ഞാനും ലാലേട്ടന്റെ ഫാൻ ആണ്, ലാൽ സാറിന്റെ ഭാര്യയോടാണ് ആദ്യം മാപ്പ് പറയേണ്ടത്; മോഹൻലാലിനെ മോശം പറഞ്ഞു, സന്തോഷ് വർക്കിയെക്കൊണ്ട് മാപ്പ് പറയിച്ച് ബാല; വിഡിയോ

കൊച്ചി: സിനിമ നിരൂപണങ്ങളിലൂടെ ശ്രദ്ധേയനായ വ്യക്തിയാണ് സന്തോഷ് വർക്കി. ആദ്യ ഷോ കഴിഞ്ഞാൽ പിന്നാലെ റിവ്യൂ ചെയ്യുക എന്നതാണ് ആറാട്ടണ്ണന്റെ പ്രത്യേകത. റിവ്യൂകൾ രൂക്ഷമായതിന്റെ പേരിൽ തല്ലുകിട്ടിയ ചരിത്രവും ഇദ്ദേഹത്തിനുണ്ട്. അടുത്തിടെ മോഹൻലാലിനെതിരെയുള്ള സന്തോഷ് വർക്കിയുടെ പരാമർശം വലിയ വിമർശനങ്ങൾക്ക് കാരണമായി. ഈ വിഷയത്തിൽ സന്തോഷ് വർക്കിയെക്കൊണ്ട് മാപ്പ് പറയിച്ചിരിക്കുകയാണ് നടൻ ബാല.

തന്റെ വീട്ടിലേക്ക് വിളിച്ചുവരുത്തിയാണ് താരം സന്തോഷ് വർക്കിയെക്കൊണ്ട് മാപ്പ് പറയിച്ചത്. സിനിമ നിരൂപണം നടത്താനോ നടനെക്കുറിച്ച് പറയാനോ നിങ്ങൾക്ക് അവകാശമുണ്ട്. എന്നാൽ ഒരാളുടെ വ്യക്തി ജീവിതത്തെക്കുറിച്ച് പറയാൻ അധികാരമില്ലെന്നും ബാല പറഞ്ഞു. സോഷ്യൽ മീഡിയയിൽ പങ്കുവച്ച വിഡിയോയിലൂടെയാണ് മാപ്പ് പറയിച്ചത്.

'സാധാരണ സംസാരിക്കുന്ന പോലെയുള്ള രീതി അല്ല. എനിക്ക് മനസിലൊരു വിഷമം ഉണ്ടായിരുന്നു. എന്റെ വീട്ടിലേക്ക് എന്നെ തേടിവന്ന സന്തോഷ് വർക്കിയുണ്ട്. വിഡിയോ എടുക്കുന്നതിനുമുൻപ് ഞങ്ങൾ സംസാരിച്ചിരുന്നു. സന്തോഷിന് പറയാനുള്ളത് എന്നോട് തുറന്നുപറഞ്ഞു. ഒരു നടനെക്കുറിച്ച് സംസാരിക്കാം, നടന്റെ സിനിമയെക്കുറിച്ചും സംസാരിക്കാം.

എന്നാൽ നടന്റെ സ്വകാര്യ ജീവിതത്തേക്കുറിച്ച് സംസാരിക്കാൻ നിങ്ങൾക്ക് അധികാരമില്ല. ലാലേട്ടനെക്കുറിച്ച് നിങ്ങൾ സംസാരിച്ചു. നിങ്ങൾ ചെയ്തത് തെറ്റാണോ അല്ലയോ നിങ്ങളെന്തെങ്കിലും നേരിട്ട് കണ്ടിട്ടുണ്ടോ ലാലേട്ടന്റെ ഫാൻസ് പ്രതികരിക്കും. ഞാനും ലാലേട്ടന്റെ ഫാൻ ആണ്. ലാൽ സാറിന്റെ ഭാര്യയോടാണ് ആദ്യം മാപ്പ് പറയേണ്ടത്.' ബാല വിഡിയോയിൽ സന്തോഷ് വർക്കിയോട് പറഞ്ഞു. ഇതോടെ താൻ ചെയ്തത് തെറ്റാണ് എന്ന് സമ്മതിച്ച സന്തോഷ് മോഹൻലാലിനോടും അദ്ദേഹത്തിന്റെ കുടുംബത്തോടും ആരാധകരോടും മാപ്പു പറഞ്ഞു. മലയാളത്തിലെ ഒരു നടിയെ സന്തോഷ് വർക്കി ബോഡി ഷെയ്മിങ് നടത്തിയതിനെ വിമർശിച്ചും ബാല രംഗത്തെത്തി.

'നമ്മുടെ വീട്ടിലെ ആരെയെങ്കിലും കുറിച്ച് സംസാരിച്ചാൽ ചുമ്മാതിരിക്കുമോ അവർക്ക് ചേട്ടനോ അനിയനോ ഉണ്ടെങ്കിൽ നിങ്ങളെ വെറുതെ വിടുമോ അത് തെറ്റാണ്. നിങ്ങൾ നല്ല വ്യക്തിയായതുകൊണ്ടാണ് ഞാൻ ഇത് പറയുന്നത്. സിനിമ കണ്ട് അതിലെ നടനെക്കുറിച്ച് എന്തുവേണമെങ്കിലും പറയാം. എന്നാൽ നടന്റേയോ നടിയുടേയോ ശരീരഭാഗങ്ങളെക്കുറിച്ചും സ്വകാര്യ ജീവിനതത്തെക്കുറിച്ചോ സംസാരിക്കാൻ അധികാരമില്ല. നിങ്ങൾക്ക് മാത്രമല്ല ആർക്കും അതിനുള്ള അധികാരമില്ല. നിങ്ങൾ വൈറലായ ആളല്ലേ, നിങ്ങൾ പറയുന്നത് കുട്ടികൾ കാണില്ല. നിങ്ങളുടെ അമ്മ കാണില്ലേ അവർക്ക് വിഷമമാവില്ലേ' ബാല പറഞ്ഞു. തന്റെ തെറ്റുകളെല്ലാം സമ്മതിച്ച സന്തോഷ് വർക്കി മാപ്പ് പറഞ്ഞു.