കൊച്ചി: കാഴ്ച പരിമിതരുടെ ആദ്യ വനിതാ ക്രിക്കറ്റ് ഇന്ത്യൻ ടീമിൽ മലയാളിയായ സാന്ദ്രാ ഡേവിസ് ഇടം പിടിച്ചു. തൃശൂർ സ്വദേശിയായ സാന്ദ്ര ഡേവിസ് കെ ആണ് 17 അംഗ ഇന്ത്യൻ ക്രിക്കറ്റ് ടീമിലേക്ക് തെരഞ്ഞെടുക്കപ്പെട്ടത്. ഭോപ്പാലിൽ നടന്ന സെലക്ഷൻ ട്രയൽസിലെ പ്രകടനമാണ് സാന്ദ്രക്ക് ദേശീയ ടീമിലേക്കുള്ള വഴി തുറന്നത്. പൂക്കോട് സ്വദേശിയായ സാന്ദ്ര നിലവിൽ ഒറ്റപ്പാലം എൻഎസ്എസ് കോളേജിൽ ബിഎഡ് വിദ്യാർത്ഥിയാണ്.

സാധ്യതാ പട്ടികയിൽ രണ്ട് മലയാളി താരങ്ങളാണുണ്ടായിരുന്നതെങ്കിലും സാന്ദ്രയാണ് 17 അംഗ ടീമിൽ ഇടം പിടിച്ചത്. 38 അംഗ സാധ്യതാ പട്ടികയിൽ നിന്നുമാണ് 17 അംഗ ടീമിനെ തെരഞ്ഞെടുത്തത്. ഇതാദ്യമായാണ് കാഴ്ച പരിമിതരുടെ വനിതാ ഇന്ത്യൻ ക്രിക്കറ്റ് ടീം രൂപീകരിക്കുന്നത്.മധ്യപ്രദേശുകാരിയായ സുഷമ പാട്ടേൽ ആണ് ടീം ക്യാപ്റ്റൻ. കർണാടകയിൽ നിന്നുള്ള നീലപ്പ ഹരിജൻ ആണ് വൈസ് ക്യാപ്റ്റൻ. ഹർമൻ പ്രീത് കൗറാണ് ഈ വർഷത്തെ വനിതാ ക്രിക്കറ്റ് ടീമിന്റെ ബ്രാൻഡ് അംബാസിഡർ. ഏപ്രിൽ 25 മുതൽ 30 വരെ കാട്മണ്ഠുവിൽ നടക്കുന്ന നേപ്പാളിനെതിരെയുള്ള പരമ്പരയിലാണ് കാഴ്ചപരിമിതരുടെ വനിതാ ഇന്ത്യൻ ക്രിക്കറ്റ് ടീം അരങ്ങേറുന്നത്. ഇതിന്റെ മുന്നോടിയായി ഏപ്രിൽ 17 മുതൽ 22 വരെ ഗുരുഗ്രാമിലെ ശാരദാ സ്പോർട്സ് ക്യൂബ് ഫൗണ്ടേഷനിൽ ടീം പരിശീലനം നടത്തും.

ആഭ്യന്തര ക്രിക്കറ്റിൽ കേരളത്തിന് മികച്ച പ്രകടനം നടത്തിയ സാന്ദ്ര ഇന്ത്യൻ ടീമിൽ ഇടം നേടിയത് സംസ്ഥാനത്തെ കാഴ്ചപരിമിതരുടെ ക്രിക്കറ്റിന് ഏറെ ഊർജ്ജം പകരുന്നതിനൊപ്പം കാഴ്ചപരിമിതരായ പെൺകുട്ടികൾക്ക് പ്രചോദനമാകുന്നതാണെന്ന് ക്രിക്കറ്റ് അസോസിയേഷൻ ഫോർ ബ്ലൈൻഡ് ഇൻ കേരള ജനറൽ സെക്രട്ടറി രജനീഷ് ഹെൻട്രി അറിയിച്ചു.

 

ന്ദ്രാ ഡേവിസ്