കാനഡയുടെ സമ്പദ്വ്യവസ്ഥയിൽ സജീവമായി സംഭാവന ചെയ്യുന്ന 90,000 ത്തിലധികം അവശ്യ തൊഴിലാളികൾക്കും വിദേശ സ്റ്റുഡന്റ് വിസയിലുള്ളവർക്കും സ്ഥിരമായ താമസത്തിനുള്ള അനുമതി നല്കാനൊരുങ്ങുകയാണ് കാനഡ.രാജ്യാന്തര യാത്രകളും, വിദേശത്തു നിന്നുള്ള കുടിയേറ്റവും കുറഞ്ഞ സാഹചര്യത്തിലാണ് കാനഡ പുതിയ പദ്ധതി പ്രഖ്യാപിച്ചത്.

ആരോഗ്യമേഖല ഉൾപ്പെടെ, വിവിധ തൊഴിൽമേഖലകളിൽ ഒരു വർഷമെങ്കിലും പ്രവൃത്തി പരിചയമുള്ള താൽക്കാലിക വിസക്കാർക്ക് പെർമനന്റ് റെസിഡൻസി നൽകാനാണ് തീരുമാനം. കൊറോണായ്‌ക്കെതിരെ പൊരാടിയവർക്കും ആനുകൂല്യം ലഭ്യമാകും. താൽക്കാലിക തൊഴിലാളികൾക്കും ഇതിനകം കാനഡയിലുള്ള അന്തർദ്ദേശീയ ബിരുദധാരികൾക്കും ഇതോടെ പിആർ ലഭിക്കും.

അവശ്യമേഖല എന്ന് വിലയിരുത്തിയിട്ടുള്ള നിരവധി തൊഴിൽ മേഖലകൾ ഇതിന്റെ പരിധിയിൽ വരുന്നുണ്ട്. ഗ്രോസറി സ്റ്റോറുകളിലെ കാഷ്യർമാർ, ഷെൽഫുകൾ നിറയ്ക്കുന്നവർ, ട്രക്ക് ഡ്രൈവർമാർ, കാർഷിക ജോലികൾ ചെയ്യുന്നവർ തുടങ്ങിയവരെയെല്ലാം ഈ പദ്ധതിയിൽ ഉൾപ്പെടുത്തും.കഴിഞ്ഞ നാലു വർഷത്തിനിടെ ബിരുദപഠനം പൂർത്തിയാക്കിയ രാജ്യാന്തര വിദ്യാർത്ഥികൾക്കും പദ്ധതിയുടെ ആനുകൂല്യം ലഭിക്കുമെന്ന് കനേഡിയൻ കുടിയേറ്റകാര്യമന്ത്രി പറഞ്ഞു.

ആരോഗ്യമേഖലയിൽ ജോലി ചെയ്യുന്ന 20,000 പേർക്കും, മറ്റ് അവശ്യമേഖലകളിൽ ജോലി ചെയ്യുന്ന 30,000 പേർക്കും, കനേഡിയൻ വിദ്യാഭ്യാസ സ്ഥാപനത്തിൽ നിന്ന് ബിരുദം നേടിയ 40,000 പേർക്കുമാണ് പെർമനന്റ് റെസിഡൻസി നൽകുന്നത്.മെയ്‌ ആറു മുതൽ ഈ പദ്ധതി പ്രാബല്യത്തിൽ വരും.

ഈ വർഷം നാലു ലക്ഷം കുടിയേറ്റക്കാരെ പുതിയതായി സ്വീകരിക്കാനാണ് കാനഡ ലക്ഷ്യമിടുന്നതെന്ന് കുടിയേറ്റകാര്യമന്ത്രി മാർക്കോ മെൻഡിസിനോ പറഞ്ഞു.അതിർത്തികൾ അടഞ്ഞുകിടന്നതുമൂലം കഴിഞ്ഞ വർഷം കുടിയേറ്റത്തിലുണ്ടായ കുറവ് പരിഹരിക്കുന്നത് ലക്ഷ്യമിട്ടാണ് ഇത്.

താൽക്കാലിക കുടിയേറ്റക്കാർ രാജ്യത്തിന് നൽകുന്ന സംഭാവനകൾ മനസിലാക്കാൻ മഹാമാരിക്കാലം സഹായിച്ചു എന്ന് മാർക്കോ മെൻഡിസിനോ അഭിപ്രായപ്പെട്ടു.കൊറോണവൈറസ് പോരാട്ടത്തിന്റെ മുൻനിരയിലുണ്ടായിരുന്ന നൂറുകണക്കിന് പേരുടെ പൗരത്വ അപേക്ഷകൾ അതിവേഗം പരിഗണിക്കുമെന്ന് ഫ്രാൻസ് കഴിഞ്ഞ ഡിസംബറിൽ പ്രഖ്യാപിച്ചിരുന്നു

 

പെർമനന്റ് റെസിഡൻസി