ഞാൻ തളരുമ്പോൾ ചേർത്തുപിടിക്കും, കണ്ണീർ തുടയ്ക്കും; ഒടുവിൽ കാമുകനൊപ്പമുള്ള ചിത്രം പങ്കുവെച്ച് ഇലിയാന

മുംബൈ: തന്റെ ആദ്യത്തെ കൺമണിക്കായുള്ള കാത്തിരിപ്പിലാണ്‌ബോളിവുഡ് നടി ഇലിയാന ഡിക്രൂസ്. സോഷ്യൽ മീഡിയയിലൂടെ താരം തന്റെ ഗർഭകാല വിശേഷങ്ങൾ എല്ലാം പങ്കുവെക്കാറുണ്ട്. ഇപ്പോൾ ആദ്യമായി തന്റെ കാമുകനൊപ്പമുള്ള ചിത്രം പങ്കുവെച്ചിരിക്കുകയാണ് ഇലിയാന.

അവ്യക്തമായ ബ്ലാക്ക് ആൻഡ് വൈറ്റ് ചിത്രമാണ് താരം പോസ്റ്റ് ചെയ്തിരിക്കുന്നത്. ഗർഭകാലത്തെ തന്റെ അനുഭവങ്ങളാണ് താരം പോസ്റ്റിൽ കുറിക്കുന്നത്. തളർന്നുപോകുന്ന സമയത്ത് തനിക്ക് ധൈര്യം തരുന്നത് കാമുകനാണ് എന്നാണ് ഇലിയാന കുറിച്ചിരിക്കുന്നത്. തന്റെ കണ്ണുനീർ തുടയ്ക്കുകയും തമാശ പറഞ്ഞ് ചിരിപ്പിക്കുകയും ചെയ്യും എന്നുമാണ് താരം കുറിച്ചിരിക്കുന്നത്.

ഇലിയാനയുടെ കുറിപ്പ്

ഗർഭിണിയാവുക എന്നത് മനോഹരമായ അനുഗ്രഹമാണ്. ഇങ്ങനെയൊരു അനുഭവം എന്റെ ജീവിതത്തിലുണ്ടാകുമെന്ന് കരുതിയിരുന്നില്ല. അതിനാൽ ഈ യാത്രയെ തന്നെ ഭാഗ്യമായാണ് ഞാൻ കാണക്കാക്കുന്നത്. നമ്മുടെ ഉള്ളിൽ വളരുന്ന ജീവനെക്കുറിച്ച് എങ്ങനെ വിവരിക്കണം എന്നുപോലും എനിക്കറിയില്ല. കൂടുതൽ സമയവും എന്റെ വയർ വികസിച്ചുവരുന്നതുകൊണ്ട് നിന്നെ ഉടൻ കാണാനാകുമെന്ന പ്രതീക്ഷയിൽ ഏറെ സന്തോഷത്തിലായിരിക്കും.

എന്നാൽ ചില ദിവസങ്ങൾ വളരെ ബുദ്ധിമുട്ടേറിയതായിരിക്കും. ഒരുപാട് കഷ്ടപ്പെട്ടു. എന്റെ പ്രതീക്ഷകളെയെല്ലാം നശിപ്പിക്കും. അവസാനം കണ്ണീരും കുറ്റബോധവുമാകും. എന്റെ തലയ്ക്കുള്ളിലെ ശബ്ദം എന്നെ തകർത്തുകളയും. ചിലസമയങ്ങളിൽ ചെറിയ കാര്യങ്ങളിൽ കരയാത്തതിൽ എനിക്ക് കൃതജ്ഞത തോന്നും. ഞാൻ കുരുത്തുള്ളവളാകണം. കരുത്തില്ലാത്തവളാണെങ്കിൽ ഞാൻ എങ്ങനെ അമ്മയാകും. ഞാൻ എങ്ങനെയുള്ള അമ്മയാകും എന്നെനിക്ക് അറിയില്ല. ഈ കുഞ്ഞ് മനുഷ്യനെ എനിക്കേറെ ഇഷ്ടമാണ് എന്നു മാത്രമേ എനിക്കറിയൂ. ഇപ്പോൾ എനിക്ക് തോന്നുന്നത് അത് മതി എന്നാണ്.

എനിക്ക് എന്നോട് തന്നെ കരുണ തോന്നാത്ത ദിവസങ്ങളിൽ ഈ മനുഷ്യനാണ് എനിക്ക് ധൈര്യം നൽകുന്നത്. ഞാൻ തളർന്നു തുടങ്ങുന്നു എന്ന് മനസ്സിലായാൽ എന്നെ ചേർത്തുപിടിക്കും. കണ്ണീർ തുടച്ചുമാറ്റും. എന്നെ ചിരിപ്പിക്കാൻ തമാശകൾ പറയും. അല്ലെങ്കിൽ എന്റെ മനസ്സ് അറിഞ്ഞ് എന്നെ ആലിംഗനം ചെയ്യും. ആ നിമിഷത്തിൽ എനിക്ക് വേണ്ടത് അതായിരിക്കും. എല്ലാം അത്ര പ്രശ്നമായി തോന്നാറില്ല.