണം ലഭ്യമാക്കണമെന്നും വി സി.സെബാസ്റ്റ്യൻ ആവശ്യപ്പെട്ടു.

 

ഇന്ത്യ ലെയ്റ്റി കൗൺസിൽ