കൊച്ചി: കാലം തെറ്റി ഇറങ്ങിയ ചിത്രമെന്നാണ് മോഹൻലാലിനെ നായകനാക്കി സിബി മലയിൽ സംവിധാനം ചെയ്ത ചിത്രം ദേവദൂതൻ അറിയപ്പെടുന്നത്. അന്ന് പ്രതീക്ഷിച്ച പോലെ വലിയ ഹിറ്റാകാതിരുന്ന ചിത്രം പ്രേക്ഷക അഭിരുചികൾ മാറിയതോടെ വീണ്ടും റീ റിലീസിന് ഒരുങ്ങുകയാണ്.

ഫോർ കെ മികവിലാണ് ചിത്രം തിയറ്ററുകളിലെത്തുന്നത്. റീ റിലീസിന് മുന്നോടിയായി കോക്കേഴ്‌സ് മീഡിയ എന്റർടെയ്ന്മെന്റസ് ദേവദൂതന്റെ പോസ്റ്റർ പുറത്തുവിട്ടിട്ടുണ്ട്. പറന്നുയരുന്ന പ്രാവിനെ നോക്കി നിൽക്കുന്ന മോഹൻലാലിന്റെ ചിത്രമാണ് പോസ്റ്ററിൽ. എന്നാൽ സിനിമയുടെ റിലീസിങ് തീയതി പുറത്തുവിട്ടിട്ടില്ല. ഉടൻ തന്നെ തിയറ്ററുകളിലെത്തുമെന്നാണ് വിവരം. ചിത്രത്തിന്റെ ഡിജിറ്റൽ കളർ കറക്ഷൻ ജോലി പൂർത്തിയായതായി നിർമ്മാതാക്കൾ നേരത്തേ അറിയിച്ചിരുന്നു.

ഹൊററും മിസ്റ്ററിയും പ്രണയവും സംഗീതവുമെല്ലാം ഇഴ ചേർത്ത ത്രില്ലറായിരുന്നു ദേവദൂതൻ. രണ്ട് വ്യത്യസ്ത ഗെറ്റപ്പുകളിലാണ് മോഹൻലാൽ പ്രത്യക്ഷപ്പെട്ടത്. മോഹൻലാൽ അവതരിപ്പിച്ച വിശാൽ കൃഷ്ണമൂർത്തി, ജയപ്രദയുടെ അലീന അഥവാ ആഞ്‌ജെലീന, വിനീത് കുമാറിന്റെ മഹേശ്വർ എന്നീ കഥാപാത്രങ്ങൾ ഇന്നും പ്രേക്ഷക മനസിലുണ്ട്. ജഗതി ശ്രീകുമാർ, ജനാർദനൻ, മുരളി, ശരത്, ജഗദീഷ്, വിജയലക്ഷ്മി, ലെന, രാധിക, നിർമല തുടങ്ങിയവരായിരുന്നു മറ്റുകഥാപാത്രങ്ങളെ അവതരിപ്പിച്ചത്.

രഘുനാഥ് പലേരിയാണ് ചിത്രത്തിന് തിരക്കഥ ഒരുക്കിയത്. വിദ്യാസാഗറായിരുന്നു സംഗീത സംവിധാനം നിർവഹിച്ചത്. ചിത്രം പുറത്തിറങ്ങി വർഷങ്ങൾക്ക് ശേഷവും ദേവദൂതനിലെ ഗാനങ്ങൾ ആരാധകർ പാടി നടക്കുന്നുണ്ട്. എന്തരോ മഹാനുഭാവുലു ഒഴികെയുള്ള മറ്റുഗാനങ്ങൾ കൈതപ്രം ദാമോദരൻ നമ്പൂതിരിയായിരുന്നു രചിച്ചത്.