മ്യാന്മറിൽ നിന്നും അഭയാർത്ഥികൾ എത്തുന്നത് തടയണം; വടക്കു-കിഴക്കൻ സംസ്ഥാനങ്ങൾക്ക് നിർദ്ദേശം നൽകി കേന്ദ്ര സർക്കാർ

ന്യൂഡൽഹി: മ്യാന്മറിൽ നിന്നും അഭയാർത്ഥികൾ എത്തുന്നത് തടയണമെന്ന്​​ വടക്കു-കിഴക്കൻ സംസ്ഥാനങ്ങളോട് കേന്ദ്ര സർക്കാർ. ഇക്കാര്യം ചൂണ്ടിക്കാട്ടി ​കേന്ദ്രസർക്കാർ വടക്കു കിഴക്കൻ സംസ്ഥാനങ്ങൾക്ക് കത്തയച്ചു. നാഗലാൻഡ്​, മിസോറാം, മണിപ്പൂർ, അരുണാചൽ പ്രദേശ്​, അസം റൈഫിൾസ്​ എന്നിവക്കാണ്​ ആഭ്യന്തരമന്ത്രാലയത്തിന്റെ കത്ത്​. ചീഫ്​ സെക്രട്ടറിമാർക്കയച്ച കത്തിൽ കനത്ത ജാഗ്രത പുലർത്തണമെന്നാണ്​ നിർദ്ദേശിച്ചിരിക്കുന്നത്​.

നേര​ത്തെ മ്യാന്മറിൽ നിന്നെത്തിയവരെ കൈമാറണമെന്ന്​ ആവശ്യപ്പെട്ട്​ മിസോറാമിലെ ഉദ്യോഗസ്ഥർക്ക്​ മ്യാന്മർ കത്തയച്ചിരുന്നു. ഇതിന്​ പിന്നാലെയാണ്​ ആഭ്യന്തര മന്ത്രാലയവും നിർദ്ദേശം നൽകിയിരിക്കുന്നത്​. മ്യാന്മറിൽ ഓങ്​ സാങ്​ സൂചി ഭരണകൂടത്തെ അട്ടിമറിച്ച്​ പട്ടാളം അധികാരം പിടിച്ചതോടെയാണ്​ രാജ്യത്ത്​ കടുത്ത അസ്ഥിരതയുണ്ടായത്​. പട്ടാള സൈനിക മേധാവി സീനിയർ ജനറൽ മിൻ ആങ്​ ലെയിങ്ങിന്​ അധികാരം കൈമാറുകയായിരുന്നു.