ചെന്നൈ: നോട്ടുനിരോധനത്തിന്റെ ഒന്നാം വാർഷികത്തിൽ പ്രധാനമന്ത്രിയുടെ നടൻ ചിമ്പു ആലപിച്ച ഗാനം വൈറലാകുന്നു. നോട്ട് നിരോധത്തെ പരിഹസിച്ചാണ് ഗാനം ഒരുക്കിയിട്ടുള്ളത്. നവംബർ എട്ടിനായിരുന്നു ജനങ്ങളെ ദുരിതത്തിലാക്കിയ ആ നോട്ട് നിരോധനം. അതേ ദിനത്തിൽ തന്നെയാണ് ചിമ്പു പാട്ട് പുറത്ത് വിട്ടത്. ഡീമോണറ്റൈസേഷൻ ആന്തം എന്ന ഗാനമാണ് ചിമ്പു ആലപിച്ചിരിക്കുന്നത്.

നോട്ട്നിരോധനം പെട്ടെന്ന് പ്രഖ്യാപിച്ചതിന് പിന്നാലെ ജനങ്ങൾ അനുഭവിച്ച ബുദ്ധിമുട്ടും ബാങ്കിൽ നിരോധിച്ച നോട്ട് മാറ്റിയെടുക്കാനുള്ള നീണ്ട ക്യുവിൽ നിൽക്കുന്നതുമെല്ലാമാണ് പാട്ടിൽ ഉള്ളത്. നോട്ട് നിരോധനത്തിൽ നട്ടം തിരിഞ്ഞ ജനങ്ങളെ ജി.എസ്.ടി കൂടുതൽ ബുദ്ധിമുട്ടിലാക്കിയെന്നും ഗാനത്തിൽ പറയുന്നു. വൈരമുത്തുവിന്റെ വരികൾക്ക് ബാലമുരളി ബാലുവാണ് ഈണം പകർന്നിരിക്കുന്നത്.

അരുൾ സംവിധാനം ചെയ്യുന്ന തട്ട്‌റോം തൂക്ക്‌റോം എന്ന ആൽബത്തിലെ ഗാനമാണിത്. ഒരു രാഷ്ട്രീയ ആക്ഷേപ ഹാസ്യമായിട്ടാണ് ഗാനം ഒരുക്കിയിരിക്കുന്നത്. എന്തൊരു ജീവിതമാണിതെന്ന് കൺഫ്യൂഷനടിച്ചാണ് ജനജീവിതമെന്ന് പറഞ്ഞാണ് ഗാനം അവസാനിക്കുന്നത്