മുഖ്യമന്ത്രിയുടെ പരിപാടിയിൽ കറുത്ത മാസ്‌കിനും വിലക്ക്; പ്രതിഷേധിച്ചുള്ള ബ്ലാക്ക് മാസ്ക് ക്യാംപെയ്നിൽ വി.ടി ബൽറാം; ചിരിക്കുന്ന കുട്ടികളും കറുത്ത മാസ്‌കും എന്ന കുറിപ്പോടെ ചിത്രം പങ്കുവച്ച് എംഎ‍ൽഎ; ക്യാപെയ്നിൽ പങ്കുചേർന്ന് യൂത്ത് കോൺഗ്രസ്, കെ എസ് യു നേതാക്കളും
കോഴിക്കോട്: മുഖ്യമന്ത്രി പങ്കെടുക്കുന്ന പരിപാടിയിൽ കറുത്ത മാസ്ക് ധരിച്ചെത്തിയവരെ തടഞ്ഞതിൽ പ്രതിഷേധിച്ചുള്ള ബ്ലാക്ക് മാസ്ക് ക്യാംപെയ്നിൽ പങ്കുചേർന്ന് കൂടുതൽ യുവനേതാക്കൾ. ചിരിക്കുന്ന കുട്ടികളും കറുത്ത മാസ്‌കും എന്ന കുറിപ്പോടെ കറുത്ത മാസ്‌കിട്ടുള്ള ചിത്രമാണ് വി.ടി ബൽറാം എംഎ‍ൽഎ സോഷ്യൽ മീഡിയയിൽ പങ്കുവെച്ചത്.
മുഖ്യമന്ത്രി പങ്കെടുക്കുന്ന പരിപാടിയിൽ കറുത്ത മാസ്ക് ധരിക്കാൻ പൊലീസ് അനുവാദം നൽകിയിരുന്നില്ല. വെള്ളിയാഴ്ച വയനാട് പാക്കേജ് പ്രഖ്യാപിച്ച ചടങ്ങിലാണ് കറുത്ത മാസ്ക് ധരിച്ചെത്തിയവരെ പൊലീസ് തടഞ്ഞത്.
പി.എസ്.സി സമരത്തിന്റെ പശ്ചാത്തലത്തിൽ പ്രതിപക്ഷ യുവജനസംഘടനകൾ പ്രതിഷേധം പ്രകടിപ്പിച്ചേക്കുമെന്ന് രഹസ്യാന്വേഷണ വിഭാഗത്തിന്റെ മുന്നറിയിപ്പിന്റെ അടിസ്ഥാനത്തിലാണ് തീരുമാനമെന്നാണ് സൂചന. വൻ പൊലീസ് വലയത്തിലായിരുന്നു ചടങ്ങ് നടന്നത്.
ധനകാര്യ മന്ത്രി തോമസ് ഐസക്, വ്യവസായ മന്ത്രി ഇ.പി ജയരാജൻ എന്നിവരും മുഖ്യമന്ത്രിയോടൊപ്പമുണ്ടായിരുന്നു. കറുത്ത മാസ്‌കുകൾ ധരിച്ചെത്തിയവരെ തടഞ്ഞ പൊലീസ് ഇവർക്ക് ധരിക്കാൻ കളർ മാസ്‌കുകൾ നൽകുകയായിരുന്നു. അതിന് ശേഷമാണ് ഇവരെ ഹാളിലേക്ക് പ്രവേശിപ്പിച്ചത്.
ഇതിനെതിരെ വലിയ പ്രതിഷേധമാണ് സോഷ്യൽ മീഡിയയിൽ ഉയർന്നത്. യൂത്ത് കോൺഗ്രസ് അധ്യക്ഷൻ ഷാഫി പറമ്പിൽ എംഎ‍ൽഎ, കെ.എസ്.യു നേതാവ് കെ.എം അഭിജിത് എന്നിവരും കറുത്ത മാസ്‌കിട്ട് ക്യാപെയ്നിൽ പങ്കുചേർന്നിട്ടുണ്ട്.
