സൽമാൻ ഖാൻ ഇന്ത്യൻ ഗായകരെ മാറ്റി പാക്കിസ്ഥാനികൾക്ക് അവസരം കൊടുത്തയാൾ; ആരോപണങ്ങളുമായി ഗായകൻ അഭിജിത്ത് ഭട്ടാചാര്യ

മുംബൈ: നടൻ സൽമാൻ ഖാനെതിരെ ആഞ്ഞടിച്ച് ബോളിവുഡ് പിന്നണി ഗായകൻ അഭിജിത്ത് ഭട്ടാചാര്യ. സൽമാൻ പ്രതിയായ 'ഹിറ്റ് ആൻഡ് റൺ' കേസിൽ സൽമാനെ ഒരുക്കിൽ ന്യായീകരിച്ചു വന്നയാളാണ് അഭിജിത്ത്. എന്നാൽ സൽമാനുമായി അത്ര നല്ല ബന്ധത്തിലല്ലെന്ന് സൂചിപ്പിച്ചു അഭിജിത്ത് രംഗത്തു വന്നു. താൻ സൽമാനെ പിന്തുണച്ച് സംസാരിച്ചിട്ടില്ലെന്നും തന്റെ വെറുപ്പ് പോലും സൽമാൻ അർഹിക്കുന്നില്ലെന്നും അദ്ദേഹം തുറന്നടിച്ചു.

'സൽമാൻ ഖാൻ ഒരു ദൈവമല്ല. അങ്ങനെയാണെന്ന് അയാൾ സ്വയം വിശ്വസിക്കുകയാണ്. ശത്രുരാജ്യങ്ങളിൽ നിന്നുള്ള കലാകാരന്മാരെ മാത്രം പ്രോത്സാഹിപ്പിക്കുന്ന ഇങ്ങനെയൊരാളെ പിന്തുണച്ച് ഞാൻ സംസാരിക്കുമെന്ന് ആളുകൾക്ക് എങ്ങനെ ചിന്തിക്കാനാകും? പാക്കിസ്ഥാനോടുള്ള കൂറ് കാണിക്കാൻ വേണ്ടി ഇന്ത്യൻ ഗായകരെ മാറ്റി പാക്കിസ്ഥാനികൾക്ക് അവസരം കൊടുത്തയാളാണ് സൽമാൻ. ഇതെല്ലാം ആസൂത്രിതമാണ്. വെറുക്കപ്പെടാൻ പോലും അയാൾ അർഹനാണെന്ന് ഞാൻ കരുതുന്നില്ല', അഭിജിത് ഭട്ടാചാര്യ പറഞ്ഞു.

സൽമാൻ ചിത്രമായ 'ടൈഗർ 3'യിൽ ഗാനം ആലപിച്ച അരിജിത് സിങ്ങിനെയും അഭിജിത് ഭട്ടാചാര്യ വിമർശിച്ചു. 'സുൽത്താൻ' എന്ന ചിത്രത്തിൽ അരിജിത്തിന് പകരം പാക്കിസ്ഥാനി ഗായകൻ റാഹത് ഫത്തേ അലി ഖാനെക്കൊണ്ടാണ് സൽമാൻ പാട്ട് പാടിപ്പിച്ചതെന്നും അഭിജിത്ത് കുറ്റപ്പെടുത്തി.

'ഇത് നാണക്കേടാണ്. രാജ്യത്തെ ഏറ്റവും വലിയ ഗായകനാണ് അരിജിത് സിങ്. തനിക്ക് അവസരം നൽകണമെന്ന് അദ്ദേഹം ഒരിക്കലും സൽമാനോട് യാചിക്കാൻ പാടില്ലായിരുന്നു. പകരം പ്രതിഷേധം അറിയിക്കുകയായിരുന്നു ചെയ്യേണ്ടിയിരുന്നത്. ചിലപ്പോൾ അരിജിത് ഒരു ബംഗാളി ആണോ എന്നുപോലും എനിക്ക് സംശയം തോന്നാറുണ്ട്' -അഭിജിത് ഭട്ടാചാര്യ പറഞ്ഞു.