നൻപകൽ നേരത്തെ മയക്കത്തിലെ മമ്മൂട്ടിയുടെ പ്രകടനം കണ്ട് ഞെട്ടി ഗൗതം ഘോഷ്; ഇതുവരെ പുരസ്‌കാരം കിട്ടിയിട്ടില്ലെന്നത് കുഞ്ചാക്കോയ്ക്കും മുൻതൂക്കം നൽകുന്നു; ജയ ജയ ഹേയും അപ്പനും നടിയെ നിശ്ചയിക്കും; സംസ്ഥാന ചലച്ചിത്ര പുരസ്‌കാരം സസ്‌പെൻസ് ത്രില്ലറാകും
കൊച്ചി: ഈ വർഷത്തെ സംസ്ഥാന ചലച്ചിത്ര പുരസ്‌കാരം സസ്‌പെൻസ് ത്രില്ലറാകും. 3 മണിക്ക് സാംസ്‌കാരിക മന്ത്രിയാണ് പ്രഖ്യാപനം നടത്തുക. മികച്ച നടൻ, നടി, സിനിമ അടക്കമുള്ള വിഭാഗങ്ങളിലേക്ക് ശക്തമായ മത്സരമാണ് നടക്കുന്നത്. മികച്ച നടനാകാൻ കടുത്ത മത്സരം. പ്രമുഖ ബംഗാളി ചലച്ചിത്രപ്രവർത്തകൻ ഗൗതം ഘോഷിന്റെ നേതൃത്വത്തിലുള്ള ജൂറിയാണ് അവാർഡ് നിർണ്ണയിക്കുന്നത്.
നൻപകൽ നേരത്ത് മയക്കം, പുഴു, റോഷാക്ക് ,ഭീഷ്മപർവ്വം അടക്കം ഹിറ്റുകളുടെ തിളക്കത്തിൽ ബഹുദൂരം മുന്നിലുണ്ട് മമ്മൂട്ടി. ന്നാ താൻ കേസ് കൊട്, അറിയിപ്പ് എന്നീ ചിത്രങ്ങളിലെ മികവാർന്ന അഭിനയത്തിലൂടെ കുഞ്ചാക്കോ ബോബനും, മലയൻകൂഞ്ഞിലൂടെ ഫഹദ് ഫാസിലും, വഴക്ക് അദൃശ്യ ജാലകങ്ങൾ എന്നീ സിനിമകളിലെ അഭിനയത്തിന് ടോവിനോയും ശക്തമായ മത്സരരംഗത്തുണ്ട്. എന്നാൽ മമ്മൂട്ടിക്കാണ് കൂടുതൽ മുൻതൂക്കം. അലൻസിയറിന് അപ്പനിലെ പ്രകടനവും നിർണ്ണായകമാണ്.
ജയജയജയ ജയഹേ സിനിമയിലെ പ്രകടനത്തിന് ദർശന രാജേന്ദ്രനും, അറിയിപ്പിലെ അഭിനയത്തിന് ദിവ്യപ്രഭയും മികച്ച നടിയാകാൻ മത്സരിക്കുന്നു. നന്പകൽ നേരത്ത് മയക്കം, അപ്പൻ, ഇലവീഴാപൂഞ്ചിറ, സൗദി വെള്ളക്ക, ഏകൻ അനേകൻ, അടിത്തട്ട് , ബി32 മുതൽ 44 വരെ, അവസാന റൗണ്ടിലെത്തിയത് 44 സിനിമകൾ. സൗദി വെള്ളക്കയിലെ മിന്നും പ്രകടനത്തിന് ദേവി വർമ്മയ്ക്കും പുരസ്‌കാര സാധ്യതയേറെ. അതിനിടെ ജയജയജയ ജയഹേയിലെ അഭിനയം ബേസിൽ ജോസഫിനും നടനുള്ള പുരസ്‌കാര സാധ്യത ഏറെയുണ്ട്.
ജൂറിയുടെ വിലയിരുത്തൽ നേരത്തേ പൂർത്തിയായെങ്കിലും ആർക്കാണ് പുരസ്‌കാരം എന്ന് വ്യാഴാഴ്ച രാത്രിയാണ് നിശ്ചയിച്ചത്. അവാർഡിന്റെ രഹസ്യസ്വഭാവം നിലനിർത്താൻകൂടിയാണ് പ്രഖ്യാപനത്തിന്റെ തലേന്നുമാത്രം പുരസ്‌കാരനിർണയത്തിന്റെ അവസാനഘട്ടം നടത്തിയത്. ഉമ്മൻ ചാണ്ടിയുടെ നിര്യാണത്തെത്തുടർന്ന് ബുധനാഴ്ചത്തെ പ്രഖ്യാപനം വെള്ളിയാഴ്ചത്തേക്ക് മാറ്റുകയായിരുന്നു. 154 ചിത്രങ്ങളാണ് ഇക്കുറി മത്സരത്തിനുണ്ടായിരുന്നത്.
രണ്ടു പ്രാഥമികസമിതികളുടെ വിലയിരുത്തലിനുശേഷം അവാർഡിന് പരിഗണിക്കേണ്ട സിനിമകളുടെ അന്തിമപട്ടിക ഗൗതം ഘോഷിന്റെ നേതൃത്വത്തിലുള്ള മുഖ്യജൂറി വിലയിരുത്തി. മികച്ച സിനിമയ്ക്കുള്ള പുരസ്‌കാരത്തിന് പുതുമുഖങ്ങളുടേതടക്കമുള്ളവരുടെ ചിത്രങ്ങളാണ് അവസാനപട്ടികയിൽ ഇടംപിടിച്ചത്.
