പേഴ്‌സണൽ മേക്കപ്പ്മാന്റെ വീടിന്റെ ഗൃഹപ്രവേശത്തിന് എത്തി മമ്മൂട്ടി; സമ്മാനങ്ങൾ നൽകി, ബന്ധുക്കളോടൊപ്പം സംസാരിച്ച് കുശലന്വേഷണം നടത്തി മെഗാ സ്റ്റാർ
കൊച്ചി: മലയാളത്തിന്റെ പ്രിയതാരമാണ് മമ്മൂട്ടി. സിനിമയിൽ എല്ലാവരോടും വലുപ്പച്ചെറുപ്പം ഇല്ലാതെ പെരുമാറുന്ന വ്യക്തിത്വം. തിരക്കിനിടയിലും പ്രിയപ്പെട്ടവരുടെ എല്ലാവരുടെയും വീട്ടിലെ വിശേഷങ്ങൾക്കും എത്താൻ ശ്രമിക്കാറുണ്ട് മെഗാ സ്റ്റാർ. ഇപ്പോഴിതാ തന്റെ പ്രിയപ്പെട്ട പേഴ്‌സണൽ മേക്കപ്പ് ആർട്ടിസ്റ്റ് സലാം അരൂക്കുറ്റിയുടെ വീട്ടിൽ എത്തിയിരിക്കുകയാണ് താരം. പാലുകാച്ച് ചടങ്ങിന് എത്തിയ താരം സമ്മാനങ്ങൾ നൽകുകയും ബന്ധുക്കളോടൊപ്പം സംസാരിച്ച് കുശലന്വേഷണം നടത്തുകയും വീട് മുഴുവൻ നടന്നു കാണുകയും ചെയ്യുന്നുണ്ട്.
'മമ്മൂക്ക ഞങ്ങളുടെ വീട്ടിൽ... 'എന്ന് കുറിച്ചാണ് സലാം വീഡിയോയും ചിത്രങ്ങളും പങ്കിട്ടിരിക്കുന്നത്. മമ്മൂട്ടിയുടെ തിരക്ക് നന്നായി അറിയാവുന്ന സലാം ഈ വരവ് ഒട്ടും പ്രതീക്ഷിച്ചില്ല എന്നും വീട്ടിലേക്ക് സമ്മാനങ്ങൾ നേരത്തെ എത്തിച്ചെങ്കിലും മമ്മൂക്ക എത്തിയതാണ് വലിയ സമ്മാനം എന്ന് സലാം കുറിച്ചു.
മലയാളികളുടെ സ്വന്തം മമ്മൂക്കയെ കൂടുതൽ സുന്ദരൻ ആക്കുന്ന സലാമിന്റെ വീട്ടിലേക്ക് മമ്മൂക്ക എത്താൻ കാണിച്ച സമയവും മനസ്സിനെ പ്രശംസിച്ചാണ് പലരും ഈ ഫോട്ടോയ്ക്കും വിഡിയോയ്ക്കും താഴെ കമന്റുകൾ ഇടുന്നത്. പ്രിയപ്പെട്ടവന്റെ വീട്ടിലേക്ക് വിശേഷമറിഞ്ഞ് എത്തിയ മമ്മൂട്ടിയുടെ മനസ്സ് വലുതാണ് എന്ന് പ്രേക്ഷകർ ഒരുപോലെ പറയുന്നു.
തന്റെ പുതിയ വീട് സന്ദർശിക്കാൻ മലയാളത്തിന്റെ മെഗാ സ്റ്റാർ മമ്മൂട്ടി എത്തിയതിന്റെ സന്തോഷം തന്റെ ഇൻസ്റ്റഗ്രാം ഹാൻഡിലിൽ നിന്നാണ് സലാം മമ്മൂട്ടി പോസ്റ്റ് ചെയ്തിരിക്കുന്നത്. നിമിഷങ്ങൾ കൊണ്ട് അത് ആരാധകർ ഏറ്റെടുത്തു. ഈ വീഡിയോ സോഷ്യൽ മീഡിയയിൽ തരംഗമാകുകയാണ്.
