ഒട്ടാവ: അന്തരിച്ച ബ്രിട്ടീഷ് രാജ്ഞി എലിസബത്തിന്റെ ശവസംസ്‌കാര ദിനമായ സെപ്റ്റംബർ 19 ന് കാനഡ ഫെഡറൽ ജീവനക്കാർക്ക് അവധി പ്രഖ്യാപിച്ചു. ദുഃഖാചരണത്തോടനുബന്ധിച്ച് അന്ന് സർക്കാർ ഓഫീസുകൾ തുറക്കില്ല. ജീവനക്കാർക്ക് ഹാജരാകേണ്ടതില്ലെന്ന് പ്രധാനമന്ത്രി ജസ്റ്റിൻ ട്രൂഡോ ചൊവ്വാഴ്ച അറിയിച്ചു.
മറ്റ് തൊഴിലാളികൾക്കും പൊതു അവധി ദിനം അനുവദിക്കാൻ താൻ പ്രവിശ്യകളോട് ആവശ്യപ്പെട്ടതായി ട്രൂഡോ പറഞ്ഞു, എന്നാൽ കാനഡയിലെ ഏറ്റവും ജനസംഖ്യയുള്ള രണ്ട് പ്രവിശ്യകളായ ഒന്റാറിയോയും ക്യൂബെക്കും അവധി നൽകാൻ വിസമ്മതിച്ചു.''അവധിക്ക് പകരമായി ഒന്റാറിയോ 2022 സെപ്റ്റംബർ 19 ന് പ്രവിശ്യാ ദുഃഖാചരണ ദിനമായി ആചരിക്കും.
ഒന്റാറിയോയിലെ ജനങ്ങൾക്ക് ഉച്ചയ്ക്ക് 1:00 മണിക്ക് ഒരു നിമിഷം നിശബ്ദത ആചരിക്കാമെന്ന് ഒന്റാറിയോ പ്രീമിയർ ഡഗ് ഫോർഡ് പ്രസ്താവനയിൽ പറഞ്ഞു.തിങ്കളാഴ്ചയും അനുസ്മരണ ദിനമായിരിക്കുമെന്നും എന്നാൽ ഫ്രഞ്ച് സംസാരിക്കുന്ന പ്രവിശ്യയിൽ പൊതു അവധിയായിരിക്കില്ലെന്നും ക്യൂബെക്ക് പ്രീമിയർ ഫ്രാൻസ്വാ ലെഗോൾട്ട് ചൊവ്വാഴ്ച മാധ്യമപ്രവർത്തകരോട് പറഞ്ഞു. സസ്‌കാച്ചെവാനും സംസ്‌കാര ദിവസം അവധിയായി അംഗീകരിക്കില്ല.
അതേസമയം, ഫെഡറൽ ഗവൺമെന്റിന്റെ നിർദ്ദേശം പിന്തുടരുമെന്ന് ബ്രിട്ടീഷ് കൊളംബിയ സർക്കാർ അറിയിച്ചു. അറ്റ്‌ലാന്റിക് കാനഡയിലുടനീളമുള്ള ന്യൂ ബ്രൺസ്വിക്ക് ഉൾപ്പെടെയുള്ള പ്രവിശ്യാ ഗവൺമെന്റുകൾഅവധികൾ പ്രഖ്യാപിച്ചിട്ടുണ്ട്. സ്‌കൂളുകളും സർക്കാർ ഓഫീസുകളും അടച്ചിടും. എന്നാൽ സ്വകാര്യ മേഖലയിലെ ബിസിനസുകൾക്കും തൊഴിലുടമകൾക്കും അവധി ഓപ്ഷണൽ ആയിരിക്കും.
മാനിറ്റോബ അത്യാവശ്യമല്ലാത്ത എല്ലാ സർക്കാർ സേവനങ്ങളും ഓഫീസുകളും രാജ്ഞിയുടെ സംസ്‌കാര ദിവസം അടച്ചിടും, എന്നാൽ സ്‌കൂളുകളും ശിശു സംരക്ഷണ സൗകര്യങ്ങളും തുറന്നിരിക്കും.കാനഡയുടെ രാഷ്ട്രത്തലവനായിരുന്നു അന്തരിച്ച രാജ്ഞി. അവർ ചുമതലയിലുണ്ടായിരിക്കെ 22 തവണ രാജ്യം സന്ദർശിച്ചിരുന്നു.
