കാത്തിരിപ്പിന് അവസാനമാകുന്നു; 'ഭീഷ്മ പർവ'ത്തിന്റെ റിലീസ് പ്രഖ്യാപിച്ച് മമ്മൂട്ടി; ചിത്രമെത്തുക ഫെബ്രുവരിയിൽ

പ്രേക്ഷകർ ആകാംക്ഷയോടെ കാത്തിരിക്കുന്ന ചിത്രമാണ് മമ്മൂട്ടിയുടെ 'ഭീഷ്മ പർവം' അമൽ നീരദിന്റെ സംവിധാനത്തിലുള്ള ചിത്രം സ്‌റ്റൈലിഷായിരിക്കുമെന്ന് ഇതുവരെ പുറത്തിറങ്ങിയ പോസ്റ്ററുകൾ തെളിയിക്കുന്നു. കഥാപാത്രങ്ങളെ പരിചയപ്പെടുത്തി കൊണ്ടുള്ള ഓരോ പോസ്റ്ററും മമ്മൂട്ടി തന്നെയാണ് ഷെയർ ചെയ്തിരുന്നതും. ഇപോഴിതാ 'ഭീഷ്മ പർവം' എന്ന ചിത്രത്തിന്റെ റിലീസ് പ്രഖ്യാപിച്ചിരിക്കുകയാണ് മമ്മൂട്ടി.

അടുത്ത വർഷം ഫെബ്രുവരി 24നാണ് 'ഭീഷ്മ പർവം' റിലീസ് ചെയ്യുക. ഗ്യാങ്സ്റ്റർ ഡ്രാമ വിഭാഗത്തിൽ പെടുന്ന ചിത്രത്തിൽ 'ഭീഷ്മ വർധൻ' എന്ന കഥാപാത്രത്തെയാണ് മമ്മൂട്ടി അവതരിപ്പിക്കുന്നത്. ബിഗ് ബിയുടെ തുടർച്ചയായ 'ബിലാൽ' ആണ് ചെയ്യാനിരുന്നതെങ്കിലും കോവിഡ് പശ്ചാത്തലത്തിൽ 'ഭീഷ്മ പർവ്വം' പ്രഖ്യാപിക്കുകയായിരുന്നു.

തബു, ഫർഹാൻ ഫാസിൽ, ഷൈൻ ടോം ചാക്കോ, ദിലീഷ് പോത്തൻ, അബു സലിം, പത്മരാജ് രതീഷ്, ഷെബിൻ ബെൻസൺ, ലെന, ശ്രിന്ധ, ജിനു ജോസഫ്, വീണ നന്ദകുമാർ, ഹരീഷ് പേരടി, അനസൂയ ഭരദ്വാജ്, നദിയ മൊയ്തു, മാല പാർവ്വതി തുടങ്ങി വലിയ താരനിരയാണ് ചിത്രത്തിൽ അണിനിരന്നിരിക്കുന്നത്.

അമൽ നീരദ് തന്നെയാണ് ചിത്രം നിർമ്മിക്കുന്നത്. അമൽ നീരദ് പ്രൊഡക്ഷൻസിന്റെ ബാനറിലാണ് നിർമ്മാണം. എ ആൻഡ് എയാണ് ചിത്രത്തിന്റെ വിതരണം. വിവേക് ഹർഷൻ ആണ് ചിത്രത്തിന്റെ ചിത്രസംയോജനം.

കൊച്ചിയാണ് 'ഭീഷ്മ പർവം' ചിത്രത്തിന്റെ ലൊക്കേഷൻ. സുഷിൻ ശ്യാം ആണ് ചിത്രത്തിന്റെ സംഗീത സംവിധായകൻ. ആനന്ദ് സി ചന്ദ്രനാണ് ചിത്രത്തിന്റെ ഛായാഗ്രാഹണം നിർവഹിക്കുന്നത്.അമൽ നീരദും ദേവദത്ത് ഷാജിയും ചേർന്നാണ് 'ഭീഷ്മ പർവ'ത്തിന്റെ തിരക്കഥ എഴുതിയിരിക്കുന്നത്.