ന്യൂഡൽഹി: ഹണി ട്രാപ്പിൽ കുടുങ്ങി പ്രതിരോധ രഹസ്യങ്ങൾ ചോർത്തിയെന്ന ആരോപണത്തിനു വിധേയനായ വരുൺ ഗാന്ധി എംപിക്ക് എതിരെ ബിജെപിയിൽ നിന്ന് തന്നെ ഗൂഢാലോചനയുണ്ടായെന്ന് സൂചന. വരുൺ ഗാന്ധിക്കെതിരെയുള്ള ഗുരുതര ആരോപണങ്ങളിൽ ബിജെപിക്ക് തന്ത്രപരമായ മൗനം തുടരുന്നതും ശ്രദ്ധേയമാണ്. ഉത്തർപ്രദേശ് തിരഞ്ഞെടുപ്പിന് കളമൊരുങ്ങുന്നതിനിടയിലാണ് സംസ്ഥാനത്ത് സ്വാധീനമുള്ള ഒരു നേതാവിനെതിരെ ആരോപണമുയർന്നിരിക്കുന്നത്. സംസ്ഥാനത്ത് മുഖ്യമന്ത്രിസ്ഥാനാർത്ഥിയാവാനുള്ള വരുണിന്റെ സമ്മർദതന്ത്രങ്ങളിലുള്ള എതിർപ്പും മോദിഅമിത് ഷാ നേതൃനിരയ്ക്ക് അദ്ദേഹത്തോടുള്ള താത്പര്യക്കുറവുമാണ് ബിജെപിയുടെ നിശ്ശബ്ദതയ്ക്ക് കാരണം. ഇത് തന്നെയാണ് ആരോപണങ്ങളിലേക്ക് കാര്യങ്ങളെത്തിച്ചതെന്നും ആക്ഷേപമുണ്ട്.

മുഖ്യമന്ത്രിസ്ഥാനാർത്ഥിയാക്കണമെന്നാവശ്യപ്പെട്ട് ഒളിഞ്ഞും തെളിഞ്ഞും സമ്മർദം ചെലുത്തിവരികയായിരുന്നു വരുൺ. ജൂണിൽ അലഹബാദിൽ നടന്ന ദേശീയ നിർവാഹകസമിതി യോഗവേദിക്ക് ചുറ്റും അദ്ദേഹത്തിന്റെ അനുയായികൾ ഈയാവശ്യമുന്നയിച്ച് പോസ്റ്ററുകളും ബാനറുകളും പതിച്ചിരുന്നു. എന്നാൽ മോദിയും അമിത് ഷായും വരുണിന് അനുകൂലമല്ല. ഒന്നുകിൽ വരുണിനെ മുഖ്യമന്ത്രിയാക്കുക. അല്ലെങ്കിൽ താൻ രാജിവയ്ക്കുമ്പോൾ മകനെ കേന്ദ്രമന്ത്രിയാക്കണമെന്ന് അമ്മ മേനകാ ഗാന്ധിയും ആവശ്യപ്പെട്ടിരുന്നു. അതിനിടെയാണ് പുതിയ വിവാദം. പ്രതിരോധ രഹസ്യങ്ങൾ ചോർത്തി നൽകിയെന്ന ആരോപണം തെറ്റാണെന്ന സൂചനയും പുറത്തുവന്നു. എന്നിട്ടും. പ്രതിരോധമന്ത്രാലയത്തിലെ രേഖകളുമായി ബന്ധപ്പെട്ട ഗൗരവമുള്ള വിഷയത്തിൽ പാർട്ടിയെ വലിച്ചിഴയ്‌ക്കേണ്ടതില്ലെന്നാണ് മുതിർന്ന നേതാക്കളുടെ നിലപാട്.

നേതൃത്വത്തിന് താത്പര്യമില്ലാത്ത വരുണിനെതിരെയുള്ള ആരോപണത്തെക്കുറിച്ച് പ്രതികരിക്കാൻ രണ്ടാംനിര നേതാക്കളും മുന്നോട്ടുവന്നിട്ടില്ല. ആരോപണം വരുൺതന്നെ നിഷേധിച്ചനിലയ്ക്ക്, കൂടുതൽ പ്രതികരിക്കേണ്ട ആവശ്യമില്ലെന്നാണ് ബിജെപി. ദേശീയ ജനറൽ സെക്രട്ടറി ശ്രീകാന്ത് ശർമ പറഞ്ഞത്. ഒരുകാലത്ത് ബിജെപി. നേതൃനിരയ്ക്കും സംഘപരിവാറിനും പ്രിയപ്പെട്ട തീപ്പൊരി നേതാവായിരുന്നു വരുൺ ഗാന്ധി. 2009ലെ തിരഞ്ഞെടുപ്പ് പ്രചാരണത്തിനിടയിൽ, മുസ്ലിംവിരുദ്ധ പരാമർശങ്ങളിലൂടെ വിവാദമുയർത്തിയാണ് വരുൺ സംഘപരിവാറിന്റെ അടുപ്പക്കാരനായത്. ആ വർഷംതന്നെ അന്നത്തെ ദേശീയ അധ്യക്ഷൻ രാജ്‌നാഥ് സിങ് അദ്ദേഹത്തെ പാർട്ടി ദേശീയ ജനറൽ സെക്രട്ടറിയാക്കി. ഗാന്ധി കുടുംബാംഗംകൂടിയായ വരുൺ, രാഹുൽ ഗാന്ധിക്കെതിരെ വളർത്തിക്കൊണ്ടുവരാവുന്ന യുവനേതാവാണെന്ന കണക്കുകൂട്ടലും ഉണ്ടായിരുന്നു.

എന്നാൽ, 2014ലെ ലോക്‌സഭാ തിരഞ്ഞെടുപ്പ് മുതൽ മോദിഅമിത് ഷാ കൂട്ടുകെട്ടിന് വരുൺ അപ്രിയനായി. ബംഗാളിലെ മോദിയുടെ തിരഞ്ഞെടുപ്പ് റാലിക്ക് ആൾക്കൂട്ടം കുറവായിരുന്നെന്ന വരുണിന്റെ പ്രസ്താവനയെച്ചൊല്ലിയായിരുന്നു ആദ്യത്തെ കല്ലുകടി. തുടർന്ന് ജനറൽ സെക്രട്ടറിസ്ഥാനത്തുനിന്ന് നീക്കി. രാജ്‌നാഥ് സിങ് ബിജെപി അധ്യക്ഷനായിരിക്കേ ജനറൽ സെക്രട്ടറിമാരായിരുന്ന അമിത് ഷായുമായുണ്ടായ ഉരസലുകളാണു പിന്നീടു വരുണിനു തിരിച്ചടിയായത്. അമിത് ഷാ ബിജെപി അധ്യക്ഷ സ്ഥാനമേറ്റെടുത്തപ്പോൾ വരുൺ ഗാന്ധിയെ ദേശീയ ജനറൽ സെക്രട്ടറി സ്ഥാനത്തു നിന്നൊഴിവാക്കുകയും ചെയ്തു. ആർഎസ്എസിന്റെ ശുപാർശ അവഗണിച്ചായിരുന്നു ഈ നടപടി. നെഹ്‌റു കുടുംബത്തെ ഉള്ളിൽ നിന്നു നേരിടുകയെന്ന തന്ത്രത്തിലാണു വരുൺ ഗാന്ധിയെ പ്രമോദ് മഹാജൻ ബിജെപിയിലെത്തിച്ചത്.