96 കണ്ടിരുന്നു, എന്നിട്ടും ആളെ അറിഞ്ഞില്ല; വിജയ് സേതുപതി ആരാണെന്നറിയാൻ ആദ്യം ഗൂഗിൾ ചെയ്തു നോക്കി: കത്രീന കൈഫ്

കൊച്ചി: വിജയ് സേതുപതിയെയും കത്രീന കൈഫിനെയും പ്രധാന കഥാപാത്രങ്ങളാക്കി ശ്രീറാം രാഘവൻ സംവിധാനം ചെയ്ത ഏറ്റവും പുതിയ ചിത്രമാണ് 'മെറി ക്രിസ്മസ്' തീയറ്ററുകളിൽ എത്തിയിട്ടുണ്ട്.

ഇപ്പോഴിതാ ചിത്രത്തിൽ വിജയ് സേതുപതി ആണ് നായകനെന്ന് പറഞ്ഞപ്പോൾ തനിക്ക് ആദ്യം ആളെ മനസിലായില്ലെന്ന് പറയുകയാണ് കത്രീന കൈഫ്. എന്നാൽ വിജയ് സേതുപതിയും തൃഷയും പ്രധാന കഥാപാത്രങ്ങളായെത്തിയ '96' എന്ന ചിത്രം താൻ കണ്ടിരുന്നെന്നും കത്രീന കൈഫ് പറയുന്നു.

'ഞാൻ 96 കണ്ടിരുന്നു, എനിക്ക് ആ ചിത്രവും, അതിൽ അഭിനയിച്ച തൃഷയെയും വിജയിയെയും ഇഷ്ടമാണ്. പക്ഷേ എന്തുകൊണ്ടോ, വിജയ് സേതുപതിയെയാണ് ഈ റോളിലേക്ക് കാസ്റ്റുചെയ്തിരിക്കുന്നതെന്ന് സാർ പറഞ്ഞപ്പോൾ എനിക്ക് പെട്ടന്ന് ആ കണക്ഷൻ കിട്ടിയില്ല.

അതുകൊണ്ട് ഞാൻ എന്റെ ഓർമ്മ പുതുക്കാൻ ഗൂഗിളിൽ അദ്ദേഹത്തെ തിരഞ്ഞു. ആദ്യം തന്നെ കണ്ടത് വലിയ വെളുത്ത താടിയുള്ള അദ്ദേഹത്തിന്റെ ചിത്രങ്ങളാണ്. വെള്ള താടിയും വെള്ള മുടിയും. അതെനിക്ക് വളരെ ഇഷ്ടമായി' എന്നാണ് ഒരു ബോളിവുഡ് മാധ്യമത്തിന് നൽകിയ അഭിമുഖത്തിൽ കത്രീന കൈഫ് പറഞ്ഞത്തത്.

ബദ്‌ലപൂർ, അന്ധദുൻ എന്നീ ചിത്രങ്ങൾക്ക് ശേഷം ശ്രീറാം രാഘവൻ സംവിധാനം ചെയ്യുന്ന ചിത്രമായതുകൊണ്ട് തന്നെ വലിയ പ്രതീക്ഷയോടെയാണ് മെറി ക്രിസ്മസിനെ പ്രേക്ഷകർ നോക്കിക്കാണുന്നത്. അശ്വിനി കലേസ്‌കർ, രാധിക ആപ്തെ തുടങ്ങിയവരും ചിത്രത്തിൽ പ്രധാന വേഷത്തിലെത്തുന്നുണ്ട്. മലയാളിയായ മധു നീലകണ്ഠൻ ആണ് ചിത്രത്തിന് ഛായാഗ്രഹണം നിർവഹിക്കുന്നത്.