മുംബൈ: ബോളിവുഡിലെ സൂപ്പർതാരങ്ങളിൽ ഒരാളാണ് ആമിർ ഖാൻ. ചെറിയ ഇടവേളയ്ക്കു ശേഷം വീണ്ടും അഭിനയത്തിൽ സജീവമാകാനുള്ള തയ്യാറെടുപ്പിലാണ് താരം. അടുത്തിടെ ആമിർഖാൻ പ്രൊഡക്ഷൻ പുറത്തിറക്കിയ ലാപതാ ലേഡീസ് എന്ന ചിത്രം വലിയ ഹിറ്റായിരുന്നു. ഇനി സിനിമിയൽ കൂടുതൽ സജീവമാകുകയാണ് താരം. ഇതിനിടെ മുംബൈയിൽ പുതിയ ആഡംബര വസതി സ്വന്തമാക്കിയിരിക്കുകയാണ് ആമിർ.

മുംബൈയിലെ പാലി ഹാലിയിലാണ് താരം പ്രോപ്പർട്ടി വാങ്ങിയത്. 9.75 കോടി വിലവരുന്നതാണ് പ്രോപ്പർട്ടി. 58.5 ലക്ഷം രൂപ സ്റ്റാമ്പ് ഡ്യൂട്ടിയും 30,000 രൂപ രജിസ്ട്രേഷൻ ഫീസും താരം അടച്ചു. 1027 സ്‌ക്വയർ ഫീറ്റ് വരുന്ന വീട് റെഡി ടു മൂവ് ഇൻ ആണ്.

മുംബൈയിൽ നിരവധി പ്രോപ്പർട്ടികളാണ് ആമിർ ഖാന്റെ പേരിലുള്ളത്. ബാന്ദ്രയിൽ 5000 സ്‌ക്വയർ ഫീറ്റിൽ രണ്ട് നിലകളിലായുള്ള ഒരു പ്രോപ്പർട്ടി താരത്തിനുണ്ട്. കടലിന് അഭിമുഖമായാണ് ഈ വീട് സ്ഥിതിചെയ്യുന്നത്. 2013ൽ ഏഴ് കോടി വിലയുള്ള ഒരു ഫാം ഹൗസും താരം വാങ്ങിയിരുന്നു.