കാഞ്ഞിരപ്പള്ളി: മുണ്ടക്കയം മെഡിക്കൽ ട്രസ്റ്റ് ഹോസ്പിറ്റലിലെ കമ്മ്യൂണിറ്റി മെഡിസിൻ വിഭാഗത്തിന്റെയും ബാംഗ്ലൂർ സെന്റ് ജോൺസ് നാഷണൽ അക്കാദമി ഓഫ് ഹെൽത്ത് സയൻസിന്റെയും സംയുക്ത ആഭിമുഖ്യത്തിൽ റൂറൽ റിസർച്ച് ആൻഡ് ഡെവലപ്മെന്റ് സെന്റർ ആരംഭിച്ചു. സാമൂഹിക പ്രതിബദ്ധതയോടെ കൂടുതൽ സേവനങ്ങൾ സമൂഹത്തിൽ നൽകുക എന്ന ഉദ്ദേശത്തോടെയാണ് ഈ റിസർച്ച് സെന്റർ സ്ഥാപിതമായിരിക്കുന്നത്. രോഗി പരിചരണത്തോടൊപ്പം തന്നെ പഠനങ്ങളും, ജനങ്ങളെ രോഗങ്ങളെക്കുറിച്ചും മരുന്നുകളെക്കുറിച്ചും പ്രത്യേകിച്ച്, ജീവിതശൈലി രോഗങ്ങളെക്കുറിച്ചും കൂടുതൽ ബോധവാന്മാരാക്കുകയും അതിനെ സംബന്ധിക്കുന്ന വിശദമായ പഠനങ്ങൾ നേഴ്സിങ് വിദ്യാർത്ഥിനികളുടെ സഹായത്തോടെ നടത്തുക എന്ന ഉദ്ദേശത്തോടെയാണ് ഈ സെന്റർ സ്ഥാപിതമാകുന്നത്.
മുണ്ടക്കയം മെഡിക്കൽ ട്രസ്റ്റ് ഹോസ്പിറ്റലിൽ വെച്ച് നടന്ന ചടങ്ങിൽ ഗ്രാമീണ മേഖലയിലെ മനുഷ്യന്റെ സമഗ്ര വളർച്ചയെ സഹായിക്കുന്ന വിധത്തിൽ പ്രവർത്തന നിരതമാകാൻ ഈ സെന്ററിന് കഴിയട്ടെ എന്ന ആശംസകളോടെ എംജി യൂണിവേഴ്സിറ്റി വൈസ് ചാൻസിലർ പ്രൊഫസർ ഡോക്ടർ സാബു തോമസ് എം എംടി റൂറൽ റിസർച്ച് സെന്റർ ഉദ്ഘാടനം ചെയ്തു. കാഞ്ഞിരപ്പള്ളി രൂപത വികാരി ജനറലും എം എം റ്റി ഹോസ്പിറ്റൽ ട്രസ്റ്റ് പ്രസിഡന്റുമായ റവ ഫാദർ ബോബി അലക്സ് മണ്ണംപ്ലാക്കൽ അധ്യക്ഷത വഹിച്ചു. ബാംഗ്ലൂരിലെ സെന്റ് ജോൺസ് നാഷണൽ അക്കാദമി ഓഫ് ഹെൽത്ത് സയൻസിലെ കമ്മ്യൂണിറ്റി ഹെൽത്ത് വിഭാഗം മേധാവി ഡോക്ടർ ബോബി
ജോസഫ്, നാഷണൽ ഇൻസ്റ്റിറ്റ്യൂട്ട് ഓഫ് അഡ്വാൻസെഡ് സ്റ്റഡീസിലെ പ്രിൻസിപ്പൽ സൈന്റിസ്റ്റ് ഡോക്ടർ ജലീൽ യൂ സി, മുണ്ടക്കയം മെഡിക്കൽ ട്രസ്റ്റ് ഹോസ്പിറ്റൽ മെഡിക്കൽ സൂപ്രണ്ട് ഡോക്ടർ കെ എം മാത്യു തുടങ്ങിയവർ സംസാരിച്ചു.
