കൊച്ചി: നവാഗതനായ നൗഫൽ എടവനക്കാട് കഥയും, സംവിധാനവും നിർവ്വഹിക്കുന്ന പുതിയ ചിത്രത്തിലേക്ക് ബാലതാരങ്ങളെ ക്ഷണിക്കുന്നു. മാർക്ക് സെവൻ ഫിലിം അവതരിപ്പിക്കുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് ഇസ്മയിൽ മാഞ്ഞാലിയാണ്. മലയാളത്തിലെ പ്രമുഖ താരങ്ങൾ അണിനിരക്കുന്ന സിനിമയിൽ കുട്ടികളാണ് കേന്ദ്രകഥാപാത്രങ്ങളെ അവതരിപ്പിക്കുന്നത്.

5 വയസ്സ് മുതൽ 13 വയസ്സ് വരെയുള്ള ആൺകുട്ടികളെയും പെൺകുട്ടികളെയും ചിത്രത്തിലേക്ക് തിരഞ്ഞെടുക്കുന്നുണ്ട്. കുടുംബ പ്രശ്‌നങ്ങളും സാമൂഹ്യവിഷയങ്ങളും കുട്ടികളുടെ ജീവിതത്തെ ബാധിക്കുന്നതും തുടർന്നുണ്ടാകുന്ന പ്രശ്‌നങ്ങളുമാണ് ചിത്രത്തിന്റെ പ്രമേയമെന്ന് സംവിധായകൻ നൗഫൽ എടവനക്കാട് പറഞ്ഞു.

കുട്ടികളുടെ വിഷയമാണ് ചിത്രം കൈകാര്യം ചെയ്യുന്നതെങ്കിലും കുടുംബ പ്രേക്ഷകരെ രസിപ്പിക്കുന്ന ഒരു സിനിമയായിരിക്കും ഇതെന്നും സംവിധായകൻ വ്യക്തമാക്കി. സിനിമയുടെ ചിത്രീകരണം ഓഗസ്റ്റിൽ ആരംഭിക്കും. അങ്കമാലി കെ എസ് ആർ ടി സി കോംപ്ലക്‌സിൽ പ്രവർത്തിക്കുന്ന മാർക്ക് സെവൻസ് ഫിലിംസ് ഓഫീസിലാണ് കുട്ടികളെ തെരഞ്ഞെടുക്കുന്നതിനുള്ള വേദി ഒരുക്കിയിട്ടുള്ളത്. ഈ മാസം 19നാണ് ഓഡിഷൻ നടക്കുന്നത്. വിവരങ്ങൾക്ക് 9656425611, 9645486947 എന്നീ ഫോൺ നമ്പരുകളിൽ ബന്ധപ്പെടാവുന്നതാണ്.