കൊച്ചി: വേറിട്ട ഓണാഘോഷത്തിന് ആലുവയിലെ ഫെഡറൽ ബാങ്ക് ഹെഡ് ഓഫീസ് സാക്ഷ്യം വഹിച്ചു. കഥകളി, മോഹിനിയാട്ടം, പൂതൻ, കളരിപ്പയറ്റ്, തെയ്യം, ശിങ്കാരി മേളം എന്നിവ മാറ്റുകൂട്ടിയ ഓണാഘോഷത്തിന് ആവേശം പകരാൻ റോബോട്ട് ആനയും എത്തിയിട്ടുണ്ടായിരുന്നു.

ഹെഡ് ഓഫീസിലെ ആയിരത്തോളം വരുന്ന ജീവനക്കാരോടൊപ്പം എംഡിയും സി ഇ ഒയുമായ ശ്യാം ശ്രീനിവാസൻ, എക്സിക്യൂട്ടീവ് ഡയറക്ടർ ശാലിനി വാര്യർ, സി എച്ച് ആർ ഒ അജിത് കുമാർ കെ കെ, ബ്രാഞ്ച് ബാങ്കിങ് ഹെഡ് നന്ദകുമാർ വി തുടങ്ങിയ മുതിർന്ന ഉദ്യോഗസ്ഥരും ഓണാഘോഷത്തിൽ പങ്കുചേർന്നു.

ജീവനക്കാരുടെ നേതൃത്വത്തിൽ ഗാനാലാപനം, നൃത്തം തുടങ്ങിയവ അവതരിപ്പിച്ചു. ചിങ്ങം ഒന്ന് മുതൽ സംഘടിപ്പിച്ച വിവിധ കലാ കായിക മത്സരങ്ങളിലെ വിജയികൾക്കുള്ള സമ്മാനദാനവും നിർവഹിച്ചു.