കൊച്ചി: കുടുംബാംഗങ്ങളുടെ മനോഹരവും വികാരനിർഭരമായ നിമിഷങ്ങളുമായി നടി അമല പോളിന്റെ വിവാഹ വിഡിയോ പുറത്തുവന്നു. മാജിക് മോഷൻ മീഡിയയാണ് വിഡിയോ റിലീസ് ചെയ്തത്. കുടുബാംഗങ്ങളും അടുത്ത സുഹൃത്തുക്കളും മാത്രം പങ്കെടുത്ത ലളിതമായ ചടങ്ങിൽ വച്ചായിരുന്നു അമലയുടെയും ജഗദ് ദേശായിയുടെയും വിവാഹം.

കൊച്ചിയിലെ സ്വകാര്യ ഹോട്ടലിൽ വച്ചായിരുന്നു വിവാഹം. കുടുംബാംഗങ്ങളുടെ മനോഹരവും വികാരനിർഭരമായ നിമിഷങ്ങളും വിഡിയോയിൽ കാണാം. സ്വകാര്യ ഹോട്ടലലിൽ നടന്ന ചടങ്ങിലെ ദൃശ്യങ്ങളാണ് വീഡിയോയിൽ മനോഹരമായി ചിത്രീകരിച്ചിരിക്കുന്നത്. മോതിരം മാറൽ ചടങ്ങിന് ശേഷം ആർപ്പുവിളിക്കുന്ന അമലയുടെ സഹോദരനേയും സന്തോഷത്താൽ കരയുന്ന ജഗദിന്റെ അച്ഛനേയുമെല്ലാം വീഡിയോയിൽ കാണാം.

ലാവൻഡർ നിറത്തിലുള്ള ലെഹങ്കയിൽ രാജകുമാരിയെപ്പോലെയാണ് അമല ഒരുങ്ങിയത്. ഇതിന് യോജിക്കുന്ന പീച്ചും ലാവൻഡറും ചേർന്ന ചോക്കറും കമ്മലും താരം തിരഞ്ഞെടുത്തു. ലാവൻഡർ നിറത്തിലുള്ള ഷർവാണിയായിരുന്നു ജഗദിന്റെ വേഷം.



ഗുജറാത്ത് സ്വദേശിയാണ് ജഗദ്. ടൂറിസംഹോസ്പിറ്റാലിറ്റി മേഖലയാണ് അദ്ദേഹത്തിന്റെ തൊഴിലിടം. നോർത്ത് ഗോവയിലെ ആഡംബര ഹോംസ്റ്റേയുടെ ഹെഡ് ഓഫ് സെയിൽസ് ആയി ജോലി നോക്കുകയാണ് ഇപ്പോൾ.

യാത്രകൾ ഇഷ്ടപ്പെടുന്ന അമല അവധിക്കാലയാത്രകൾക്കിടെയാണ് ജഗദിനെ കണ്ടുമുട്ടുന്നതും പരിചയപ്പെടുന്നതുമെന്ന് തമിഴ് മാധ്യമങ്ങൾ റിപ്പോർട്ട് ചെയ്തു. നിലവിൽ ഗോവയിലാണ് ജഗദിന്റെ താമസം. ജോലിയുടെ ഭാഗമായി ഗുജറാത്തിൽ നിന്നും ജഗദ് ഇവിടേയ്ക്ക് താമസം മാറ്റിയിരുന്നു.

അമല പോളിന്റെ രണ്ടാം വിവാഹമാണിത്. 2014ലാണ് സംവിധായകൻ എ.എൽ. വിജയ്‌യുമായുള്ള അമലയുടെ ആദ്യ വിവാഹം നടക്കുന്നത്. നാല് വർഷത്തെ പ്രണയത്തിനു ശേഷമായിരുന്നു വിവാഹം. എന്നാൽ, 2017ൽ ഇവർ വിവാഹമോചിതരായി. പിന്നീട് ഗായകനും മുംബൈ സ്വദേശിയുമായ ഭവ്‌നിന്ദർ സിങ്ങുമായി താരം ലിവിങ് റിലേഷനിലായിരുന്നു.

ഇരുവരും വിവാഹിതരായി എന്ന രീതിയിൽ വാർത്തകളും ചിത്രങ്ങളും പ്രചരിച്ചിരുന്നു. എന്നാൽ തെറ്റായ ചിത്രങ്ങൾ പ്രചരിപ്പിച്ച്, തെറ്റിദ്ധാരണ സൃഷ്ടിക്കാൻ ബോധപൂർവം ഭവ്‌നിന്ദർ ശ്രമം നടത്തി എന്നായിരുന്നു അമലയുടെ വിശദീകരണം.

പൃഥ്വിരാജിനെ നായകനാക്കി ബ്ലെസി സംവിധാനം ചെയ്യുന്ന ആടുജീവിതമാണ് അമലയുടേതായി ഉടൻ റിലീസിനൊരുങ്ങുന്ന ചിത്രം. മമ്മൂട്ടിയുടെ ക്രിസ്റ്റഫർ, അജയ് ദേവ്ഗണിന്റെ ഭോല എന്നീ സിനിമകളിലാണ് അമല അവസാനം പ്രത്യക്ഷപ്പെട്ടത്.

മറുനാടന്‍ മലയാളി

    മറുനാടന്‍ മലയാളി ബ്യൂറോ