സ്റ്റാറ്റൻ ഐലൻഡിൽ വാഴ്‌ത്തപ്പെട്ട കുഞ്ഞച്ചന്റെ തിരുനാൾ ആഘോഷിച്ചു
ന്യുയോർക്ക്: സ്റ്റാറ്റൻ ഐലൻഡ് സീറോ-മലബാർ ഇടവകയുടെ സ്വർഗ്ഗീയ മദ്ധ്യസ്ഥനായ വാഴ്‌ത്തപ്പെട്ട തേവർപറമ്പിൽ കുഞ്ഞച്ചന്റെ തിരുനാളും പരിശുദ്ധ കന്യകാ മറിയത്തിന്റെയും മാർ തോമ്മാശ്ലീഹായുടേയും തിരുനാളുകളും സംയുക്തമായി ടോംകിൻസ് അവന്യൂവിലുള്ള സെന്റ് ജോസഫ് പള്ളിയിൽവച്ച് ഭക്തിനിർഭരമായ തിരുക്കർമ്മങ്ങളോടും പ്രൗഢഗംഭീരമായ പ്രദക്ഷിണത്തോടു
ന്യുയോർക്ക്: സ്റ്റാറ്റൻ ഐലൻഡ് സീറോ-മലബാർ ഇടവകയുടെ സ്വർഗ്ഗീയ മദ്ധ്യസ്ഥനായ വാഴ്‌ത്തപ്പെട്ട തേവർപറമ്പിൽ കുഞ്ഞച്ചന്റെ തിരുനാളും പരിശുദ്ധ കന്യകാ മറിയത്തിന്റെയും മാർ തോമ്മാശ്ലീഹായുടേയും തിരുനാളുകളും സംയുക്തമായി ടോംകിൻസ് അവന്യൂവിലുള്ള സെന്റ് ജോസഫ് പള്ളിയിൽവച്ച് ഭക്തിനിർഭരമായ തിരുക്കർമ്മങ്ങളോടും പ്രൗഢഗംഭീരമായ പ്രദക്ഷിണത്തോടും കൂടി 18ന് ആഘോഷിച്ചു.
ഷിക്കാഗോ സെന്റ് തോമസ് സീറോ-മലബാർ രൂപതയുടെ സഹായമെത്രാൻ മാർ ജോയ് ആലപ്പാട്ട് പിതാവിന്റെ പ്രധാന കാർമ്മികത്വത്തിൽ ആഘോഷമായ തിരുനാൾ കുർബ്ബാനയോടുകൂടി തിരുക്കർമ്മങ്ങൾ ആരംഭിച്ചു. ബ്രോങ്ക്‌സ് ഫൊറോന പള്ളി വികാരി ഫാ. ജോസ് കണ്ടത്തിക്കുടി തിരുനാൾ സന്ദേശം നൽകി. ഫാ റോയ്‌സൺ മേനോലിക്കൽ (വികാരി), ഫാ. ഫ്രെഡി (പാസ്റ്റർ-സെന്റ് ജോസഫ്), ഫാ. ക്രിസ്റ്റി പറമ്പുകാട്ടിൽ, ഫാ. ജേക്കബ് കട്ടക്കൽ, ഫാ. മാത്യു ഈരാളി, ഫാ. ജോ കാരിക്കുന്നേൽ, ഫാ. ടോമി മാംപറമ്പിൽ, ഫാ. ജോൺ കല്ലാറ്റിൽ, ഫാ. ഡേവി
കാവുങ്കൽ, ഫാ. ജിൽസൺ നടുവിലേടത്ത്, ഫാ. ബാബു തേലപ്പിള്ളി, ഫാ. ജോസഫ് കണ്ടശാംകുന്നേൽ എന്നിവർ സഹകാർമ്മികരായിരുന്നു. ഫാ. ജോസ് വേലിക്കകം, ഫാ. സോജു വർഗീസ്, ഫാ. ചെറിയാൻ മുണ്ടക്കൽ (ഓർത്തഡോക്‌സ്) എന്നിവർ തിരുനാൾ കർമ്മങ്ങളിൽ പങ്കെടുത്തു.
