മനസ്സ് കൈവിട്ട ആര്‍തറും ഹാര്‍ലിയും പ്രണയിക്കുമ്പോള്‍; അമ്പരപ്പിക്കാന്‍ വീണ്ടും ജോക്കര്‍ എത്തുന്നു; ട്രെയ്ലര്‍ പുറത്ത്
ന്യൂയോര്‍ക്ക്: ഹോളിവുഡ് ഏറെ പ്രതീക്ഷയോടെ കാത്തിരിക്കുന്ന ജോക്കര്‍: ഫോളി എ ഡ്യൂക്‌സിന്റെ ഒഫീഷ്യല്‍ ട്രെയിലര്‍ എത്തി. ജോക്കറായും ഹാര്‍ലി ക്വിനായും ജോക്വിന്‍ ഫീനിക്‌സും ലേഡി ഗാഗയും ചിത്രത്തില്‍ പ്രധാന വേഷത്തില്‍ എത്തുന്ന ചിത്രമാണിത്. 2019ലെ സിനിമയുടെ തുടര്‍ച്ച എന്ന നിലയിലാണ് ചിത്രമെത്തുന്നത്.
ചിത്രത്തിന്റെ ദൈര്‍ഘ്യം 2 മണിക്കൂര്‍ 20 മിനിറ്റാണെന്ന് അമേരിക്കന്‍ മാധ്യമങ്ങള്‍ റിപ്പോര്‍ട്ട് ചെയ്തു. ആദ്യഭാഗത്തിന് 2 മണിക്കൂര്‍ 2 മിനിറ്റായിരുന്നു ദൈര്‍ഘ്യം. ഒക്ടോബര്‍ 2 നാണ് ചിത്രം ആഗോളതലത്തില്‍ റിലീസ് ചെയ്യുന്നത്. അമേരിക്കയില്‍ ഒക്ടോബര്‍ 4 ന് ചിത്രം പുറത്തിറങ്ങും.
മാനസികമായ പ്രശ്നങ്ങള്‍ നേരിടുന്നവരെ ചികിത്സിയ്ക്കുന്ന കേന്ദ്രത്തില്‍ വച്ച് ഹാര്‍ലിന്‍ ക്വിന്‍ ആര്‍തറിനെ (ജോക്കര്‍) കണ്ടുമുട്ടുന്നു. ആദ്യ കാഴ്ചയില്‍ തന്നെ ഹാര്‍ലിയ്ക്ക് ആര്‍തറിനോട് ഇഷ്ടം തോന്നുന്നു. അത് കടുത്ത അഭിനിവേശമായും പ്രണയമായും പരിണമിക്കുന്നു. അപകടകാരികളായ രണ്ടു പേര്‍ ഒന്നിക്കുമ്പോഴുണ്ടാകുന്ന ഭീകരസംഭവങ്ങളിലേക്കാണ് ചിത്രം പിന്നീട് സഞ്ചരിക്കുന്നത്.
2019ല്‍ ഒട്ടേറെ ആരാധക പ്രീതി പിടിച്ചുപറ്റിയ ജോക്കറിന്റെ ആദ്യത്തെ ഭാഗം ആര്‍ റേറ്റഡ് സിനിമ ചരിത്രത്തില്‍ ലോകത്താകെ സാമ്പത്തികമായി വലിയ വിജയമാണ് നേടിയത്. സ്യൂഡോ ബുള്‍ബാര്‍ എന്ന അവസ്ഥയ്ക്ക് സമാനമായ മാനസിക വെല്ലുവിളി നേരിടുന്ന ആര്‍തറിനെ അതിമനോഹരമായാണ് വാക്വിന്‍ ഫീനിക്‌സ് അവതരിപ്പിച്ചിച്ചത്. കഥാപാത്രത്തിന്റെ പരാധീനതകള്‍ തന്നിലേക്ക് പൂര്‍ണമായും ആവേശിച്ച് പ്രേക്ഷരില്‍ കടുത്ത വൈകാരികഭാരമാണ് വാക്വിന്‍ ഫീനിക്‌സ് സൃഷ്ടിച്ചത്. ആ വര്‍ഷത്തെ ഓസ്‌കര്‍ അടക്കം മികച്ച നടനുള്ള ഒട്ടേറെ പുരസ്‌കാരങ്ങള്‍ വാക്വിന്‍ ഫീനിക്‌സ് സ്വന്തമാക്കുകയും ചെയ്തു.
രണ്ടാം ഭാഗത്തിനായുള്ള തുറന്ന സാധ്യതകള്‍ മുന്നോട്ടു വെച്ചുകൊണ്ടാണ് ഒന്നാം ഭാഗം അവസാനിച്ചത്. ചിത്രത്തില്‍ ബാറ്റ്മാന്‍ വരുമെന്നും അതുകൊണ്ടു തന്നെ കോമിക് ചിത്രമായിരിക്കും ഇതെന്നും റിപ്പോര്‍ട്ടുകളുണ്ടായിരുന്നു. ആദ്യഭാഗത്തിന് സമാനമായി സൈക്കോളജിക്കല്‍ ത്രില്ലറായാണ് ജോക്കര്‍ 2 ഒരുക്കിയിരിക്കുന്നത്.സാസീ ബീറ്റ്സ്, ബ്രെന്‍ഡന്‍ ഗ്ളീസണ്‍, കാതറീന്‍ കീനര്‍, ജോക്കബ് ലോഫ് ലാന്‍ഡ്, ഹാരി ലോവ്റ്റെ എന്നിവരാണ് മറ്റ് അഭിനേതാക്കള്‍.കഴിഞ്ഞ ദിവസം പുറത്തുവിട്ട ചിത്രത്തിന്റെ ട്രെയ്ലറിന് മികച്ച പ്രതികരണമാണ് ലഭിക്കുന്നത്.
