കൊച്ചി: ആവേശം സൂപ്പർഹിറ്റായതോടെ ഫഹദ് ഫാസിലിന്റെ താരമൂല്യം കുതിച്ചുയർന്നിരിക്കയാണ്. പാൻ ഇന്ത്യൻ താരമായി തന്നെയാണ് ഫഹദിനെ ഇപ്പോൾ മറ്റ് സിനിമലോകം നോക്കി കാണുന്നത്. ഇനി വരാനിരിക്കുന്ന ഫഹദ് ചിത്രങ്ങളും ആകാംക്ഷ ഉയർത്തുന്നതാണ്. പുഷ്പ2 ആണ് ആകാംക്ഷയോടെ കാത്തിരിക്കുന്ന അടുത്ത ഫഹദ് ഫാസിൽ ചിത്രം.

ആദ്യഭാഗത്തെ പോലെ പുഷ്പ 2 ലും വില്ലൻ കഥാപാത്രത്തെയാണ് നടൻ അവതരിപ്പിക്കുന്നത്. ആദ്യ ഭാഗത്തിൽ ഫഹദിന്റെ കഥാപാത്രമായ ഭൻവർ സിങ് ഷെഖാവത്തിന് മികച്ച അഭിപ്രായം ലഭിച്ചിരുന്നു. പുഷ്പ 2 ന് വമ്പൻ പ്രതിഫലമാണ് ഫഹദ് വാങ്ങുന്നതെന്നാണ് വിവരം. ഗ്രേറ്റ് ആന്ധ്രയുടെ റിപ്പോർട്ട് പ്രകാരം എട്ട് കോടിയാണ് നടന്റെ പ്രതിഫലം.

കൂടാതെ ഷൂട്ടിങ്ങിനായി നിബന്ധനകളും നടൻ മുന്നോട്ട് വെച്ചിട്ടുണ്ട്. നാല് കോടിയായിരുന്നു ആദ്യ ഭാഗത്തെ നടന്റെ പ്രതിഫലം. സാധാരണ ടോളിവുഡിൽ അഞ്ച് മുതൽ 10 കോടിയാണ് മുൻനിരതാരങ്ങൾക്ക് നൽകുന്നത്. ഇവിടെ ഫഹദിന്റെ ഒരു ദിവസത്തെ പ്രതിഫലം 12 ലക്ഷമാണ്. ഷൂട്ടിങ് ക്യാൻസൽ ചെയ്താലും ഫഹദിന് പ്രതിഫലം ലഭിക്കും. നടന്റെ നിബന്ധന നിർമ്മാതാക്കൾ അംഗീകരിച്ചിട്ടുണ്ട്.

തെന്നിന്ത്യയിലെ ഏറ്റവും വിലയേറിയ വില്ലനായി മാറിയിരിക്കുകയാണ് ഫഹദ്. ഓഗസ്റ്റ്15 നാണ് പുഷ്പ 2 തിയറ്ററുകളിൽ എത്തുന്നത്. എന്നാൽ ചിത്രത്തിന്റെ റിലീസ് നീട്ടിയതായി റിപ്പോർട്ടുണ്ട്. ഔദ്യോഗിക പ്രഖ്യാപനം ഇതുവരെയുണ്ടായിട്ടില്ല. രണ്ടാം ഭാഗത്തിൽ അല്ലുവും ഫഹദും തമ്മിലുള്ള സംഘട്ടന രംഗങ്ങൾ അടക്കം വരാനുണ്ട്. അതിനായി ആകാംക്ഷയോടെ കാത്തിരിക്കുകയാണ് ആരാധകർ.