കാന്താര 2 അടുത്ത വര്‍ഷം തിയറ്ററുകളിലെന്ന് റിപ്പോര്‍ട്ട്; ചിത്രത്തിന്റെ ഷൂട്ടിംഗ് അവസാന ഘട്ടത്തില്‍
മംഗളുരു: ഇന്ത്യന്‍ സിനിമയില്‍ അത്ഭുതം സൃഷ്ടിച്ച സിനിമയാണ് കാന്താര. ബോക്‌സോഫീസിലും ഉജ്ജ്വലമായ ചിത്രം. റിഷബ് ഷെട്ടിയെ ഇന്ത്യന്‍ സിനിമാ ലോകത്ത് ശ്രദ്ധേയനാക്കിയ ചിത്രമായിരുന്നു ഇത്. ഈ സിനിമയുടെ രണ്ടാം ഭാഗവും എത്തുകയാണ്. ചിത്രം അടുത്ത വര്‍ഷം തീയറ്ററുകളില്‍ എത്തുമെന്നാണ് റിപ്പോര്‍ട്ട്.
ചിത്രത്തിന്റെ ഷൂട്ടിങ് അവസാനഘട്ടത്തിലാണെന്നും ഇനി ഇന്‍ഡോര്‍ ഷൂട്ടിങ് മാത്രമാണ് ബാക്കിയുള്ളതെന്നും പിങ്ക് വില്ല റിപ്പോര്‍ട്ട് ചെയ്യുന്നു. നിലവില്‍ ചിത്രീകരണം ബാക്കിയുണ്ടെങ്കിലും ചിത്രത്തിന്റെ പോസ്റ്റ് പ്രൊഡക്ഷന്‍ ജോലികള്‍ ആരംഭിച്ച് കഴിഞ്ഞു. ഹോംബാലെ ഫിലിംസ് തന്നെയാണ് കാന്താര 2 വും നിര്‍മ്മിക്കുന്നത്. റിഷബ് ഷെട്ടിയാണ് ചിത്രത്തിലെ നായകന്‍.
ചിത്രം 2025 വേനല്‍ക്കാലത്തോടെ ചിത്രം തിയറ്ററുകളില്‍ എത്തിക്കാനാണ് നിര്‍മ്മാതാക്കള്‍ ലക്ഷ്യമിടുന്നത്. 'കന്താര 2 കന്താരയേക്കാള്‍ വളരെ വലുതാണ്, കഥയില്‍ പ്രീക്വലും പുരാണ ഘടകങ്ങളും ഉള്‍പ്പെടുത്തിയിട്ടുണ്ട്'ചിത്രത്തോട് അടുത്ത വൃത്തങ്ങള്‍ വെളിപ്പെടുത്തി. കാന്താരയ്ക്ക് മുന്നേ എന്തായിരുന്നുവെന്ന അന്വേഷണമായിരിക്കും ചിത്രത്തില്‍ ഉണ്ടാകുക.
2022 സെപ്റ്റംബറിലായിരുന്നു കാന്താര പ്രദര്‍ശനത്തിനെത്തിയത്. കന്നഡ ഭാഷയിലെത്തിയ ചിത്രം പിന്നാലെ തന്നെ രാജ്യത്താകമാനം വന്‍തോതില്‍ ശ്രദ്ധിക്കപ്പെട്ടു. 'കെജിഎഫ്' നിര്‍മ്മാതാക്കളായ ഹൊംബാളെ ഫിലിംസിന്റെ ബാനറിലായിരുന്നു കാന്താരയും എത്തിയത്.
