ഫഹദ് നായകനാകുന്ന അഖിൽ സത്യൻ ചിത്രം 'പാച്ചുവും അത്ഭുതവിളക്കും' ട്രെയിലർ പുറത്തിറങ്ങി. ഏപ്രിൽ 28ന് തിയറ്ററുകളിൽ എത്തുന്ന ചിത്രത്തിൽ ഇന്നസന്റും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഒരു കോമഡി ഫീൽ ഗുഡ് വിഭാഗത്തിൽ പെടുന്ന ചിത്രമായിരിക്കും എന്ന് ട്രെയിലറിൽ നിന്ന് വ്യക്തമാണ്.
ഫുൾ മൂൺ സിനിമയുടെ ബാനറിൽ സേതു മണ്ണാർകാടാണ് ചിത്രം നിർമ്മിക്കുന്നത്. സംവിധായകൻ സത്യൻ അന്തിക്കാടിന്റെ മകൻ അഖിൽ സത്യൻ ആദ്യമായി സംവിധാനം ചെയ്യുന്ന ചിത്രമാണ് 'പാച്ചുവും അത്ഭുതവിളക്കും'. ഏറെ നാളായി സത്യൻ അന്തിക്കാടിന്റെ സഹസംവിധായകനായി പ്രവർത്തിച്ചു വരുകയായിരുന്നു അഖിൽ. ഫഹദ് സത്യൻ അന്തിക്കാട് ചിത്രം 'ഞാൻ പ്രകാശനി'ലും അഖിൽ സഹസംവിധായകനായിരുന്നു.
ശരൺ വേലായുധൻ ഛായാഗ്രഹണവും ജസ്റ്റിൻ വർഗ്ഗീസ് സംഗീതവും കൈകാര്യം ചെയ്യും. മുകേഷ്, ഇന്ദ്രൻസ്, അൽത്താഫ് സലിം, നന്ദു എന്നിവരും ചിത്രത്തിൽ അണിനിരക്കുന്നുണ്ട്. പ്രൊഡക്ഷൻ ഡിസൈൻ രാജീവൻ, വസ്ത്രാലങ്കാരം ഉത്തര മേനോൻ തുടങ്ങിയവരാണ് മറ്റു അണിയറപ്രവർത്തകർ.
