മുംബൈ: സൽമാൻ ആരാധകർ ഏറെ ആകാംക്ഷയോടെ കാത്തിരുന്ന ചിത്രമാണ് ടൈഗർ 3. ദീപാവലി ദിനത്തിൽ തിയറ്ററുകളിലെത്തിയ ചിത്രത്തിന് മികച്ച പ്രതികരണമാണ് ലഭിക്കുന്നത്. ഇപ്പോഴിതാ സോഷ്യൽ മീഡിയയിൽ ഇടംപിടിക്കുന്നത് ചിത്രത്തിന്റെ പ്രദർശനത്തിനിടെ തിയറ്ററിൽ പടക്കം പൊട്ടിക്കുന്ന സൽമാൻ ആരാധകരുടെ വിഡിയോയാണ്. അൽപ്പം അതിരു കവിഞ്ഞ ആവേശം തന്നെയാണ് സിനിമയ്ക്ക് ലഭിക്കുന്നത്.

മഹാരാഷ്ട്രയിലെ നാസിക് ജില്ലയിലെ മലേഗാവിലെ മോഹൻസ് സിനിമാസ് തിയറ്ററിലാണ് ആവേശം മൂത്ത് ഒരുകൂട്ടം ആരാധകർ പടക്കം പൊട്ടിച്ചത്. ഹൗസ്ഫുള്ളായ തിയറ്ററിൽ ജനങ്ങൾ ചിതറിയോടുന്നതും വിഡിയോയിൽ കാണാം. സിനിമ തിയറ്ററിൽ പടക്കം പൊട്ടിച്ചതിനെതിരെ രൂക്ഷ വിമർശനമാണ് സോഷ്യൽ മീഡിയയിൽ ഉയരുന്നത്.

സൽമാൻ ഖാനെ കേന്ദ്രകഥാപാത്രമാക്കി മനീഷ് ശർമ സംവിധാനം ചെയ്ത ചിത്രമാണ് ടൈഗർ 3. 2012 ൽ പുറത്തിറങ്ങിയ 'എക് ഥാ ടൈഗറി'ന്റെ മൂന്നാംഭാഗമാണിത്. ആദ്യദിനം 44.50 കോടിയാണ് ചിത്രം നേടിയിരിക്കുന്നത്. കത്രീന കൈഫാണ് നായിക. ഇമ്രാൻ ഹാഷ്മിയാണ് ചിത്രത്തിലെ വില്ലൻ. അശുതോഷ് റാണ, രേവതി, റിദ്ദി ദോഗ്ര രൺവീർ ഷൂരേ എന്നിവരാണ് മറ്റുതാരങ്ങൾ. ചിത്രത്തിൽ പത്തനായി ഷാറൂഖ് ഖാനും അതിഥി വേഷത്തിൽ എത്തുന്നുണ്ട്. ഫസ്റ്റ് ഷോ കഴിഞ്ഞതിന് പിന്നാലെ ഷാറൂഖ് ഖാന്റേയും സൽമാന്റേയും രംഗങ്ങൾ സമൂഹമാധ്യമങ്ങളിൽ വൈറലായിരുന്നു.

നവംബർ 12 ന് ദീപാവലി റിലീസായി എത്തിയ ചിത്രത്തിന് മികച്ച അഭിപ്രായമാണ് ലഭിക്കുന്നത്. ട്രേഡ് അനലിസ്റ്റുകൾ പുറത്തുവിട്ട റിപ്പോർട്ട് പ്രകാരം ആദ്യദിനം 44.5 കോടി രൂപയാണ് സമാഹരിച്ചത്. ഇതോടെ ഏറ്റവും മികച്ച ഓപ്പണിങ് കളക്ഷൻ നേടിയ സൽമാൻ ചിത്രമായി ടൈഗർ 3 മാറിയിരിക്കുകയാണ്. 2019 ൽ പുറത്തിറങ്ങിയ 'ഭാരത്' ആണ് ഇതിന് മുമ്പ് ആദ്യദിനം കൂടുതൽ കളക്ഷൻ നേടിയ സൽമാൻ ചിത്രം. 42.30 കോടിയാണ് സ്വന്തമാക്കിയത്. കത്രീന കൈഫ് നായികയായി എത്തിയ 2015 ൽ പുറത്തിറങ്ങിയ 'പ്രേം രത്തൻ ധൻ പായോ എന്ന ചിത്രവും ആദ്യദിനം മികച്ച കളക്ഷൻ നേടി. 40 കോടിയായിരുന്നു ഓപ്പണിങ് കളക്ഷൻ

ഷാറൂഖ് ഖാന്റെ പത്താന് ശേഷം വൈ.ആർ.എഫ് സ്‌പൈ യൂണിവേഴ്‌സിൽ പുറത്തിറങ്ങുന്ന ചിത്രമാണ് ടൈഗർ 3. ചിത്രത്തിൽ പത്തനായി ഷാറൂഖ് ഖാനും എത്തിയിരുന്നു . തിയറ്ററുകളിൽ നിന്ന് സൽമാൻ- എസ്. ആർ.കെ കോമ്പോക്ക് മികച്ച പ്രതികരണമാണ് ലഭിക്കുന്നത്. ഷാറൂഖിന്റെ പത്താനിലും സൽമാൻ ടൈഗറായി കാമിയോ റോളിൽ എത്തിയിരുന്നു. എന്നാൽ പത്താന്റെ ഓപ്പണിങ് കളക്ഷൻ ബ്രേക്ക് ചെയ്യാൻ ടൈഗറിനായിട്ടില്ല. ആദ്യദിനം 100 കോടി രൂപയാണ് പത്താൻ നേടിയത്. 1,050.30 കോടിയാണ് ചിത്രത്തിന്റെ ആകെ കളക്ഷൻ.

 

മറുനാടന്‍ ഡെസ്‌ക്‌

    മറുനാടന്‍ ഡെസ്‌ക്‌