ന്യൂപോർട്ട്: ഈ മാസം 24ന് ബർമിങ്ഹാമിൽ നടന്ന യുക്മ നാഷണൽ ഇലക്ഷനിൽ വച്ച് യുക്മ നാഷണൽ ജോയിന്റ് സെക്രട്ടറിയായി തെരഞ്ഞെടുക്കപ്പെട്ട ബിജു പന്നിവേലിലിന് അഭിനന്ദന പ്രവാഹം. യുക്മ വെയ്ൽസ് റീജിയണിലെ ന്യൂപോർട്ട് കേരള കമ്മ്യൂണിറ്റിയിൽ നിന്നുള്ള പ്രതിനിധിയായ ബിജു തോമസ് പന്നിവേലിൽ എതിരില്ലാതെയാണ് ദേശീയ ജോയിന്റ് സെക്രട്ടറി പദത്തിലേക്ക് തെരഞ്ഞെടുക്കപ്പെട്ടത്. പല സ്ഥാനങ്ങളിലേക്കും അത്യന്തം വാശിയേറിയ മത്സരം തന്നെ നടന്നപ്പോൾ മൃദുഭാഷിയും സൗമ്യനുമായ ബിജുവിന്റെ കാര്യത്തിൽ ആർക്കും എതിരഭിപ്രായമുണ്ടായിരുന്നില്ല.

കോട്ടയം ജില്ലയിലെ കടുത്തുരുത്തി സ്വദേശിയായ ബിജു പന്നിവേലിൽ 1982-91 കാലഘട്ടത്തിൽ കടുത്തുരുത്തി എംഎൽഎ ആയിരുന്ന പി. സി. തോമസിന്റെ സീമന്ത പുത്രനാണ്. കല്ലറ എൻ.എസ്.എസ് ഹൈസ്‌കൂളിൽ പഠിക്കുമ്പോൾ സ്‌കൂൾ കൗൺസിൽ ചെയർമാനായി തുടക്കം കുറിച്ച ബിജു, വിദ്യാർത്ഥി-യുവജന സംഘടനാ പ്രവർത്തനങ്ങളിൽ സജീവമായിരുന്നു. മാന്നാനം കെ. ഇ കോളേജ്, കുറവിലങ്ങാട് ദേവമാതാ കോളേജ് എന്നിവിടങ്ങളിൽ നിന്നും വിദ്യാഭ്യാസം പൂർത്തിയാക്കിയ ബിജു പൂണെ യൂണിവേഴ്‌സിറ്റിയിൽ നിന്നും സോഷ്യൽവർക്കിൽ മാസ്‌റ്റേർസ് ബിരുദവും ഹോസ്പിറ്റൽ മാനേജ്‌മെന്റിൽ പി.ജി. ഡിപ്ലോമയും നേടി. കോട്ടയം സോഷ്യൽ സർവീസ് സൊസൈറ്റിയുടെ കമ്മ്യൂണിറ്റി ഡെവലപ്പ്‌മെന്റ് പ്രൊജക്റ്റ് കോർഡിനേറ്റർ ആയും പിന്നീട് അഞ്ചു വർഷക്കാലം ഖത്തറിലും ജോലി ചെയ്തതിനു ശേഷമാണ് 2002 ൽ കുടുംബ സമേതം യുകെ യിലെത്തിയത്.

വെയിൽസിലെ പ്ലാസ്ഗല്ലർ കെയർ ഗ്രൂപ്പിന്റെ അഡ്‌മിനിസ്‌ട്രേഷൻ സെക്ഷനിലും. ഗ്വെന്റ് കൗണ്ടി വോളന്ററി കൗൺസിലിൽ കമ്മ്യൂണിറ്റി ഡെവലപ്പ്‌മെന്റ് വർക്കറായും ജോലി ചെയ്തിട്ടുണ്ട്. 2012 ൽ ന്യൂപോർട്ട് കേരള കമ്മ്യൂണിറ്റിയുടെ സെക്രട്ടറിയായി സേവനമനുഷ്ടിച്ചു. 2013 ൽ യുക്മ വെയിൽസ് റീജിയണൽ വൈസ് പ്രസിഡന്റ് ആയും പിന്നീട് റീജിയണൽ പ്രസിഡന്റ് ആയും തെരഞ്ഞെടുക്കപ്പെട്ടു. റോയൽ ഗ്വെന്റ്  എൻ എച്ച് എസിൽ നേഴ്‌സ് ആയ മിനുവാണ് ഭാര്യ. സ്‌കൂൾ വിദ്യാർത്ഥികളായ റിസും, റിയാനും മക്കൾ.


