ആലുവ: വയോധികയുടെ മാല പൊട്ടിച്ച് കടന്നുകളഞ്ഞ രണ്ടംഗ സംഘത്തെ നെടുമ്പാശേരി പൊലീസ് പിടികൂടി. ആനച്ചാൽ പള്ളിവാസൽ മറ്റത്തിൽ വീട്ടിൽ റെനു (30), മാങ്ങാപ്പാറ കൊന്നത്തങ്ങാടി അടുപ്പുകല്ലിങ്കൽ വീട്ടിൽ ആഗ്‌നൽ (23) എന്നിവരാണ് പിടിയിലായത്. ശനിയാഴ്ച ഉച്ചയോടെ നെടുമ്പാശേരിക്കു സമീപം കോട്ടായി ഭാഗത്ത് വിറകു വാങ്ങാൻ പോയ വൃദ്ധയുടെ മാലയാണ് കവർന്നത്.

കാറിൽ കാത്തുനിന്ന സംഘം വഴി ചോദിക്കാനായി അടുത്തെത്തി മാല പൊട്ടിച്ച് കടന്നു കളയുകയായിരുന്നു. തുടർന്ന് ജില്ലാ പൊലീസ് മേധാവി കെ.കാർത്തികിന്റെ മേൽനോട്ടത്തിൽ പ്രത്യേക സംഘം രൂപീകരിച്ച് തൃശൂർ, കോട്ടയം ജില്ലകളിൽ നടത്തിയ അന്വേഷണത്തിലാണ് പ്രതികൾ പിടിയിലാകുന്നത്. നെടുമ്പാശേരി എസ്.എച്ച്.ഒ പി.എം ബൈജു, എസ്‌ഐ മാരായ വന്ദന കൃഷ്ണ, രാധാകൃഷ്ണൻ ,സി.പി.ഒ മാരായ ജിസ്‌മോൻ എൻ.ജി, മുനീർ പി.ഏ, ശ്രീകാന്ത് എം, സജി പി വൈ എന്നിവരാണ് അന്വേഷണ സംഘത്തിലുള്ളത്.

 

 

കോവിഡ്മാലപൊട്ടിച്ചുവയോധിക