പത്തനാപുരം: കേരളത്തിന്റെ വികസനമുന്നേറ്റത്തിന് കരുത്തു പകരുന്നവരാണ് പ്രവാസികളെന്ന് . പത്തനാപുരം ഗാന്ധിഭവനിൽ വേൾഡ് മലയാളി കൗൺസിൽ ഗ്ലോബൽ കമ്മിറ്റി സംഘടിപ്പിച്ച കേരളപ്പിറവി ദിനാഘോഷവും പ്രവർത്തനോദ്ഘാടനവും ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. കേരളത്തിലിന്ന് 35 ലക്ഷത്തിലധികം പ്രവാസികളുണ്ട്. മലയാളികളിൽ പത്തിൽ ഒരാൾ പ്രവാസിയാണ്. കേരളമിന്ന് കൈവരിച്ച നേട്ടങ്ങളിൽ പ്രവാസികൾ വഹിച്ച പങ്ക് വളരെ പ്രധാനപ്പെട്ടതാണ്. വിവിധ രാജ്യങ്ങളിൽ പ്രതിസന്ധികളെ അതിജീവിച്ച് ഉപജീവനമാർഗം കണ്ടെത്തുവാൻ അവരെ പ്രാപ്തമാക്കിയത് നമ്മുടെ മികച്ച വിദ്യാഭ്യാസവും സാങ്കേതികവൈഗദ്ധ്യവും അദ്ധ്വാനിക്കാനുള്ള മനസ്സുംകൊണ്ടാണ്.

പ്രവാസികളുടെ പ്രയാസമേറിയ ജീവിതത്തിന് ഇടയിലും ജന്മനാടിനോടുള്ള കരുതലും അകമഴിഞ്ഞ സഹകരണവും നമ്മുടെ നാടിന് കരുത്ത് പകരുന്നതാണ്. വേൾഡ് മലയാളി കൗൺസിൽ കേരളത്തിന്റെ നന്മയ്ക്ക്ക്കായി പ്രവർത്തിക്കുന്നത് അഭിനന്ദനാർഹമാണെന്നും പ്രതിസന്ധിയുടെ കാലത്ത് പകർന്ന കരുതൽ മറക്കുവാൻ കഴിയില്ലെന്നും ജെ. ചിഞ്ചു റാണി പറഞ്ഞു.

ഗ്ലോബൽ പ്രസിഡന്റ് തോമസ് മൊട്ടയ്ക്കൽ അധ്യക്ഷത വഹിച്ചു. ബിസിനസ് ഫോറം ചെയർമാനും ജനറൽ കൺവീനറുമായ ജെയിംസ് കൂടൽ സ്വാഗതം ആശംസിച്ചു.

വിവിധ ഫോറങ്ങളുടെ ഉദ്ഘാടനം എൻ. കെ. പ്രേമചന്ദ്രൻ എംപിയും നവീകരിച്ച ലോഗോ പ്രകാശനം മാണി സി. കാപ്പൻ എംഎൽഎയും ജീവകാരുണ്യ പ്രവർത്തനങ്ങളുടെ ഉദ്ഘാടനം ഡോ. മരിയ ഉമ്മനും നിർവഹിച്ചു. എഴുത്തുകാരൻ പെരുമ്പടവും ശ്രീധരൻ കേരളപ്പിറവി സന്ദേശം നൽകി. മുന്മന്ത്രിയും കവിയുമായി പന്തളം സുധാകരൻ മുഖ്യ പ്രഭാഷണം നടത്തി. ചടങ്ങിൽ ധനലക്ഷ്ണി ബാങ്ക് ചെയർമാൻ കലഞ്ഞൂർ മധു, ഗാന്ധിഭവൻ ഫൗണ്ടറും മാനേജിങ് ട്രസ്റ്റിയുമായ പുനലൂർ സോമരാജൻ എന്നിവരെ ആദരിച്ചു.

വനിതാ കമ്മിഷൻ മുൻ അംഗം ഷാഹിദ കമാൽ, അഡൈ്വസറി ബോർഡ് ചെയർമാൻ ടി. പി. വിജയൻ, ഗ്ലോബൽ ജനറൽ സെക്രട്ടറി ദിനേശ് നായർ, ഗ്ലോബൽ ട്രഷറർ ഷാജി മാത്യു, ഗ്ലോബൽ എത്തിക് കമ്മിറ്റി ചെയർമാൻ പോൾ പാറപ്പള്ളി, പരിസ്ഥിതി ഫോറം ചെയർമാൻ ജോർജ് കുളങ്ങര, ഗ്ലോബൽ സെക്രട്ടറി അഡ്വ. ശിവൻ മഠത്തിൽ, ഗ്ലോബൽ വൈസ് ചെയർപേഴ്‌സൺ തങ്കമണി ദിവാകരൻ, ഗ്ലോബൽ വൈസ് ചെയർമാൻ ജോസഫ് കല്യാൻ, ഗ്ലോബൽ സെക്രട്ടറി അഡ്വ. വിജയചന്ദ്രൻ, ട്രാവൻകൂർ പ്രസിഡന്റ് ആർ. വിജയൻ, വിമൻസ് ഫോറം പ്രസിഡന്റ് സലീന മോഹൻ, ഗ്ലോബൽ വിമൻസ് ഫോറം വൈസ് പ്രസിഡന്റ് മോളി സ്റ്റാൻലി, ഇന്ത്യ റീജിയൻ ട്രഷറർ രാമചന്ദ്രൻ പേരാമ്പ്ര, രാജേഷ് ജോണി, തോമസ് ലൂയിസ്, ജോസഫ് ജെ പെരുനിലം, കിഷോർ സെബാസ്റ്റ്യൻ, ജോസ് പുതുക്കാടൻ എന്നിവർ പ്രസംഗിച്ചു.


ലോക പ്രശസ്ത മാന്ത്രികൻ സാമ്രാജിന്റെ മാജിക്ക് ഷോ അരങ്ങേറി. തുടർന്ന് തിരുവനന്തപുരം ഭരതക്ഷേത്രയിലെ കലാകാരികൾ അവതരിപ്പിച്ച നൃത്തോത്സവം, നാടൻപാട്ട് കലാകാരൻ ആദർശി ചിറ്റാറും സംഘവും അവതരിപ്പിച്ച പാട്ടുത്സവം എന്നിവ അരങ്ങേറി