ജയറാമിന്റെ 'അബ്രഹാം ഓസ്‌ലർ'; അതിഥി താരമായി മമ്മൂട്ടി?; മെഡിക്കൽ പശ്ചാത്തലത്തിലുള്ള ഇൻവെസ്റ്റിഗേറ്റീവ് ത്രില്ലർ; മിഥുൻ മാനുവൽ തോമസ് സംവിധാനം ചെയ്യുന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്ത്
കൊച്ചി: ഒരിടവേളയ്ക്ക് ശേഷം ജയറാം അഭിനയിക്കുന്ന മലയാള ചലച്ചിത്രം 'അബ്രഹാം ഓസ്‌ല'റിന്റെ ഫസ്റ്റ് ലുക്ക് പോസ്റ്റർ പുറത്തുവിട്ടു. മിഥുൻ മാനുവൽ തോമസ് ആണ് സംവിധാനം ചെയ്യുന്നത്. 'അഞ്ചാം പാതിരാ'യ്ക്ക് ശേഷം മിഥുൻ സംവിധാനം ചെയ്യുന്ന ചിത്രത്തിനായി ഏറെ ആവേശത്തോടെ കാത്തിരിക്കുകയാണ് മലയാളികളും. ഈ അവസരത്തിൽ ചിത്രത്തിലെ ഒരു ഗസ്റ്റ് റോളുമായി ബന്ധപ്പെട്ട ചർച്ചകളാണ് ട്വിറ്ററിൽ ശ്രദ്ധനേടുന്നത്.
അബ്രഹാം ഓസ്‌ലറിൽ മമ്മൂട്ടി അതിഥി താരമായി എത്തുന്നുവെന്നാണ് റിപ്പോർട്ടുകൾ. ചിത്രത്തിലെ സുപ്രധാനമായ വേഷമാകും ഇതെന്നും 15 മിനിറ്റാകും മമ്മൂട്ടിയുടെ റോളുള്ളതെന്നും ചർച്ചകളുണ്ട്. ഈ റിപ്പോർട്ടുകൾ അനുസരിച്ചാണെങ്കിൽ ധ്രുവം, ട്വന്റി ട്വന്റി, കനൽക്കാറ്റ് തുടങ്ങിയ ചിത്രങ്ങൾക്ക് ശേഷം ജയറാമും മമ്മൂട്ടിയും ഒന്നിക്കുന്ന സിനിമ കൂടി ആയിരിക്കും ഇത്. ഇക്കാര്യത്തിൽ ഔ?ദ്യോ?ഗിക വിശദീകരണങ്ങൾ ഒന്നും തന്നെ വന്നിട്ടില്ല.
സോൾട്ട് ആൻ പെപ്പർ ലുക്കിൽ ഗൗരവത്തിൽ ഇരിക്കുന്ന ജയറാമിനെയാണ് ഫസ്റ്റ് ലുക്ക് പോസ്റ്ററിൽ കാണുന്നത്. അഞ്ചാം പാതിരയ്ക്കുശേഷം മിഥുൻ മാനുവൽ സംവിധാനം ചെയ്യുന്ന ചിത്രം മെഡിക്കൽ ത്രില്ലർ സ്വഭാവത്തിലുള്ളതായിരിക്കും. സിനിമയുടെ ചിത്രീകരണത്തിന് ഇന്ന് തുടക്കമായി. തൃശൂർ, കോയമ്പത്തൂർ, വയനാട് എന്നിവിടങ്ങളിലാണ് ചിത്രീകരണം നടക്കുന്നത്. ഇർഷാദ് എം. ഹസ്സനൊപ്പം മിഥുൻ മാനുവൽ തോമസും ചേർന്നാണ് ചിത്രത്തിന്റെ നിർമ്മാണം.
മെയ് ഇരുപതിനാണ് അബ്രഹാം ഓസ്‌ലർ ആരംഭിച്ചത്. ജയറാമും സായ്കുമാറും പങ്കെടുക്കുന്ന രംഗമായിരുന്നു ആദ്യം ചിത്രീകരിച്ചത്. മെഡിക്കൽ പശ്ചാത്തലത്തിലൂടെ ഒരുക്കുന്ന ഒരു ക്രൈം ത്രില്ലറാണ് 'അബ്രഹാം ഓസ്‌ലർ'. ഒരു മരണത്തിന്റെ അന്വേഷണമാണ് ചിത്രം. ഏറെ ദുരുഹതകളും സസ്‌പെൻസുമൊക്കെ നിറഞ്ഞ ഇൻവെസ്റ്റിഗേറ്റീവ് ത്രില്ലറായിരിക്കും ചിത്രം. അർജുൻ അശോകൻ, ജഗദീഷ്, ദിലീഷ് പോത്തൻ, അനശ്വരരാജൻ, സെന്തിൽ കൃഷ്മ, അർജുൻ നന്ദകുമാർ, ആര്യ സലിം, അസീം ജമാൽ എന്നിവരും പ്രധാന വേഷങ്ങളിലുണ്ട്. ഡോ. രൺധീർ കൃഷ്ണന്റേതാണ് തിരക്കഥ. തേനി ഈശ്വറാണ് ചിത്രത്തിന്റെ തിരക്കഥ.
സംഗീതം മിഥുൻ മുകുന്ദ്, എഡിറ്റിങ് സൈജു ശ്രീധർ, കലാസംവിധാനം ഗോകുൽദാസ്, മേക്കപ്പ് റോണക്‌സ് സേവ്യർ, കോസ്റ്റ്യും ഡിസൈൻ അരുൺ മനോഹർ, ക്രിയേറ്റീവ് ഡയറക്ടർ പ്രിൻസ് ജോയ്, അസ്റ്റോസ്സിയേറ്റ് ഡയറക്ടേർസ് റോബിൻ വർഗീസ്, രജീഷ് വേലായുധൻ, നിർമ്മാണം ഇർഷാദ് എം ഹസ്സൻ, മിഥുൻ മാനുവൽ തോമസ്, എക്‌സിക്യുട്ടീവ് പ്രൊഡ്യൂസർ ജോൺ മന്ത്രിക്കൽ, ലൈൻ പ്രൊഡ്യൂസർ സുനിൽ സിങ്, പ്രൊഡക്ഷൻ എക്‌സിക്യുട്ടീവ് പ്രസാദ് നമ്പ്യാങ്കാവ്, പ്രൊഡക്ഷൻ കൺട്രോളർ പ്രശാന്ത് നാരായണൻ, ഫോട്ടോ സുഹൈബ്, പിആർഒ വാഴൂർ ജോസ് എന്നിവരാണ് മറ്റ് അണിയറ പ്രവർത്തകർ.
