അയർലണ്ടിലെ ഏറ്റവും വലിയ വ്യോമാഭ്യാസപ്രകടനമായ ബ്രേ എയർ ഷോ ജൂലൈ 22, 23 തീയതികളിൽ നടത്തപ്പെടും. കൗണ്ടി വിക്ക്ളോയിലെ ബ്രേ ബീച്ചിൽ ആണ് കണ്ണഞ്ചിപ്പിക്കുന്ന വ്യോമാഭ്യാസ പ്രകടനങ്ങൾ നടക്കുക.

ആകാശമാകെ ഇളക്കിമറിക്കുന്ന വൈമാനിക സംഘത്തിൽ അയർലണ്ടിന് പുറമെനിന്നുള്ള കൂറ്റൻ വിമാനങ്ങളും പങ്കെടുക്കും.വർണ്ണവും ശബ്ദവും ചേർന്നൊരുക്കുന്ന മായിക കാഴ്‌ച്ചകളാൽ പോർവിമാനങ്ങൾ ആകാശത്ത് വിസ്മയങ്ങൾ സൃഷ്ടിക്കും.

നിരവധി അഭ്യാസ പ്രകടനങ്ങളുമായി സ്വിസ്സ് എയർ ഫോഴ്സ് മേളയെ വർണ്ണാഭമാക്കും. ഐറിഷ് ഡിഫൻസ് ഫോഴ്സിന്റെ പാരച്യൂട്ട് ടീം അതിസാഹസികമായ ഇനങ്ങളുമായി രംഗത്തുണ്ടാകും. ഐറിഷ് ഏവിയേഷൻ അഥോറിറ്റിയാണ് എയർ ഷോ സംഘടിപ്പിക്കുന്നത്.