യുക്മയുടെ അഭിമാന പ്രോഗ്രാമുകളിൽ ഒന്നായിരുന്ന യുക്മ അലൈഡ് ചിത്രഗീതം ഷോയുടെ ആദ്യ സ്‌റ്റേജ് വെയ്ൽസിൽ അരങ്ങേറിയത് ബിജു തോമസ് റീജിയണൽ പ്രസിഡന്റ് ആയിരുന്നപ്പോഴാണ്. പ്രശസ്ത ഗായിക പത്മശ്രീ. ഡോ. കെ.എസ്. ചിത്ര, സിനിമാതാരങ്ങളായ നാദിർഷാ, രമേഷ് പിഷാരടി തുടങ്ങിയവരും പങ്കെടുത്ത പ്രസ്തുത ഷോയ്ക്ക് ആതിഥ്യമരുളിയത് ന്യൂപോർട്ട് കേരള കമ്മ്യൂണിറ്റി ആയിരുന്നു. ബിജുവിന് ലഭിച്ച ദേശീയ ഭാരവാഹിത്വം ന്യൂപോർട്ട് കേരള കമ്മ്യൂണിറ്റിക്ക് കൂടി ലഭിച്ച അംഗീകാരമായാണ് വിലയിരുത്തപ്പെടുന്നത്. തുടർന്നും തന്നാൽ കഴിയും വിധം യുക്മ പ്രവർത്തനങ്ങൾ എല്ലാ മലയാളികളിലേക്കും വ്യാപിപ്പിക്കാനും സംഘടന കൊണ്ടുള്ള ഗുണം എല്ലാവർക്കും ലഭ്യമാക്കാനും ശ്രമിക്കുമെന്ന് ബിജു അറിയിച്ചു.

ബിജുവിന്റെ തെരഞ്ഞെടുപ്പ് വാർത്ത വെയിൽസ് റീജിയണിലെ അംഗ അസോസിയേഷനുകൾ ആവേശപൂർവ്വമാണ് സ്വീകരിച്ചത്. സ്വാൻസി മലയാളി അസോസിയേഷൻ, കാർഡിഫ് മലയാളി അസോസിയേഷൻ, വെസ്റ്റ് വെയ്ൽസ് മലയാളി അസോസിയേഷൻ, ന്യൂപോർട്ട് കേരള കമ്മ്യൂണിറ്റി, അബരീസ്വിത്ത് മലയാളി അസോസിയേഷൻ എന്നീ അസോസിയേഷനുകളാണ് വെയ്ൽസ് റീജിയനിൽ നിന്നും യുക്മയിലുള്ളത്. യുക്മ മുൻ നാഷണൽ സെക്രട്ടറി ബിൻസു ജോൺ, സ്വാൻസി മലയാളി അസോസിയേഷൻ പ്രസിഡന്റ് ജിജി ജോർജ്ജ്, സെക്രട്ടറി ജിനോ ഫിലിപ്പ്, കാർഡിഫ് മലയാളി അസോസിയേഷൻ പ്രസിഡന്റ് ജോസ് കൊച്ചാപ്പള്ളിൽ, ന്യൂപോർട്ട് കേരള കമ്മ്യൂണിറ്റി പ്രസിഡന്റ് ബെന്നി സിറിയക്, മുൻ പ്രസിഡന്റ് ജോബി മാത്യു, വെസ്റ്റ് വെയ്ൽസ് മലയാളി അസോസിയേഷനിൽ നിന്നുള്ള നാഷണൽ കമ്മറ്റിയംഗം അഭിലാഷ് തോമസ്, അബരീസ്വിത്ത് മലയാളി അസോസിയേഷൻ പ്രസിഡന്റ് അനീഷ് കുര്യാക്കോസ് തുടങ്ങി നിരവധി പേരാണ് വെയിൽസിൽ നിന്നും ബിജുവിനെ അഭിനന്ദനങ്ങൾ അറിയിക്കാൻ വിളിച്ചത്.

യുക്മ നാഷണൽ പ്രസിഡന്റ് ഫ്രാൻസിസ് മാത്യു, സെക്രട്ടറി സജീഷ് ടോം, ട്രഷറർ ഷാജി തോമസ്, മുൻ പ്രസിഡന്റുമാരായ വിജി കെ.പി, വർഗ്ഗീസ് ജോൺ, വൈസ് പ്രസിഡന്റ് ബീന സെൻസ് തുടങ്ങിയവരും അഭിനന്ദനങ്ങൾ അറിയിക്കാൻ വിളിച്ചിരുന്നു. ബിജുവിനെ അഭിനന്ദിക്കാൻ താത്പര്യമുള്ളവർക്ക് താഴെ കൊടുത്തിരിക്കുന്ന കമന്റ് കോളം ഉപയോഗിക്കാവുന്നതാണ്.