തിരുവനന്തപുരം, 18 ഏപ്രിൽ 2023: കേരള കോഓപ്പറേറ്റീവ് മിൽക്ക് മാർക്കറ്റിങ് ഫെഡറേഷന്റെ ഉടമസ്ഥതയിലുള്ള മിൽമ ബ്രാൻഡ് കേരള മുഖ്യമന്ത്രി പിണറായി വിജയൻ റീലോഞ്ച് ചെയ്തു.
ഉപഭോക്താക്കളുടെ മുൻഗണനകളും ജനസംഖ്യാമാറ്റങ്ങളുടെയും അടിസ്ഥാനത്തിൽ മിൽമ ഉൽപ്പന്നങ്ങളുടെ വിപണനം മെച്ചപ്പെടുത്തുന്നതിന്റെ ഭാഗമായി ദേശീയ ക്ഷീരവികസന ബോർഡും (എൻ ഡി ഡി ബി) സംസ്ഥാന ക്ഷീരവികസന, മൃഗസംരക്ഷണ വകുപ്പും നടത്തിയ പഠന റിപ്പോർട്ടിന്റെ അടിസ്ഥാനത്തിലാണ് മിൽമ റീലോഞ്ച് ചെയ്യാനുള്ള നടപടി ആരംഭിച്ചത്. എൻഡിഡിബിയുടെ പിന്തുണയിലാണ് റീബ്രാൻഡിങ് നടപ്പിൽ വരുത്തുക.
ചെറിയ കാലയളവിൽ ബ്രാൻഡിങ് ഭംഗിയാക്കി പൂർത്തീകരിച്ച മിൽമയെ എൻഡിഡിബി ചെയർമാൻ മീനേഷ് ഷാ അഭിനന്ദിച്ചു. രാജ്യത്തെ മറ്റ് സഹകരണ ഉൽപ്പന്നങ്ങളും മിൽമയുടെ ശ്രദ്ധേയമായ ബ്രാൻഡിങ് ശ്രമങ്ങൾ പിൻപറ്റുകയും പ്രചോദനം ഉൾക്കൊള്ളുകയും ചെയ്യുമെന്ന് അദ്ദേഹം പ്രതീക്ഷ പ്രകടിപ്പിച്ചു. സമീപ വർഷങ്ങളിൽ വിപണനരംഗത്ത് എൻഡിഡിബി നടത്തിയ ഇടപെടലുകളുടെ ഫലങ്ങളെ എൻഡിഡിബി ചെയർമാൻ എടുത്തുപറഞ്ഞു. മിൽമ ഉൽപ്പന്നങ്ങൾ ഇപ്പോൾ നേരിടുന്ന വെല്ലുവിളികൾ മറികടക്കുന്നതിന് സഹായം നൽകുന്നതിൽ എൻ ഡി ഡി ബി അഭിമാനിക്കുന്നതായും അദ്ദേഹം പറഞ്ഞു. മനുഷ്യവിഭവശേഷിക്കുപുറമെ 56 ലക്ഷം രൂപയുടെ ധനസഹായവും പദ്ധതിക്കായി എൻഡിഡിബി അനുവദിച്ചു.
തിരുവനന്തപുരം ഇടപ്പഴഞ്ഞിയിലെ ആർഡിആർ കൺവെൻഷൻ സെന്ററിൽ സംഘടിപ്പിച്ച ചടങ്ങിൽ കേരള മൃഗസംരക്ഷണ- ക്ഷീരവികസന വകുപ്പ് മന്ത്രി ചിഞ്ചുറാണി, ഗതാഗതവകുപ്പ് മന്ത്രി ആന്റണി രാജു, പ്രതിപക്ഷനേതാവ് വിഡി സതീശൻ എംഎൽഎ, തിരുവനനന്തപുരം കോർപ്പറേഷൻ മേയർ ആര്യ രാജേന്ദ്രൻ, ശശി തരൂർ എംപി, ഡിഎഎച്ച്ഡി സെക്രട്ടറി പ്രണബ് ജ്യോതി, മിൽമ ചെയർമാൻ കെ.എസ് മണി എന്നിവർ സന്നിഹിതരായിരുന്നു.
