ആകാശത്തല്ലാതെ ഈ ഭൂമിയിൽ ജനിച്ച ഒരേ ഒരു താരം, പച്ചയായ മനുഷ്യൻ, നന്ദി മമ്മൂക്ക ഈ സ്നേഹത്തിനു, ചേർത്തു നിർത്തലിന്; 2018 സിനിമ 150 കോടി ക്ലബ്ബിലെത്തിയതിന് പിന്നാലെ മമ്മൂട്ടിയെ കണ്ട് ജൂഡ് ആന്തണി ജോസഫ്
കൊച്ചി: മലയാള സിനിമയുടെ ചരിത്രം തന്നെ മാറ്റിയെഴുതിയിരിക്കുകയാണ് ജൂഡ് ആന്തണി ജോസഫ് സംവിധാനം ചെയ്ത 2018. മലയാളികളുടെ അതിജീവന കഥ പറഞ്ഞ ചിത്രം ആഗോളതലത്തിൽ നിന്ന് 150 കോടി രൂപയാണ് കളക്ഷനായി നേടിയത്. ചിത്രത്തിന്റെ അണിയറ പ്രവർത്തകർ തന്നെയാണ് സന്തോഷവാർത്ത അറിയിച്ചത്.
ഇപ്പോൾ സിനിമയുടെ വമ്പൻ വിജയത്തിനു പിന്നാലെ മമ്മൂട്ടിയെ കാണാൻ എത്തിയിരിക്കുകയാണ് ജൂഡ്. സോഷ്യൽ മീഡിയയിലൂടെ സൂപ്പർതാരത്തിനൊപ്പമുള്ള ചിത്രങ്ങൾ പങ്കുവച്ച് ജൂഡ് തന്നെയാണ് സന്തോഷവാർത്ത അറിയിച്ചത്. ആകാശത്തല്ലാതെ ഈ ഭൂമിയിൽ ജനിച്ച ഒരേ ഒരു താരം . പച്ചയായ മനുഷ്യൻ , നന്ദി മമ്മൂക്ക ഈ സ്നേഹത്തിനു, ചേർത്തു നിർത്തലിന് , നല്ല വാക്കുകൾക്ക്- ജൂഡ് ആന്തണി കുറിച്ചു.
മമ്മൂട്ടിയുടെ ജീവിതം സിനിമയാക്കാൻ താൽപ്പര്യമുണ്ടെന്ന് നേരത്തെ ജൂഡ് വ്യക്തമാക്കിയിരുന്നു. മമ്മൂട്ടിയെക്കുറിച്ച് ഇതേക്കുറിച്ച് പറഞ്ഞിരുന്നു. എന്നാൽ തന്റെ ജീവിതം സിനിമയാക്കേണ്ട എന്നാണ് മമ്മൂട്ടി പറഞ്ഞത്. എപ്പോഴെങ്കിലും മനസുമാറുകയാണെങ്കിൽ തനിക്ക് തന്നെ തരണം എന്നു പറഞ്ഞിട്ടുണ്ടെന്നും ജൂഡ് വ്യക്തമാക്കിയിരിക്കുന്നു.
2018ലെ മഹാപ്രളയത്തെ ആസ്പദമാക്കിയാണ് ജൂഡ് ചിത്രം ഒരുക്കിയത്. ആദ്യ ദിവസം മുതൽ മികച്ച അഭിപ്രായമാണ് ചിത്രത്തേക്കുറിച്ച് ലഭിക്കുന്നത്. ടൊവിനോ തോമസ്, ആസിഫ് അലി, കുഞ്ചാക്കോ ബോബൻ, അപർണ ബാലമുരളി, ലാൽ, തുടങ്ങിയ വൻതാരനിരയാണ് ചിത്രത്തിൽ അണിനിരന്നത്.
