കൊച്ചി: ഒരിടവേളക്ക് ശേഷം മലയാളത്തിൽ നായികയായി നസ്രിയ വീണ്ടും എത്തുകയാണ്. ബേസിൽ നായകനാ 'സൂക്ഷ്മദർശിനി'യുടെ ഫസ്റ്റ് ലുക്ക് പോസ്റ്റർ ബേസിൽ ജോസഫ് സോഷ്യൽ മീഡിയയിലൂടെ പങ്കിട്ടത്. സിനിമയുടെ ഷൂട്ടിംഗും തുടങ്ങിയിട്ടുണ്ട്. ഇപ്പോഴിതാ സിനിമയുടെ ലൊക്കേഷൻ വീഡിയോ സോഷ്യൽ മീഡിയയിൽ ശ്രദ്ധിക്കപ്പെടുകയാണ്.

നസ്രിയയുടെ സിനിമാ ലൊക്കേഷനിലേക്ക് ഫഹദ് എത്തുന്നതാണ് വീഡിയോ. ചിത്രത്തിന്റെ മേക്കിങ് വീഡിയോ അണിയറപ്രവർത്തകർ ഹാപ്പി അവേർസ് എന്റർടൈന്മെന്റ്‌സ് യുട്യൂബ് ചാനലിലൂടെ പുറത്തുവിട്ടിട്ടുണ്ട്. അതിലാണ് നസ്രിയയെയും ഫഹദിനെയും മറ്റുള്ള അഭിനേതാക്കളെയും കാണാൻ കഴിയുന്നത്.

ബേസിൽ ജോസഫ്, നസ്രിയ നസീം എന്നിവരെ കേന്ദ്ര കഥാപാത്രങ്ങളാക്കി എം.സി. ജിതിൻ സംവിധാനം ചെയ്യുന്ന സിനിമയാണ് 'സൂക്ഷ്മദർശിനി'. ഹാപ്പി അവേർസ് എന്റർടൈന്മെന്റ്‌സിന്റെയും, എ വി എ പ്രൊഡക്ഷൻസിന്റെയും ബാനറുകളിൽ സമീർ താഹിർ, ഷൈജു ഖാലിദ്, എ.വി. അനൂപ് എന്നിവർ ചേർന്ന് നിർമ്മിക്കുന്നതാണ് ഈ സിനിമ.

നോൺസെൻസ് എന്ന ചിത്രത്തിന് ശേഷം എം.സി. ജിതിൻ സംവിധാനം ചെയ്യുന്ന ചിത്രമാണ് സൂക്ഷ്മദർശിനി. എം.സി. ജിതിൻ, അതുൽ രാമചന്ദ്രൻ എന്നിവരുടെ കഥക്ക് എം.സി. ജിതിൻ, അതുൽ രാമചന്ദ്രൻ, ലിബിൻ ടി.ബി. എന്നിവർ ചേർന്ന് തിരക്കഥയും സംഭാഷണവും രചിച്ച ചിത്രത്തിനായി സംഗീതം ഒരുക്കുന്നത് ക്രിസ്റ്റോ സേവ്യറാണ്. ദീപക് പരമ്‌ബോൽ, സിദ്ധാർഥ് ഭരതൻ, മെറിൻ ഫിൽപ്പ്, അഖില ഭാർഗവൻ, പൂജ മോഹൻരാജ്, കോട്ടയം രമേഷ്, ഗോപൻ മങ്ങാട്ട്, മനോഹരി ജോയ്, റിനി ഉദയകുമാർ, ജയ കുറുപ്പ്, മുസ്‌കാൻ ബിസാരിയ, അപർണ റാം, അഭിരാം പൊതുവാൾ, ബിന്നി റിങ്കി, നന്ദൻ ഉണ്ണി, നൗഷാദ് അലി, ആതിര രാജീവ്, മിർസ ഫാത്തിയ തുടങ്ങിയവരാണ് സിനിമയിലെ മറ്റ് അഭിനേതാക്കൾ.