ആരോഗ്യത്തിൽ ശ്രദ്ധിക്കണം, കരുതലോടെയിരിക്കൂ..! സിനിമ ഉപേക്ഷിക്കുന്നു എന്നു പറഞ്ഞ അൽഫോൻസ് പുത്രന് വീഡിയോ സന്ദേശവുമായി കമൽഹാസൻ
ചെന്നൈ: മലയാളി പ്രേക്ഷകരുടെ പ്രിയപ്പെട്ട ഒരു സംവിധായകനാണ് അൽഫോൻസ് പുത്രൻ. അൽഫോൻസിന്റെ പ്രേമം സൃഷ്ടിച്ച തരംഗം തെന്നിന്ത്യ മുഴുവൻ എത്തിയിരുന്നു. എന്നാൽ, തനിക്ക് രോഗമുണ്ടെന്ന കാര്യം വെളിപ്പെടുത്തി അൽഫോൻസ് പുത്രൻ താൻ സിനിമാ ജീവിതം ഉപേക്ഷിക്കുകയാണ് എന്ന് അടുത്തിടെ വ്യക്തമാക്കിയിരുന്നു.
ആ പോസ്റ്റ് പിന്നീട് നീക്കിയെങ്കിലും സംവിധായകന്റെ കുറിപ്പ് ചർച്ചയായി മാറി. സംവിധായകൻ അൽഫോൻസ് പുത്രന് ആശംസകളുമായി രംഗത്ത് എത്തിയിരിക്കുകയാണ് നടൻ കമൽഹാസൻ. ഉലഗനായകൻ കമൽഹാസന്റെ ജന്മദിന ആഘോഷത്തിനായി സംവിധായകൻ അൽഫോൻസ് പുത്രൻ അടുത്തിടെ ഒരു പാട്ട് തയ്യാറാക്കിയിരുന്നു. ആ പാട്ടിന് അൽഫോൻസിന് നന്ദി പറയുകയാണ് കമൽഹാസൻ. ഇതിഹാസ നടനായ കമൽഹാസന്റെ ശബ്ദമുള്ള വീഡിയോ നടൻ പാർഥിപൻ പങ്കുവെച്ചിരിക്കുകയാണ്. അൽഫോൻസ് പുത്രന്റേത് ഊർജസ്വലമായ മനസാണെന്ന് പറഞ്ഞ കമൽഹാസൻ ആരോഗ്യത്തിൽ ശ്രദ്ധിക്കാനും നിർദ്ദേശിക്കുന്നു.
അദ്ദേഹം ആരോഗ്യവാനല്ലായിരിക്കും. പക്ഷേ മനസ് ക്രിയാത്മകമാണ്. ശബ്ദം ഉന്മേഷകരമാണ്. അതുപോലെ അദ്ദേഹം മുന്നോട്ടുപോകുമെന്ന് പ്രതീക്ഷിക്കുന്നു. സിനിമയിൽ നിന്നു വിട്ടുനിൽക്കുമോയെന്ന തീരുമാനം വ്യക്തിപരമാണ്. പക്ഷേ ആരോഗ്യത്തിൽ ശ്രദ്ധിക്കണം. കരുതലോടെയിരിക്കൂ അൽഫോൻ പുത്രൻ എന്നും പറയുന്നു കമൽഹാസൻ.
