കൊച്ചി: ലോക ബ്ലൈൻഡ് ഗെയിംസിൽ കിരീടം നേടിയ കാഴ്ചപരിമിതരുടെ ഇന്ത്യൻ വനിത ക്രിക്കറ്റ് ടീമിൽ അംഗമായ സാന്ദ്രാ ഡേവിസിനെ കേരള ബ്ലൈൻഡ് ക്രിക്കറ്റ് അസോസിയേഷൻ ആദരിച്ചു. ക്രിക്കറ്റ് അസോസിയേഷൻ ഫോർ ബ്ലൈൻഡ് ഇൻ കേരളയുടെ പത്താം വാർഷിക ആഘോഷ വേളയിലാണ് സാന്ദ്രയെ ആദരിച്ചത്. കേരള ബ്ലൈൻഡ് ക്രിക്കറ്റ് ടീമിന്റെ സ്പോൺസർമാരായ യുഎസ്‌ടിയുടെ ഡെവലപ്മെന്റ് സെന്റർ ഓപ്പറേഷൻസ് ഗ്ലോബൽ ഹെഡ് സുനിൽ ബാലകൃഷ്ണൻ സാന്ദ്രക്ക് മൊമന്റോ സമ്മാനിച്ചു. സാന്ദ്രക്ക് പുറമെ ലോക ബ്ലൈൻ്ഡ് ഗെയിംസിൽ വെങ്കലം നേടിയ നിബിൻ മാത്യു, ലോക ബ്ലൈൻഡ് ഗെയിംസിൽ അംപയർ ആയിരുന്ന അനീഷ് അരവിന്ദ് തുടങ്ങിയവരേയും ആദരിച്ചു.
സിഎബികെയുടെ പത്താം വാർഷികത്തിന്റെ ഭാഗമായി പുറത്തിറക്കിയ സോവനീറിന്റെ പ്രകാശനം പ്രശസ്ത ക്രിക്കറ്റ് പരിശീലകൻ പി ബാലചന്ദ്രൻ നിർവഹിച്ചു. സിഎബികെ പ്രസിഡന്റ് രജനീഷ് ഹെൻ്ട്രി, സ്‌കോർ ഫൗണ്ടേഷൻ സിഇഒയും ഭിന്നശേഷി ആക്ടിവിസ്റ്റുമായ ജോർജ് എബ്രഹാം എന്നിവർ ഏറ്റുവാങ്ങി. ക്രിക്കറ്റ് അസോസിയേഷൻ ഫോർ ബ്ലൈൻഡ് ഇൻ ഇന്ത്യ ചെയർമാൻ ജി കെ മഹന്ദേഷ്, മാധ്യമപ്രവർത്തക ജീന പോൾ, സിഎബികെ ജനറൽ സെക്രട്ടറി കെ ആർ അനിൽകുമാർ, സിനിമാ താരം അശ്വതി മനോഹരൻ, നർത്തകി സന്ധ്യ മനോജ് എന്നിവർ പങ്കെടുത്തു.