തിരുക്കർമ്മങ്ങൾക്കുശേഷം, നിറപ്പകിട്ടാർന്ന കൊടികളുടേയും, മുത്തുക്കുടകളുടേയും, ചെണ്ടമേളത്തിന്റെയും അകമ്പടിയോടെ തിരുസ്വരൂപങ്ങളും തിരുശേഷിപ്പും വഹിച്ചുകൊണ്ട് നടത്തിയ നഗര പ്രദക്ഷിണത്തിൽ നൂറുകണക്കിന് വിശ്വാസികൾ ഭക്ത്യാദരവോടുകൂടി
പങ്കെടുത്തു. പ്രദക്ഷിണത്തിനുശേഷം പള്ളിയിൽ തിരിച്ചെത്തിയ ഭക്തജനം കുഞ്ഞച്ചന്റെ തിരുശേഷിപ്പ് വണങ്ങി പ്രാർത്ഥിക്കുകയും നേർച്ചകാഴ്ചകൾ സമർപ്പിക്കുകയും ചെയ്തു. തിരുനാൾ കർമ്മങ്ങൾക്കുശേഷം നടന്ന വിഭവസമൃദ്ധമായ അത്താഴവിരുന്നിന് ഷാജി മാത്യു,
സ്റ്റാൻലി ജോസഫ് എന്നിവർ നേതൃത്വം നൽകി. തുടർന്ന് ലോങ്ങ് ഐലൻഡ് താളലയം ടീം അവതരിപ്പിച്ച ചെണ്ടമേളവും ഉണ്ടായിരുന്നു.
പാലക്കാട്-കാഞ്ഞിരപ്പുഴ സ്വദേശിയും സ്റ്റാറ്റൻ ഐലൻഡ് ഇടവകാംഗവുമായ വട്ടുകുന്നേൽ ടോം തോമസും കുടുംബവുമാണ് ഈ വർഷത്തെ തിരുനാൾ ഏറ്റെടുത്ത് നടത്തിയത്. കൈക്കാരൻ ദേവസ്യാച്ചൻ മാത്യുവിന്റെ നേതൃത്വത്തിൽ കമ്മിറ്റി അംഗങ്ങൾ ആഘോഷ പരിപാടികൾക്ക്
മേൽനോട്ടം വഹിച്ചു. ജോർജ് മുണ്ടിയാനിയുടെ നേതൃത്വത്തിലുള്ള ഗായകസംഘം തിരുക്കർമ്മങ്ങൾ ഭക്തി സാന്ദ്രമാക്കി.
തിരുക്കർമ്മങ്ങൾക്കുശേഷം അടുത്ത വർഷത്തെ തിരുനാളിന്റെ പ്രസുദേന്തി വാഴ്ചയും നടന്നു. ഇടവകാംഗമായ ഫിലിപ്പ് പായിപ്പാട്ടും കുടുംബവുമാണ് അടുത്ത വർഷത്തെ തിരുനാൾ ഏറ്റെടുത്തിരിക്കുന്നത്. വാഴ്‌ത്തപ്പെട്ട കുഞ്ഞച്ചന്റെ തിരുനാളിൽ പങ്കെടുക്കുന്നതിന് നാടിന്റെ
നാനാഭാഗത്തുനിന്നും വന്നുചേർന്ന ഭക്തജനങ്ങൾക്ക് വികാരി ഫാ. റോയ്‌സൺ മേനോലിക്കൽ നന്ദി പറയുകയും, തിരുനാളിൽ സഹകരിച്ച ഏവർക്കും കുഞ്ഞച്ചന്റെ മാദ്ധ്യസ്ഥം വഴി ധാരാളം അനുഗ്രഹങ്ങൾ ലഭിക്കട്ടെ എന്ന് ആശംസിക്കുകയും ചെയ്തു. 
