കൊച്ചി: കത്തോലിക്കാ സഭാസേവനത്തിന്റെയും ശുശ്രൂഷകളുടെയും മഹനീയവും മഹത്തരവുമായ അല്മായ മാതൃകയാണ് അഡ്വ.ജോസ് വിതയത്തിലെന്ന് സീറോ മലബാർ സഭ കൂരിയ ബിഷപ മാർ സെബാസ്റ്റ്യൻ വാണിയപ്പുരയ്ക്കൽ.
കേരള കത്തോലിക്കാ മെത്രാൻ സമിതി ആസ്ഥാനമായ കൊച്ചി പാലാരിവട്ടം പാസ്റ്ററൽ ഓറിയന്റേഷൻ സെന്ററിൽ ചേർന്ന അഡ്വ.ജോസ് വിതയത്തിൽ അനുസ്മരണ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു മാർ വാണിയപ്പുരയ്ക്കൽ.
എന്നും സഭയോടൊപ്പം ചേർന്നുനിന്ന് പ്രതിസന്ധികളിൽ തളരാതെ പ്രവർത്തിക്കുകയും മികച്ച സംഘടനാ പാടവത്തിലൂടെയും നിസ്വാർത്ഥ സേവനങ്ങളിലൂടെയും അനേകായിരങ്ങൾക്ക് നന്മകൾ വർഷിക്കുകയും ചെയ്ത വിതയത്തിലിന്റെ സ്മരണ എക്കാലവും നിലനിൽക്കുമെന്നും മാർ വാണിയപ്പുരയ്ക്കൽ പറഞ്ഞു.
സംസ്ഥാന ലോകായുക്ത ജസ്റ്റിസ് സിറിയക് ജോസഫ്, അഡ്വ.ജോസ് വിതയത്തിൽ അനുസ്മരണ പ്രഭാഷണം നടത്തി. മാതൃകായോഗ്യനായ അല്മായ പ്രേഷിതനായിരുന്നു അഡ്വ.ജോസ് വിതയത്തിലെന്ന് ജസ്റ്റിസ് സിറിയക് ജോസഫ് അനുസ്മരിച്ചു. കെസിബിസി ഡെപ്യൂട്ടി സെക്രട്ടറി ഫാ. ജേക്കബ് ജി. പാലയ്ക്കപ്പിള്ളി അധ്യക്ഷത വഹിച്ചു.സിബിസിഐ ലെയ്റ്റി കൗൺസിൽ സെക്രട്ടറി ഷെവലിയാർ അഡ്വ.വി സി.സെബാസ്റ്റ്യൻ ആമുഖപ്രഭാഷണം നടത്തി.
മുൻ കേന്ദ്ര ന്യൂനപക്ഷ കമ്മീഷൻ മെമ്പർ വി.വി.അഗസ്റ്റിൻ, മുൻ അഡീഷണൽ ചീഫ് സെക്രട്ടറി എംപി.ജോസഫ് ഐഎഎസ്, സീറോ മലബാർ സഭ അല്മായ ഫോറം സെക്രട്ടറി ടോണി ചിറ്റിലപ്പള്ളി, സീറോ മലബാർ സഭ പ്രോലൈഫ് അപ്പസ്തോലേറ്റ് സെക്രട്ടറി സാബു ജോസ് എന്നിവർ സംസാരിച്ചു.
ഫോട്ടോ അടിക്കുറിപ്പ്:- കൊച്ചി പാലാരിവട്ടം പാസ്റ്ററൽ ഓറിയന്റേഷൻ സെന്ററിൽ ചേർന്ന അഡ്വ.ജോസ് വിതയത്തിൽ അനുസ്മരണ സമ്മേളനം സീറോ മലബാർ സഭ കൂരിയ ബിഷപ് മാർ സെബാസ്റ്റ്യൻ വാണിയപ്പുരയ്ക്കൽ ഉദ്ഘാടനം ചെയ്യുന്നു. സിബിസിഐ ലെയ്റ്റി കൗൺസിൽ സെക്രട്ടറി ഷെവലിയാർ അഡ്വ.വി സി.സെബാസ്റ്റ്യൻ, കെസിബിസി ഡെപ്യൂട്ടി സെക്രട്ടറി ഫാ. ജേക്കബ് ജി. പാലയ്ക്കപ്പിള്ളി, ജസ്റ്റിസ് സിറിയക് ജോസഫ്, വി.വി.അഗസ്റ്റിൻ, എംപി.ജോസഫ് ഐഎഎസ്, ടോണി ചിറ്റിലപ്പള്ളി, സാബു ജോസഫ് എന്നിവർ സമീപം
