പ്രേക്ഷക ഹൃദയങ്ങൾ കീഴടക്കിയ 'പളുങ്ക്'; 17 വർഷങ്ങൾ പിന്നിടുന്ന സിനിമയെ കുറിച്ചു കുറിപ്പുമായി സംവിധായകൻ ബ്ലെസി

കൊച്ചി: മലയാളത്തിലെ മികച്ച ചിത്രങ്ങളിൽ ഒന്നാണ് ബ്ലസ്സി സംവിധാനം ചെയ്ത പളുങ്ക്. മമ്മൂട്ടി, നസ്രിയ, ലക്ഷ്മി ശർമ്മ എന്നിവർ പ്രധാനവേഷങ്ങൾ ചെയ്ത മലയാള ചിത്രം റിലീസ് ചെയ്തിട്ട് 17 വർഷങ്ങളായി. സിനിമയുടെ വാർഷികത്തിന് സംവിധായകൻ ബ്ലെസി പങ്കിട്ട വൈകാരികമായ കുറിപ്പ് ശ്രദ്ധ നേടുന്നു.

'പളുങ്ക് പുറത്തിറങ്ങി 17 വർഷം തികയുമ്പോൾ, ഞങ്ങളുടെ ആത്മാവിനെ നടുക്കിയ കഥ ഞങ്ങൾ വീണ്ടും സന്ദർശിക്കുന്നു. വേദനയിലേക്ക് നയിക്കുന്ന അമിതമായ അഭിലാഷത്തിന്റെ റിയലിസ്റ്റിക് ചിത്രീകരണം, ശാരീരിക പീഡനങ്ങളുടെ നിർഭാഗ്യകരമായ സംഭവങ്ങളുമായി സമൂഹം ഇപ്പോഴും പിടിമുറുക്കുന്നതിനാൽ സിനിമയുടെ പ്രമേയം പ്രസക്തമായി തുടരുന്നു' പ്രേക്ഷകഹൃദയങ്ങൾ കീഴടക്കിയ 'പളുങ്ക്' 17 വർഷങ്ങൾ പിന്നിടുന്ന അവസരത്തിൽ സംവിധായകൻ ഇൻസ്റ്റഗ്രാമിൽ കുറിച്ചു.

മമ്മൂട്ടി നായകവേഷം അണിഞ്ഞ 'പളുങ്ക്'ലെ സൂസമ്മയെ അവതരിപ്പിച്ചത് ലക്ഷ്മി ശർമ്മയാണ്. നസ്രിയ നസ്റീമും നിവേദിതയുമായിരുന്നു ഗീതുവിനെയും നീതുവിനെയും അവതരിപ്പിച്ചത്. സോമൻ പിള്ളയായെത്തിയ ജഗതി ശ്രീകുമാറും ടീച്ചറായെത്തിയ നെടുമുടി വേണുവും അസാമാന്യ പ്രകടനമാണ് കാഴ്ചവെച്ചത്.

സന്തോഷ് തുണ്ടിയിൽ ഛായാഗ്രഹണവും രാജാ മുഹമ്മദ് ചിത്രസംയോജനവും നിർവഹിച്ച ചിത്രത്തിലെ ഗാനങ്ങൾക്ക് മോഹൻ സിത്താരയാണ് സംഗീതം പകർന്നത്. മൂവാറ്റുപുഴയിലെയും തൊടുപുഴയിലെയും വിവിധ ലൊക്കേഷനുകളിലായ് ചിത്രീകരിച്ച ഈ ചിത്രത്തിലെ മികവുറ്റ അഭിനയത്തിന് കേരള ഫിലിം ക്രിട്ടിക്‌സ് അവാർഡിലും ദേശീയ അവാർഡ് നോമിനേഷനിലും മമ്മൂട്ടിക്ക് മികച്ച നടനുള്ള പുരസ്‌കാരം ലഭിച്ചു.