തിരുവനന്തപുരം: പ്രൊഫഷണൽ വിദ്യാർത്ഥികളെ വ്യവസായ മേഖലയുമായി അടുപ്പിക്കുന്നതിനും നവീന ആശയങ്ങൾ പങ്കുവെയ്ക്കാൻ വേദിയൊരുക്കുന്നതിനുമായി ഉന്നത വിദ്യാഭ്യാസ വകുപ്പിനു കീഴിലുള്ള അസാപ് കേരളയുടെ ചുമതലയിൽ സംഘടിപ്പിക്കുന്ന പ്രൊഫഷണൽ സ്റ്റുഡന്റ്സ് സമ്മിറ്റ് 2023 ഫെബ്രുവരി 11ന് അങ്കമാലിയിലെ അഡല്ക്‌സ് ഇന്റർനാഷണൽ കൺവെൻഷൻ സെന്ററിൽ വെച്ച് നടക്കും. പരിപാടിയുടെ ലോഗോ പ്രകാശനം ഉന്നതവിദ്യാഭാസ വകുപ്പ് മന്ത്രി ആർ ബിന്ദു അസാപ് കേരള സി എം ഡി ഉഷ ടൈറ്റസിന് നൽകി നിർവഹിച്ചു.
മൂന്നാമത് പ്രൊഫഷണൽ സ്റ്റുഡന്റ്സ് സമ്മിറ്റ് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. കോവിഡ് വാക്സിൻ ആഭ്യന്തരമായി വികസിപ്പിച്ച ആദ്യ കമ്പനിയായ ഭാരത് ബയോടെക്ക് ചെയർമാനും ശാസ്ത്രജ്ഞനുമായ ഡോ. കൃഷ്ണ എല്ല മുഖ്യാതിഥിയും പ്രഭാഷകനുമായിരിക്കും.
കേരളത്തെ ഒരു വിജ്ഞാന സമ്പദ് വ്യവസ്ഥയായി വികസിപ്പിക്കുകയാണ് സർക്കാരിന്റെ ലക്ഷ്യം. ഇതിന് പ്രൊഫഷണൽ സ്റ്റുഡന്റ്സ് സമ്മിറ്റ് സഹായകമാകും. പ്രൊഫഷണൽ വിദ്യാർത്ഥികൾക്ക് തങ്ങളുടെ പഠന മേഖലയുമായി ബന്ധപ്പെട്ട വ്യവസായ, അക്കാഡമിക് പ്രമുഖരുമായി ആശയവിനിമയം നടത്താനും പുതിയ അറിവുകൾ നേടാനും ഈ സമ്മേളനം വേദിയൊരുക്കും. വിജ്ഞാന കൈമാറ്റവും പങ്കുവയ്ക്കലും നടക്കുന്ന ഇത്തരം സംരംഭങ്ങളെ വളരെ ഉത്സാഹത്തോടെ തന്നെ സർക്കാർ പ്രോത്സാഹിപ്പിക്കുകയും വിദ്യാർത്ഥികളുടെ സംഭവാനകളെ സ്വാഗതം ചെയ്യുകയും ചെയ്യുമെന്ന് മന്ത്രി ആർ ബിന്ദു പറഞ്ഞു.
പ്രൊഫഷണൽ വിദ്യാർത്ഥികളുടെ കേരളത്തിലെ ഏറ്റവും വലിയ സമ്മേളനമാണിത്. ഉന്നത വിദ്യാഭ്യാസ വകുപ്പും സംസ്ഥാന ആസൂത്രണ ബോർഡും ചേർന്ന് 2019ലാണ് ആദ്യമായി പ്രൊഫഷണൽ സ്റ്റുഡന്റ്സ് സമ്മിറ്റിന് തുടക്കമിട്ടത്. എഞ്ചിനീയറിങ്, മെഡിസിൻ, അഗ്രികൾചർ, ലോ, മാനേജ്മെന്റ് എന്നീ മേഖലകളിലെ 14 ശാഖകളിൽ വിവിധ കോഴ്സുകൾ പഠിക്കുന്ന 2000 വിദ്യാർത്ഥികളാണ് സമ്മേളനത്തിൽ പങ്കെടുക്കുക. രാജ്യാന്തര രംഗത്ത് പ്രശസ്തരായ വ്യവസായ പ്രമുഖരും അക്കാഡമിക് വിദഗ്ധരും വിവിധ സെഷനുകളിലായി വിദ്യാർത്ഥികളുമായി സംവദിക്കും.
